Kúz ben qys aılarynda órshıtin tynys alý organdary aýrýlarynyń aldyn alý, sottalǵan balalardyń arasynda atalǵan aýrýdyń jappaı taralmaýy maqsatynda jýyrda Almaty qalasynda jazalaryn ótep jatqan mekemedegi jasóspirimderge №5 qalalyq emhanamen birlesip, ekpe salý jumystary júzege asyryldy.
Balalardy ekpege daıyndaý barysynda mamandar olarda tynys joldary aýrýlary belgileriniń bar-joǵyn, koronavırýspen aýyrǵandarmen baılanysyn tekserip, dene qyzýlaryn ólshedi. Ekpe 45 jasóspirim sottalǵandarǵa jáne mekeme qyzmetkerlerine jasaldy.
Bas bostandyǵynan aıyrý ornyndaǵy balalardyń ımmýnıtetin kóterýdiń mańyzy zor ekeni belgili. Bul oraıda Almaty qalasyndaǵy LA-155/6 túzeý mekemesinde balalarǵa beriletin tamaqtyń qunarlylyǵy únemi basty nazarda ustalady.
Atalǵan mekemedegi medısınalyq bólimde 17 medısına qyzmetkeri, onyń ishinde dáriger terapevt, tis dárigeri, psıhıatr men ftızıatr jazaly jasóspirimderdiń densaýlyǵyn qadaǵalaıdy. Qandaı bir aýrý belgileri anyqtalǵan jaǵdaıda olar tolyqqandy emdeý jumystaryn júrgizedi. Jylyna eki ret sottalǵan balalar №5 qalalyq emhana mamandarynyń kómegimen jan-jaqty profılaktıkalyq tekserýden ótkiziledi.
– Ekpe salý kezinde aǵzaǵa ınfeksııalyq agenttiń bólshegi engiziledi. Vaksınadaǵy ınfeksııalyq agent aýrý týdyrmaıdy, biraq aǵzanyń aýrýǵa qarsy antıdene óndirýine jaǵdaı jasaıdy, deıdi Almaty qalasy boıynsha QAJ departamentiniń sottalǵandardy medısınalyq qamtamasyz etý tobynyń bas mamany Araı Mádı.
