Qaraǵandy oblysynda Prezıdent synynan keıin birqatar laýazymdy tulǵalar sógis aldy. Olardyń qatarynda oblys ákiminiń orynbasarlary, qala jáne aýdan ákimderi bar. Bul týraly oblys ákiminiń baspasóz qyzmeti habarlady.
«2013 jyldyń 11 qazanynda Úkimettiń keńeıtilgen otyrysynda Memleket basshysynyń jasaǵan syn-eskertpelerine saraptama jasaǵannan keıin memlekettik organdardyń jumysyna qatysty sáıkes sheshimder shyǵarylyp, birqatar laýazymdy tulǵalar jazalandy», - dedi oblys ákimi Baýyrjan Ábdishev selektorlyq jıynda.
Oblys ákimi «QazAvıaSpektr» zaýytynyń ónim óndirýdi uıymdastyrýdaǵy qanaǵattanǵysyz jumysy úshin óziniń birinshi orynbasary Ǵabıt Muhambetov pen orynbasary Ánýar Ahmetjanovqa sógis jarııalaıtynyn aıtty. Aımaq basshysy sol sııaqty atalǵan jobanyń sátsizdikke ushyraýyna baılanysty Qaraǵandy qalasynyń ákimi Meıram Smaǵulovqa Oktıabr aýdanynyń ákimi Erjan Temirhanovty tártiptik jaýapkershilikke tartýdy tapsyrdy. Ol osyǵan deıin oblystyq kásipkerlik jáne ónerkásip basqarmasynyń basshysy bolyp istegen edi. Sonymen birge, jobany júzege asyrý kezinde qalalyq kásipkerlik bólimin basqarǵan qala ákiminiń orynbasary Erikbek Ataǵanovty tártiptik jaýapkershilikke tartý júkteldi. «E.Temirhanovqa qyzmetine tolyq saı kelmeıtini eskertilip, E.Ataǵanovqa qatań sógis jarııalaý kerek», - dep naqtylady oblys ákimi.
Aımaq basshysy, sonymen birge, bes jyldan beri oblystyń ındýstrıaldy-ınnovasııalyq damý máselelerine jetekshilik etip kelgen Qaraǵandy oblysy ónerkásip jáne ındýstrıaldy-ınnovasııalyq damý basqarmasynyń orynbasary Ǵalymjan Jumasultanovty qyzmetinen bosatý týraly sheshim shyǵardy.
B.Ábdishev, sonymen birge, «Bıznestiń jol kartasy - 2020» baǵdarlamasynyń aıasynda paıyzdyq nesıe mólsherlemesin sýbsıdııalaý boıynsha qanaǵattanarlyqsyz jumys pen sáıkes jobanyń joqtyǵy úshin Qarajal qalasynyń ákimi Qaırat Shormanbaev pen Ulytaý aýdanynyń ákimi Hamıt Omarovqa sógis jarııalady. Sonymen birge, Qarqaraly aýdanynyń ákimi oblys ákiminiń tapsyrmalaryn oryndamaǵany úshin sógis aldy.
Taǵy birqatar sheneýnikter turǵyn úıler men áleýmettik-mádenı nysandarda jylý eseptegish quraldardy ornatý jumystarynyń nashar uıymdastyrylýyna baılanysty jazalandy. Oblys ákiminiń orynbasary Saparǵalı Ydyrysovqa, Shahtınsk ákimi Aleksandr Aglıýnınge, Abaı aýdanynyń ákimi Altaı Eljasovqa sógis jarııalandy. Prıozersk qalasynyń ákimi Qaırat Qamzın de qatań sógis arqalady. Balqash ákimi Nurlan Áýbákirov, Sátbaev ákimi Ánýar Omarov pen Temirtaý ákimi Nurken Sultanovqa eskertý jasaldy.
Sonymen birge, oblys ákimi oblystyq energetıka jáne turǵyn úı kommýnaldyq sharýashylyǵy basqarmasynyń jetekshisine osy basqarmanyń orynbasary Tatıana Orlovany turǵyn úıler men áleýmettik-mádenı nysandarda jylý esepteý boıynsha quraldardy ornatý jumystaryn uıymdastyrý boıynsha qadaǵalaý júrgizilmeýine baılanysty tártiptik jaýapkershilikke tartýdy tapsyrdy.
Qaraǵandy qalasynyń ákimine «Teplotranzıt» JShS bas dırektory Andreı Lıapýnovqa esepteý quraldaryn ornatýda jibergen qatelikteri úshin qatań eskertý jasaýdy tapsyrdy.
«Joǵaryda atalǵan qala jáne aýdan ákimderi tıisti orynbasarlar men basqa laýazymdy tulǵalardy tártiptik jaýapkershilikke tartyp, olarǵa tártiptik jaza taǵaıyndasyn. Buıryq jobalary búgingi kúnniń sońyna deıin engizilýi tıis», - dep qosty B.Ábdishev.
Sáken Maılybaı.
