Akvarel álemin jaı ǵana shym-shytyryq shımaılar deseńiz, qatelesesiz. Kásibı sýretshilerdiń tanymyna salsaq, bul – keskindemedegi eń kúrdeli ádisterdiń biri. Mınımaldy quraldar men maksımaldy mánerlikti jymdastyra otyryp, álemdi barlyq tústerde názik túrde kórsete alatyn da osy bir janr. Jeńil ári qozǵalmaly keskindeme sanalsa da, erekshe sheberlik pen shydamdylyqty qajet etetini taǵy bar.
Qazaq dalasynyń sulýlyǵy, kóz tundyrar tumsa tabıǵat sýretshiler kenebindegi basty taqyrypqa aınalǵan. Eń bastysy, shyǵarmashylyqtary men temperamentteri ártúrli sheberlerdiń kúrdeli ári kópqyrly tehnıkada oryndaǵan shyǵarmalary ár darynnyń ózine ǵana tán mánerin áıgilep turǵandaı. Kórermendi osynaý sıqyrly ónerdiń tereńine boılatýdy murat tutqan óner jármeńkesine qazaqstandyq úzdik akvarel sheberleriniń júzdegen kartınasy qoıylypty. Kórme qabyrǵasynan Elena Iokton, Abaı Chýnchalınov, Anna Petrakova, Lıdııa Drozdova, Svetlana Kravchenko, Oksana Shols, Elena Popova, Olena Kolomyseva, Natalıa Dýbovaıa, Perızat Esnazarova, Dına Gaıtova, Maksım Vedernıkov, Igor Bagramov, Rýslan Abrafıkov, Olga Salkova, Rashıd Kýlbatyrov, Qanaǵat Kodekov, Kamıla Lapteva-Týleshova, Dáýren Qasteev, Raýan Súleımenov, Muhtar Syzdyqov, Maqsat Qantarbaev, Maısa Yqylasova, Tóleýǵazy Baıǵalıev, Orazaly Jánibek, Marlan Nysanbaev syndy talantty sýretshilerdiń biregeı qoltańbasyn tamashalaýǵa bolady.
Ásirese peızaj, portret, natıýrmort, sıýjettik jáne dereksiz kompozısııalar kórmeniń taqyryptyq mazmunyn asha túsken. Arhıtektýralyq sıýjetter, etnıkalyq motıvter jáne qarapaıym adam ómiri – akvarel sýretshileriniń tabıǵatqa degen súıispenshiligin shynaıy kórsetedi.
– Akvarel tehnıkasy sýretshiler men osy ónerdi baǵalaýshylar úshin qaı kezde de eń tartymdy tetik bolyp qala beredi. Bul týyndylar qaǵazǵa jazyla salǵan jaı keskinder emes. Ár shyǵarma tapqyrlyq pen batyldyqtyń, asqaq sezimniń jemisi. Atalǵan kórmege Qazaqstannyń túrli qalalarynan, Otanymyzdyń túkpir-túkpirinen naǵyz sheber sýretshilerdiń kartınalary qoıyla otyryp, akvarel óneri týyndylarynyń keń palıtrasy túzildi dep aıta alamyz. Ár shyǵarmada joǵary sapa belgisi bar, al kúrdeli stıl ár sýretshini akvareldiń beıneleý ónerinde bólek orynǵa qoıady, – deıdi Memlekettik Ortalyq mýzeıiniń qyzmetkeri Sulýshash Aǵeleýova.
Alýan tústi boıaýlar balalar úshin kórkemdik talǵam qalyptastyryp, ásemdikti sezinýge, shyǵarmashylyq qabiletin damytýǵa baýlıdy. Sondaı-aq mundaı týyndylardy tamashalaý arqyly kishkentaı kórermender iskerlik daǵdylaryn ashýdyń baspaldaǵynan ótedi, deıdi ónertanýshy mamandar.
ALMATY
