Suhbat • 25 Qyrkúıek, 2020

Gúlmıra Sarına: «Týǵan jerge degen saǵynysh meni osyndaı aq qanat ásem ánderge ǵashyq etti»...

145 ret kórsetildi

Qazaqtyń qasıetti qara dombyrasy kúmbirimen jarasa órilgen halqymyzdyń dástúrli án murasy ásem de kúrdeli ıirimimen, daladaı keń dıapazonymen, ulttyq sıpatymen erekshelenedi desek, búginde sol dástúrdi áýendik, oryndaýshylyq turǵydan jańǵyrtyp, án mádenıetiniń úzdik úlgisine aınaldyra bilgen tulǵalar neken-saıaq. Sonyń biri de biregeıi – Arqa dástúrli án mektebiniń ókili, Qazaqstannyń eńbek sińirgen qaıratkeri, Qazaq ulttyq óner ýnıversıtetiniń ustazy, ánshi-termeshi ári sazger Gúlmıra SARINA.

– Gúlmıra Aıymǵazyqyzy, Abaı Qunanbaıulynyń 175 jyl­dyq mereıtoıyna oraı Mádenıet jáne sport mınıs­tr­liginiń qoldaýymen uıym­das­tyrylǵan «Abaıdyń án álemi» avtorlyq jobańyzdy alǵash To­byl-Torǵaı óńirinen bastap, keıin Aqtóbe, Taldyqorǵan qala­larynda jalǵastyrmaq jos­paryńyz bar edi. Áýeli osy sa­parlar týraly egjeı-teg­jeıli baıan­dap berseńiz.

– Alǵashqy suraqty Abaı ata­myzdan bastaǵanyńyz úshin rahmet. Memleket basshysy Qasym-Jomart Toqaevtyń Alash jur­ty ǵana emes, adamzattyń Abaıy­na aınalǵan uly oıshyl, dana aqyn, daryndy kompozıtor Abaı Qunanbaıulynyń 175 jyldyǵyn el bolyp atap ótý týraly Jarlyǵy bárimizdi qýant­qany ras. Árbirimizdiń kókeıimizde júr­gen bul mereıli datany mem­leket kóleminde toılaý – aqyn shyǵarmashylyǵyna qaıta úńilip, mýzykalyq murasyn nasıhattaı túsýge múmkindik ber­di. Mundaı mezette óner adamy retinde osynaý aıtýly is-sha­radan tys qalyp qoıǵym kelmedi. Sol sebepti qasıetti qara domby­ramdy arqalap, Abaıdyń án álemin elimizdiń ár óńirine nası­hattap-jetkizý maqsatynda osy avtorlyq jobamdy Mádenıet jáne sport mınıstrligine usynyp, hat joldadym. Baǵdarlamama Abaıdyń óz ánderi men aqyn óleńderine jazylǵan ánderdi, shákirtteriniń týyndylaryn, sondaı-aq aqynǵa, onyń týǵan ólkesine arnalǵan ánderimdi engizdim. Mınıstrlik meniń bul jobamdy birden qol­dap, oblystarǵa hat joldady. Birneshe óńirden jaýap ta al­dym. Usynysyma aldymen qup­tap, ún qatqan Tobyl-Torǵaı óńi­rine rızashylyǵym sheksiz. Qos­tanaı oblysy ákimdiginiń uıym­dastyrýymen 14 aqpan kúni ót­ken alǵashqy keshte joǵaryda atalǵan baǵdarlama boıynsha jeke dom­byramen «Segizaıaq», «Ata-ana­ǵa kóz qýanysh», «Tatıananyń áni», «Qarańǵy túnde taý qal­ǵyp» án­derin, shákirtterinen Áset­tiń «Injý-marjanyn», aqyn óleń­derine jazylǵan «О́zgege, kóńilim, toıarsyń» (Á.Esbaev), «О́lsem, ornym qara jer syz bolmaı ma?» (J.Kármenov) ánderin, sonymen qatar Qostanaı oblystyq fılarmonııasy qazaq ulttyq aspaptar orkestriniń súıemeldeýimen Abaıdyń «Jelsiz túnde jaryq aıyn» oryndadym. Kesh barysynda «Abaıdyń eli», «Abaı joly», «Abaı salǵan áýelet sol bir ándi» atty óz ánderim de shyr­qaldy. Ha­lyqtyń qoshemetine bó­lenip, shabyttanyp qaıttym. О́kinishtisi, bul jobamdy barlyq óńirge usyna almadym. Álemdi jaı­laǵan indetten saqtaný maq­satynda elimizde karan­tındik shekteý engizilgeni málim.

– Jalpy, Abaı ánderi týraly ne bilemiz? Aqynnyń kóp oryndala bermeıtin qandaı ánderi bar? О́nerde Abaı dástúrin jal­ǵastyrýshylar bar ma?

– Qazaq ulttyq mýzyka óne­rine Abaı atamyzdyń án murasy jańalyq bolyp jetti. О́ziniń aqyndyq tilin mýzykasymen kór­­­kemdep, ultyna ólmes mura usyndy. Abaı ánderiniń zert­telýine úlken úles qosqan Ahmet Jubanov edi. Kompozıtor óz zert­teýlerinde án tabıǵatyna aı­ryqsha mán berip, Abaı ánderi óziniń tabıǵaty men rýhy jaǵynan ulttyq sıpatqa ıe ekenin, qaı ja­ǵynan da halqymyzdyń ba­ıyrǵy mýzykalyq dástúrine saı bolyp keletinin aıtady. Onyń mýzykalyq murasynan álemdik órkenıettiń óshpes izderin tól dástúrmen sheber úılestirip, álem­dik qundylyqqa aı­naldyra alǵan asqaq muratty aıqyn ań­ǵaramyz. Osylaısha, Abaı óziniń shyǵarmashylyq jolynda ha­lyqtyq án óneriniń baıyrǵy dástúrin damytýmen qatar, ony múl­tiksiz jalǵastyrýshy hám nasıhattaýshy qyzmetin atqardy. El ishine keńinen taralǵan «Se­gizaıaq», «Jelsiz túnde jaryq aı», «Aıttym sálem, Qalamqas» ánderi soǵan dálel. Abaıdyń odan bólek kóp oryndala bermeıtin «Boıy bulǵań», «Sur bult tuman dym búrkip», «Qarańǵy túnde taý qalǵyp», «Ata-anaǵa kóz-qýa­nysh» sııaqty t.b. tamasha ánderi bar. Mysaly, búginde kóbine bir nusqasy ǵana oryndalyp júrgen «Segizaıaqtyń» odan da basqa birneshe túri bar ekenin óner adamdary bilgenimen, qarapaıym halyqqa keńinen málim dep aıta almaımyz. Sondaı-aq keıingi kezde ulttyq án ónerin nasıhattap júrgen biraz ánshiler «О́lsem, or­nym, qara jer syz bolmaı ma?», «О́zgege, kóńilim, toıarsyń» sııaq­ty týyndylaryn Abaıdyń ózi jazǵan áýende oryndap júr. Aqynnyń mundaı esti ánderge toly mýzykalyq murasy aldaǵy ýaqytta da úzdiksiz nasıhattala berýge tıis.

Jalpy, Abaı ánderiniń kóp­shiligi aqynnyń nemereleri Árham Ysqaqovtyń, Máken Muhamed­ja­novanyń aıtýymen, sonymen birge Ámire Qashaýbaev, Júsipbek Elebekov, keıinnen Mádenıet Eshekeev, Jánibek Kármenov sııaqty belgili ánshilerdiń oryndaýymen búginge jetti. Qazirgi dástúrli án óneriniń týyn ustap júrgen ónerpazdardyń deni Abaı dástúrin jalǵastyrýshylar desek te bolady. Aqyn elinde ónerdiń týyn jyqpaı júrgen Baqyt Sha­ǵataeva, Tamara Kózbaeva sııaq­ty apalarymyz ben Qaırat Qaby­shevtaı zamandasymyz Qaraýyl­dyń tórinde Abaı ánderin shyrqap, kúlli qazaqqa úlgi bolýda. Bul jolda sol óńirdegi 40 jyldyq tarıhy bar «Qalamqas» án-bı ansambliniń de sińirgen eńbegi ólsheýsiz zor.

– Arman-muraty aqıqatqa aınalyp, ónerge qol jetkizgen jandar óte sırek. Sizdiń óner jo­lyn tańdaýyńyzǵa ne sebep boldy?

– О́ner jolyna túsýime sebep bolǵan nárse – týǵan jerimniń kıesi, kindik qanym tamǵan ólkem­niń qasıeti, týyp-ósken ortam. Alashtyń ardaqtylary Abaı, Shákárim, Muhtarlar dúnıege kel­gen óńirde týyp ónerdi súımeý múmkin be? Munymen qosa, otba­symdaǵy adamdardyń bári solaı. Anam halyq ánderin tamyljyta shyrqaǵanda, Ilıa Jaqanovsha aıtqanda, «álsiz júrekke oıda joqta yp-ystyq qan tolyp, alpys eki tamyr ıip sala beretin-di». Ákemniń dombyramen eminte, emirente, úzdiktire salǵan áni tula boıyńdy sáýlelendirip, umsynǵan kóńildiń tátti ańsaýy shýaqty se­zimge ulasatyn. Aldyńǵy býyn aǵa-apalarymnyń bári shetinen ónerge óte jaqyn jandar edi. Áýletimizdiń tuńǵyshy, marqum Gúl­nár apam jas kúninde keremet án salatyn, akterlik qabileti myqty bolatyn. О́zimniń ónerdegi ustaz aǵam Erbol Sarınniń esimi búginde respýblıka jurtshylyǵyna etene tanys. Oqyp júrgende aýylǵa demalysqa kelgen saıyn bir jańa án úıretip ketetin. Sonyń bárin bir aıtqanda-aq lezde qulaǵyma quıyp ala qoıatynmyn. Úıdegi osy tárbıe maǵan qatty áser etti. О́ner jolyn qýý bala kúnnen armanyma aınaldy. «Uıada ne kórseń, ushqanda sony ilersiń» demekshi, otbasymdaǵy tálim-tárbıeniń arqasynda ónerdiń dańǵyl jolyna tústim.

– О́zińiz oryndaıtyn halyq ánderimen qosa, ulttyq aspaptarmen áspettelip, halyqtyq ma­qammen shyrqalatyn «Neni ań­saımyn», (M.Maqataev, T.Ra­hımov), «Jarq-jurq etken dúnıe» (N.Aıtuly, E.Úsenov) sııaqty ánder sanańdy dúr sil­kindiredi. Jurtshylyq súıip tyń­daıtyn mundaı ánderdi qa­laı tańdaısyz?

– Allaǵa shúkir, halyq ánde­riniń ózi túpsiz tereń muhıt sııaqty mol qazyna ǵoı. Odan qala berdi halyq kompozıtorlarynyń, Qa­zaq­stan kompozıtorlarynyń ánderi jeterlik. Tipti keıingi kezde darynymen tanylyp júrgen qan­shama kompozıtor bar, olardyń da tamasha týyndylary joq emes. О́ziniń ishki únine qulaq túre bilgen, jan dúnıesi muntazdaı mól­dir, kókirek kózi oıaý jannyń jasyqtan jaqutty ajyrata almaýy múmkin emes. Mán bersek, qazir áni áýezdi, maǵynasy tereń sulý ánder kól-kósir. Bul rette ánshi sóz ben sazdyń arasyn jalǵastyryp turatyn rýhanı kópir ispetti. Oǵan aqyn óleńin túısikpen uǵy­nýmen birge áýendi áýezben ádiptep, sóz ben sazdyń yrǵaǵyna qatar ilese alarlyq «sý tókpes jor­ǵa minez» tán bolýǵa tıis. Osy jaǵynan ózimdi aıy ońynan týǵan ánshiniń qataryna qosamyn. Sebebi men qaı ándi tańdasam da, áýen men sózdiń úılesimine qatty mán beremin. Menińshe, án kitap sııaqty, paraqtaı bastaǵannan paıym-parqy bilinip turatyn dúnıe. Al ánshiniń eńbegi tereńnen marjan súzgendeı tynymsyz mol izdenis desek, tyńdaýshy – óner ıesin sahna mádenıetiniń ólshemdi-mólsherli estetıkasy sheń­berinen shyǵarmaı ustap, ánniń jasampazdyq rýhyna, tár­bıelik mıssııasyna erekshe mán beretin ádil de jaqyn synshyń. Halyqtyq ólshem-pishimnen ózin joǵary qoıatyn adam utylady. Ol úshin ánshige qoıylar talap kompozıtor men aqynǵa artylatyn júkten de edáýir salmaqty. Sebebi bári oryndaýshynyń jetkizýine baılanysty. Aqyn men kompozıtor oıynyń astar-aıshyǵyn túısine de, túsine bilý, baǵalaý sezimpaz dúldúl ánshiniń ǵana qolynan keler qasıet bolar, sirá. Osy turǵydan tujyrǵanda, án jeke-dara bir kisi ıemdenip kete baratyn jalǵyzilikti óner emes, kóptiń mańdaı teri qosyla tógilgen, birneshe adamnyń qatysýymen jumyla atqarylatyn sharýa. О́ner ataýlynyń ishinde kisini sulýlyqqa qushtarlandyrýmen qatar, otansúıgishtik, eldik rýq um­tyldyratyn ulttyq tárbıeniń qaınar kózi de – osy ánde.

Qazaq dalasynda áý demeıtin qazaq bolmaǵan. San ǵasyr burynǵy sazdyń, kúı men dala sarynynyń búginge úzilmeı, sarqylmaı je­týi qazaqtyń ulttyq jadynyń myqtylyǵynan deýimiz sodan... Án maqammen, ıaǵnı sazben, ekinshiden, mátinimen, úshinshi oryndaýshysy arqyly taraıdy desek, kez kelgen ánniń ózine tán lırıkalyq maqamy, poetıkalyq ustyny, mátin-máni oryndaýshynyń she­ber­ligine tumsyq tirep jatady. Men bul oıymdy únemi qaı­talaýdan jalyqpaımyn. Týǵan jerge degen saǵynysh pen áde­mi­likke qushtarlyq, ishki sezi­mim meni osyndaı aq qanat ásem ánderge ǵashyq etti. Osy ýa­qyt­qa deıin kóptegen ándi maǵan kom­pozıtorlardyń ózderiniń usy­nýy shyǵarmashylyq ortada qalyp­tasqan sondaı túsinikten bolsa kerek. Olardyń ishinen óz bol­mysyma jaqyn ánderdi ǵana tańdaımyn. Repertýarymda elge degen saǵynysh pen súıispen­shi­likten týǵan ánder, tabıǵat ásem­digi men tirshiliktiń áserli sát­­terin sýretteıtin týyndylar óte kóp... Taǵy da saǵymdaı bul­dyrap balalyq shaq eske túsedi. Otbasylyq basqosýlarda ánshi tal­ǵamy, án tabıǵaty jóninde óz­ara qyzý pikirtalas kóp bolatyn. Oryndaǵan ánimizdi talasa taldap, óz oıymyzben bólisetinbiz. Esti ánderge elitýim meni erte eseıtti. Jalpy, ómirde tomaǵa-tuıyq janmyn, biraq esesine ádemi ánmen bir­ge jan syrym jarqyrap ashylady.

– Tólegen Aıbergenovtiń sózi­ne jazylǵan «Saǵynysh» atty ánińiz júrekti tebirentip, jan-dúnıeńdi baýrap áketedi. Sol sııaqty jurtshylyq súıip tyń­daıtyn «Ata-ananyń qadiri» (sózi Q.Sarındiki), «Farıza-ǵumyr», «Júrek sózi», «Ulysym meniń, tynysym meniń», «Án-Semeı», «Abaı salǵan áýelet sol bir ándi» (sózi J.Ysqaqtyki), «Atameken» (sózi O.Turjandyki) sııaq­ty t.b. ánderińiz qalaı týdy? Bas-aıaǵy qansha án jaz­dy­ńyz?

– Elýden asady-aý. Áli de ja­zatynym kóp dep oılaımyn. Ánderimniń birazy taspaǵa ba­sylmaǵan kúıinde. Keıde ózim yńyl­dap ishteı qaıtalap júremin. О́zińiz aıtqan birqatar án el ishine taralyp, oń baǵasyn alyp ta jatyr. Tipti birazǵa deıin osy máselege onsha kóp mán bere qoımappyn. Munym áýel basta jurtqa Arqa án mektebiniń túlegi ári ustaz, halyq ánderin oryndaý­shy retinde tanylǵandyǵymnan bolsa kerek. Sáken Seıfýllın atyndaǵy pedınstıtýtta oqyp júrgennen-aq ár ánge ózimshe bir reń qosyp, óńdep, óz boıaýymdy qosyp aıtatyn edim. Áli de solaı. Munyń ózi boıymdaǵy sazgerlik qabiletten ekenin keıin ańǵardym. Sazgerler usynǵan ánderdiń ózin ábden iriktep-suryptap, talǵa­my­ma nuqsan tıgizbeıtinin, daýy­syma saı keletinderin ǵana shyr­qaıtynmyn.

 Jalpy, meniń janym poezııaǵa óte jaqyn. Aqyndardyń jyr shanaǵynan tógilgen jibek áýenmen syrlasqan saıyn alapat bir se­zim býyrqanyp, teńizdeı tolqı jónelesiń. Osy sát ǵaıyptan qu­laǵyńa ózdiginen ásem bir áýen quıy­lady. Júregimnen týǵan sondaı áserli ánniń biri – «Shyǵysym, shuraıly elim». Elge degen saǵynyshtan týǵan ánniń mátinin Qalqaman baýyryma jazdyrdym. Osy ánmen dodaǵa qatysyp, júldeli boldym. Aqyn bolmaǵanmen óleńdi júrek súzgisinen ótkize bilemin. Kóńilim qulazyǵan shaqta óleń oqyp, qýat jııamyn. Án únemi sondaı kezde týady, óleńge arnap jazylǵan ánimniń kóp bolýy sodan. Iаǵnı rýhanı nár alatyn taýsylmas shal­qar bastaýym – jyr-darııa. Tólegen Aıbergenovtiń óleńderin bala kezimnen súıip oqımyn.

Anamdy aýylǵa arýlap jerlep kelgennen keıin nemereleriniń bári «Áje, Áje» dep izdep qaldy. Taǵdyrdyń jazǵanyna ishteı moıyn­sunǵanmen, balalardyń osynshama jáýteńdep, áje meıi­rimin izdep alasurýy kóńilimdi qatty qobaljytty. Bir kúni Aqerke esimdi qyzdyń feısbýk je­lisine Tólegen Aıbergenovtiń «Saǵynyshyn» sýretimen qosa salyp qoıǵanyn kórdim. Burynnan súıip oqıtyn aqynymnyń óleńine qaıta úńildim. Mol qazyna taýyp alǵandaı áserde boldym. Sondaǵy: «Babalar bizdi saǵynǵan, janym, armannyń ańsap bıigin, Ájeler bizdi saǵynǵan, janym, taldyryp asqar ıyǵyn» degen joldar jubanysh kúıindeı janymdy erekshe tolqytty. Dereý dombyramdy qolyma alyp, sanama sáýle shashqan áýendi qaıtalaı berdim. Jatsam da, tursam da osy áýen qulaǵymnan ketpeı qoıdy. Ábden ıini qanyp, ıkemge kelgenshe tynshı qoımadym. Sodan keıin bul ándi Almatydaǵy stýdııaǵa baryp jazdyryp keldim. Búginde «Saǵynysh» ánim áleýmettik je­lide, halyq arasynda keńinen taralyp, tanymal ánge aınaldy.

 Keıingi bes-alty jylda avtor­lyq án qorjynym edáýir kóbeıdi. Belgili aqyn qyzymyz Juldyzaı Ysqaq meni bir kúni ózi izdep kelip, ánderimdi qumarta tyńdaıtynyn aıtty. О́zi Aıagózdiń týmasy eken. «Aıagóz-arý» ánin oryndap júrgen maǵan bul kezdesý erekshe áser qaldyrdy. Sol sátten bastap ekeý­miz ápkeli-sińlideı aralasamyz, shyǵarmashylyq tyǵyz baılanystamyz. Aqynnyń óleńderine úńile kele «Jaqsy adamdar», «Jú­rek sózi», «Abaı salǵan áýelet sol bir ándi», «Abaı joly» sııaqty t.b. biraz jańa án dúnıege keldi.

– Halyq ánderin keıingi jas­tar tyńdaı bermeıdi degen pi­kirdi qulaǵymyz shalyp qalady. Bul ulttyq ónerdi jet­­kilikti dárejede nasıhattaı almaýy­myz­­dan oryn alǵan jaıt pa, ál­de jas urpaqtyń tárbıesine du­­rys kóńil bólmeýdiń saldary ma?

– Jalpy, áli kúnge deıin bizde halyq áni dese, tek jaılaýda, kıiz úıdiń ishinde, turmystyq deńgeıde ǵana aıtylady degen jaıdaq túsinik sanaǵa ábden sińip ketken sııaqty. Sol sebepti mundaı ánder kóbine shaǵyn aýdıtorııada ǵana nasıhattalyp jatady. Munyń ózi ulttyq ónerge qoıylǵan shekteý. Negizinde tól dúnıe ulttyq boıaýyn saqtaı otyryp, qazirgi zaman úlgisine saı jańǵyrtyla nasıhattalýy kerek. Mezgildiń san alýa­n synyn bastan keship, ár tusta túrlishe qubylyp, «etek-jeńi» kúzelip, bastapqy kelbetinen ajyrasa da baǵzy bir ánder suńǵyla sezimdi ánshilerdiń uıytqy bolýy­men túp tamyry úzilmeı búginge din aman jetip otyr.

Sońǵy jyldary el aralaǵanda úkili dombyrammen, ulttyq kıim­men shyǵýdy ádetke aınaldyryp júrmin. Mundaǵy oıym dom­byra únimen dala sarynyn jetki­zip, ejelden kele jatqan tól máde­nıetimizge jurttyń súıis­pen­­shiligin oıatý, ulttyq qun­dy­ly­ǵymyzdy ulyqtaý edi. Qýa­natynym, sol saparlarda ulttyq ónerge jany qushtar jastardy kóp kórdim. Baıaǵyda babalarymyz jastarǵa ómirdiń ótkinshi, baılyqtyń baıansyz, jalyndaǵan jastyqtyń da jastyǵy qısaıyp, egdeliktiń erte kiretinin áýen arqyly taratyp, ósıet-ónegesin ónermen shegelegen eken. Biz sol dástúrden qol úzip qaldyq. Qa­zirgi jastardy Batystyń dań­ǵaza ánderin kóp tyńdaıdy dep kinálaımyz. Bul tárbıedegi jiberip alǵan qateligimizden. Teńdesi joq rýhanı baılyǵymyzdy ózine tán súıkimdi áýenimen, qaıtalanbas ulttyq erekshelikterimen, san qıly boıaýymen qazirgi qoǵamnyń aı­nymas qundylyǵyna aınaldyrý barshamyzdyń basty mindetimiz bolýǵa tıis. Mundaı keń kólemdi jobanyń biri – Ulttyq dombyra kúni. Sol sııaqty mádenı-aǵartý baǵytyndaǵy «Abaı TV» tele­arnasynyń ashylýy da qazaq qoǵamy úshin úlken úmit.

– О́nerińizge baǵyt-baǵdar siltep, rýhanı demep otyratyn qamqor jandar bar ma? Qansha án-albomyńyz jaryq kórdi?

– Maǵan halyqtyń yqyla­synan, qoshemetinen basqa eshte­ńeniń qajeti joq. Osy maqsatta ánime, ónerime jyly lebizderin bildirip, rýhanı qoldaý kórsetip júretin qamqor jandar óte kóp. Qarjylyq jaǵynan úıip-tógip ýáde bermegenmen, moraldyq tur­ǵyda tilektes jandardyń jú­­rek jylýy, qoldaýy sezilip tu­rady. Men úshin eń úlken rýhanı qoldaý – halyqtyń dástúrli ónerge degen súıispenshiligi. О́zim jumys isteıtin «Shabyttaǵy» shyǵarmashyl ujymyma, aldyńǵy býyn aǵalarymnan Qaırat Baı­bosynovqa, ózimniń ustazym Erbol Sarınge ár kez alǵysym sheksiz. 

Al jeke shyǵarmashylyǵyma kelsek, alǵashqy eki albomym da demeýshilerdiń kómegimen ja­ryq kórdi. Buǵan estradalyq jáne avtorlyq ánderim engizilgen bolatyn. Halyq áni men halyq kompozıtorlarynyń ánderin jınaqtap, bas-aıaǵyn bútindeýime demeýshilik etken jandar bar. Biraq men ony dısk retinde emes, jeke saıt ashyp, zamanaýı talapqa saı turpatta nasıhattap otyrdym.

– Shynaıy ónerge jurt qa­shanda muqtaj. Ol úshin qazir qazaq qoǵamyna qandaı jobalar qajet dep sanaısyz?

– О́nerdiń aıdyny – sahnany, ulttyń aınasy telearnalardy tazalaý kerek. Tól ónerimiz ben mádenıetimizdiń injý-marjanyn ulyqtaıtyn jobalar kóbirek usynylsa, eldiktiń týy nyǵaıa túser edi. Tasada elenbeı jatqan qanshama talanttar bar. Olardy taýyp, memleket óz qamqorlyǵyna alsa degen arman bar. Osydan birneshe jyl buryn ulttyq arnaǵa osyndaı bir telejoba usynyp, hat joldadym. Jaýabyn kútip júrmin.

 – Jastardy dástúrli ónerge baýlyp júrgen ustaz retinde shá­kirtterińizdiń boıynda qan­daı qasıetterdiń bolǵanyn qalaı­syz?

– Shákirtterimniń boıynan eń aldymen tazalyqty kórgim ke­ledi. Bul tek muntazdaı kıinip, taza júrip-turý ǵana emes, ol bas­qa másele. Orystyń áıgili jazýshysy F.Dostoevskıı: «Adam boıyndaǵy baǵalaýǵa laıyq qasıet – aqyl emes. Qaıta sol aqyldy basqaratyn qasıetter: minez, jú­rek, meıirimdilik, taza oı» degen eken. Meniń aıtaıyn degenim, «júris-turysy, qımyly tym emin-erkin, ar-ujdany taza, óner jo­lynda alýan-alýan izdenisterge batyl bara alatyn, aqyl-oıy men boıyn ultty súıýge, ultqa adal qyzmet etýge sanaly túrde ba­ǵyt­taı bilgen, kózinde oty bar» shákirt tárbıelep shyǵarǵym keledi.

– Karantın tusynda mınıs­­trliktiń qoldaýymen kóptegen is-shara onlaın sıpatynda ótki­zilgeni málim. Áleý­mettik jelini ózińiz qalaı paı­da­lan­dyńyz? Alda­ǵy ýaqytta taǵy qandaı jos­parlaryńyz bar?

– Álemdi jaılaǵan indet biz­diń elimiz úshin de ońaı soǵyp jatqan joq. О́ner adamynyń úıde qamalyp jatqany qandaı jaman. Sahnany saǵynǵan sátte qolyma dombyramdy alyp, áýeletip án salamyn. О́nersúıer qaýymmen áleýmettik jelide kezdesip, aragi­dik ánderimmen bólisip qoıýǵa týra keledi. Sebebi halyqsyz óner – tul. Karantınde Nur-Sultan qalasy ákimdiginiń qoldaýymen, akademııalyq fılar­monııanyń uıymdastyrýymen on­laın-konsertim ótti. Basynda yń­ǵaı­syzdaý kóringenmen, oǵan da úırendik. Myna synaqtan aman-esen óteıik, aldaǵy josparymmen sodan keıin taǵy da bólise jatarmyn.

 

Áńgimelesken

Qarashash TOQSANBAI,

«Egemen Qazaqstan»

Sońǵy jańalyqtar

Jańaqala jigitteriniń jaqsy isi

Qoǵam • Búgin, 20:15

Oqýshy neden kóz jumdy?

Qoǵam • Búgin, 19:35

Qostanaıda qurylys alańy otqa orandy

Aımaqtar • Búgin, 18:55

Dollardyń erteńgi baǵamy belgili boldy

Ekonomıka • Búgin, 18:00

Qaraǵandy oblysynda zeınetkerler tonaldy

Aımaqtar • Búgin, 16:37

О́z týystaryn tonaýshylar kóbeıgen

Aımaqtar • Búgin, 16:07

Elordada qylmys sany 20%-ǵa azaıǵan

Aımaqtar • Búgin, 15:24

BQO: Balany qar úıindisi basyp qaldy

Aımaqtar • Búgin, 15:12

Indet juqtyrǵandar sany kóbeıdi

Koronavırýs • Búgin, 13:58

Aldaǵy kúnderi qar jaýyp, kún jylynady

Qazaqstan • Búgin, 12:47

Uqsas jańalyqtar