«Memleket basshysy qyrkúıek aıyndaǵy Joldaýynda QR AShM-ge aýyldaǵy kooperasııany yntalandyrý sharalaryn ázirleý mindetin qoıdy. Qazir, negizgi nazar vertıkaldy ıntegrasııalanǵan zákirli kooperasııaǵa aýdarylýda. Sebebi iri qaıta óńdeý kásiporyndarymen ózara is-qımylsyz usaq sharýashylyqtarǵa damý qıynǵa soǵadchy. Biraq, vertıkaldy kooperasııamen birge qatar gorızontaldy, ıaǵnı shaǵyn fermerler men jeke qosalqy sharýashylyqtardy da ózara kooperasııalanýyn damytý qajet», - dep atap ótti AShM basshysy.
Statıstıka derekteri boıynsha 1 shildede elde 2 906 aýyl sharýashylyǵy kooperatıvi tirkelgen, olar 52 myńǵa jýyq azamatty, onyń ishinde 27 myń jeke sharýashylyqty biriktiredi.
«Kooperasııany damytýdy yntalandyrý úshin búginde joǵary normatıvter negizinde ınvestısııalyq sýbsıdııalaý túrinde memlekettik qoldaý sharalary qoldanylady. Mal sharýashylyǵyn sýbsıdııalaý Erejeleri sheńberinde daıyndalǵan aýyl sharýashylyǵy shıkizatynyń qunyn arzandatý kózdelgen. Sondaı-aq, aýyl sharýashylyǵy kooperatıvteri úshin barlyq salyqtar boıynsha 70% jeńildikti kózdeıtin arnaıy salyq rejımi jumys isteıdi», - dedi mınıstr.
Sondaı-aq, «Eńbek» memlekettik baǵdarlamasy sheńberinde kooperatıvterge nesıe berý «Aýyl sharýashylyǵyn qarjylaı qoldaý qory» AQ arqyly 7 jylǵa deıingi merzimge 6% mólsherlememen (Jambyl oblysynda «Taraz» áleýmettik-kásipkerlik korporasııasy arqyly 2,5% mólsherlememen) júzege asyrylady.
Sonymen qatar, kooperasııany yntalandyrý maqsatynda Úkimettiń jobalyq keńsesi Tuńǵysh Prezıdent Qorynyń «El Úmiti» jobasymen birlesip, QR Aýyl sharýashylyǵy mınıstrligimen birlesip, salalyq jáne óńirlik erekshelikterdi eskere otyryp, kooperatıvterdiń túrli modelderi men olardy qoldaý sharalaryn pysyqtap jatqan Agrokóshbasshylar (agrolıderler) tobyn qurdy.
