Osy baǵyt boıynsha nomınal syıaqy mólsherlemesi Qazaqstan Respýblıkasynyń Ulttyq Banki belgilegen bazalyq paıyzdyq mólsherlemeden aspaýy kerek jáne 8,5 paıyzdyq pýnktke ulǵaıǵan, kásipker úshin nesıe boıynsha syıaqy mólsherlemesi jylyna 6%-dy quraıdy.
Kásipker úshin nomınal mólsherleme men sońǵy mólsherleme arasyndaǵy aıyrmashylyqty memleket sýbsıdııalaıdy (kásipkerge ótemaqy tólenedi). Úkimettiń sheshimimen memleket «Damý» qory arqyly nesıe jáne mıkroqarjylar boıynsha paıyzdyq mólsherin portfeldik sýbsıdııalap, kepildik beredi. Sáıkesinshe, nesıe týraly sheshimdi bank nemese mıkroqarjy uıymy qabyldaıdy, al nesıege sýbsıdııa jáne kepildik berý týraly sheshim habarlama sıpatynda bolady. Aınalym qarajatyn tolyqtyrýǵa arnalǵan nesıe boıynsha maksımal soma eki jylǵa deıingi sýbsıdııalaý merzimimen 5 mln teńgeden aspaıdy, al nesıe jańartylmaıtyn negizde beriledi. Investısııa maqsatyndaǵy nesıeniń maksımal somasy − úsh jylǵa deıingi sýbsıdııalaý merzimimen 20 mln Bir boryshkerdiń qolyna tıetin shekti qarjy − 20 mln teńge. "Damý" qorynyń kepildigi nesıe somasynyń 85%-yn quraıdy.
Búgingi kúni "Damý" Qory portfeldik sýbsıdııalar men kepildikter týraly ekinshi deńgeıli úsh bankpen ("Sberbank" AQ, "Qazaqstan Halyq Banki" AQ, "BankSentrKredıt" AQ) kelisimsharttar jasasty. Jaqyn arada baǵdarlamaǵa qatysýǵa nıet bildirgen basqa EDB jáne MQU-men kelisimsharttar jasalady dep josparlanǵan.
Baǵdarlamanyń osy baǵytynyń mańyzdy jáne jaǵymdy aıyrmashylyǵy – qarjylandyrý týraly sheshim tek bank nemese mıkroqarjy uıymy deńgeıinde qabyldanady. Bul tásil nesıe alýǵa ótinimdi qaraý merzimin aıtarlyqtaı qysqartady jáne kásipkerlerdiń ekinshi deńgeıli banktermen jáne "Damý" kásipkerlikti damytý qory" AQ-men qarym-qatynasyn jeńildetedi.
"Baǵdarlamadaǵy bul jańalyq, eldegi kásipkerliktiń damýyna jáne kásipkerlerdiń qarjylyq aýyrtpalyǵyn jeńildetýge sózsiz yqpal etetin, qazirgi kúrdeli jaǵdaıda Úkimet usynǵan memlekettiń jedel jáne mańyzdy sheshimi. Bul memlekettik qoldaý quraly halyq arasynda kásipkerlik yntanyń damýyna serpin beredi, ekinshi deńgeıli bankter arqyly nesıe alýǵa sheshim qabyldaı almaı júrgenderge túrtki boldy", deıdi "Damý" kásipkerlikti damytý qory" AQ Nur-Sultan qalalyq fılıalynyń dırektory Nursultan Abdolla.
