Qazaqstan Úkimeti jaýapkershilikten qorqady. Bul jóninde Ortalyq kommýnıkasııalar qyzmetiniń brıfıngisinde «Qazaqstannyń azamattyq alıansy» zańdy tulǵalar birlestiginiń prezıdenti Nurlan Erimbetov aıtty. «Men óńirlerge jıi baramyn, eńbek ujymdarymen kezdesemin. Sonda maǵan «Prezıdent elde ne bolyp jatqanyn bile me?» degen saýaldy kóp qoıady. Jaqynda ótken úkimettiń keńeıtilgen otyrysy Memleket basshysynyń jaǵdaıdy anyq-qanyǵyna deıin biletinin anyq kórsetti», - dedi N.Erimbetov.
Onyń aıtýynsha, ókinishke oraı, Elbasynyń aıtqanyn, bergen tapsyrmalaryn Úkimet jalǵastyra almady.
«Bul áńgime jalǵasyn tappady. Ádettegideı, kezekti josparlar, strategııalar, doktrınalar bastaldy. Munyń barlyǵy sol aıtylǵandardyń bárin jýyp-shaıyp ketti», - degen ókinishin bildirdi Erimbetov.
«Úkimettegilerdiń eshbiri jaýapkershilikti moıyndaryna alǵylary kelmeıdi. Olardyń sózin tyńdap kórińdershi, olardyń sózi «Memleket basshysy aıtqandaı...», «Memleket basshysy atap kórsetkendeı...», «Memleket basshysy tapsyrǵandaı...» dep bastalyp, solaı aıaqtalady. Al seniń ózińniń maqsatyń, seniń tapsyrmań, seniń ıdeıań qaıda? Seni ne úshin mınıstr, seni ne úshin úkimet tóraǵasy, jaýapty hatshy deıdi? Men kináli emespin dep, bárin úlken kisige japsyra salady. Bizde mundaı tarıhta bolǵan. Meniń oıymsha, biz budan sabaq alýymyz kerek», - degen pikirin bildirdi ol.
Sáken Maılybaı.
