Medısınalyq nysan 180 stasıonarlyq tósekke eseptelgen. Buǵan qosa 20 kerýettik reanımasııalyq bólim men qarqyndy terapııa bolady. Qurylysty «Nort Kaspıan Opereıtıng Kompanı N.V.» kompanııasynyń tapsyrysymen TOO «BI Industrial» BI kompanııasy júrgizip jatyr.
Jobalaýshylardyń málimenine súıensek, ınfeksııalyq aýrýhanalar standartymen salynyp jatqan aýrýhana ǵımaraty jyldam qurastyrylatyn qurylys tehnologııasyna sáıkes, modýldi bloktardan turǵyzylýda. Medısına qyzmetkerleri men em alýshylardyń qaýipsizdigin qamtamasyz etetin zamanaýı quraldarmen jabdyqtalady. Aýrýhana ákimshilik bóligi bar medısınalyq bloktan, qabyldaý-dıagnostıkalyq bólimnen, operasııalyq blogy bar jansaqtaý bóliminen, sondaı-aq galereıa túrindegi dálizben baılanysqan bes bólimnen turady. Nysan jobasy medısınalyq logıstıka men ınfeksııalyq baqylaýdy saqtaı otyryp, bir-birimen yńǵaıly baılanysqan bloktarmen jasaqtalypty. Karantındik jáne qarqyndy terapııa bólek ornalasady. Sanıtarlyq baqylaý bólmeleri, naýqastardyń men qyzmetkerlerdiń júris baǵyty belgilengen.
Munda 56 eki, 16 úsh oryndyq palata, 6 bir oryndyq, kóshege jeke shyǵatyn esigi bar 7 eki oryndyq boks, qarqyndy terapııa bólimine 20 kerýetti oryn, qabyldaý-dıagnostıkalyq bólimine 5 boks qarastyrylyp otyr. Personalǵa arnalǵan sanıtarlyq baqylaý bólmeleri barlyq qurylymdyq bólimshede taza jáne ınfeksııalyq aımaqqa bólingen. Adamdardyń qozǵalysy bir-birine kedergi keltirmeıtindeı sanıtarlyq-gıgıenalyq jáne epıdemıologııalyq talaptar qarastyrylypty.
Jańa aýrýhananyń qurylysynyń barysymen tanysqan aımaq ákimi Mahambet Dosmuhambetov oblystyq densaýlyq saqtaý jáne qurylys basqarmalaryna nysannyń tıisti talaptarǵa saı bolýyn qadaǵalaýdy tapsyrdy.
