О́tken apta sońynda óńirlik kommýnıkasııalar qyzmetinde Syrdarııa aýdanynyń ákimi Talǵat Dúısebaev brıfıng ótkizip, BAQ ókilderine máseleniń jaı-japsaryn aıtyp berdi.
Aýyldaǵy turǵyndardyń deni osydan 16 jyl buryn qurylǵan «A.Toqmaǵambetov» JShS quramynda eken. Seriktestiktegi 875 turǵyn 2 myń gektardaı egistik alqaptyń 10% úlesine ıe, negizgi 90 paıyzdyq úles jalǵyz azamatqa tıesili. Erte kóktemde osy qurylym ıeligindegi alqaptyń 105 gektaryna Azamat Ysqaqov basshylyq etetin «Azamat» sharýa qojalyǵy kúrish egedi. Buǵan jer úlesine ıe aýyl turǵyndary qarsy shyǵypty. Keıinnen Azamat Ysqaqovqa sol kezdegi seriktestik tóraǵasy Meńdiǵalı Esjanovtyń quryltaıshylarǵa eskertpeı, olardyń kelisimin almastan ruqsat bergeni belgili bolady. Quryltaıshynyń ókili Madııar Aldońǵarov bul sheshimdi zańsyz dep taýyp, maýsym aıynda M.Esjanovty qyzmetinen bosatyp jiberedi. Eki sharýashylyq arasynda bul týraly jasalǵan kelisimde bir taraptyń móri qoıylmaýy da istiń daý-damaısyz sheshilýine ájeptáýir kedergi keltirse kerek. Osydan da qazir «Azamat» sharýa qojalyǵy 105 gektar alqaptaǵy egindi jınap ala almaı otyr. Dáliregi, alqaptyń 70 gektary orylǵan, biraq jınalmaı jatyr. Al atyzda qalǵan kúrishtiń ónimdiligi kún saıyn tómendeı beretini belgili. 35 gektardaı alqapqa áli kombaın túspeı tur.
– Jalpy, bul – eki kásipker arasyndaǵy daý. Biraq másele ýshyǵyp bara jatqan soń jýyrda alqaptyń basyna bardyq. Problema sheshilmeıinshe egistikke eki jaqtan da kombaın kirmesin dedik. Eki tarapqa da qatysy joq sharýashylyqtardyń tehnıkasymen kúrishti jınap alyp, basqa qambaǵa saqtaı turaıyq degendi de usynys retinde aıttyq. Oǵan eki jaq ta kónbedi. Osydan da orylǵan kúrish áli jınalmaı jatyr, – deıdi aýdan ákimi.
Keıinnen aýdan ákiminiń kabınetinde jıyn ótip, úshjaqty kelisim jasalypty. Biraq ertesi-aq seriktestik pen sharýashylyq basshylary kelisimnen bas tartatynyn habarlaǵan.
Aýdan basshysy kásipkerler arasyndaǵy bul daý tek sot arqyly sheshiletinin aıtyp otyr. Biraq eshqandaı mámilege kónbeı, ózara kelisimge kelmeı otyrǵan eki taraptyń áli kúnge sotqa júginbegeni túsiniksiz. Quryltaıshy ókili Ysqaqov pen Esjanov jumsaǵan shyǵyndary kórsetilgen qujattardy usynsa, shyǵyndaryn ótep berýge de daıyn eken. Biraq olar ázirge mundaı qujattar usynbaǵan.
Aýdan ákimine jýyrda aýyl turǵyndarynan ókilder kelip, 3 máseleni sheship berýin surapty. Onyń ekeýi osy máselege qatysty. Sondaı-aq olar keleshekte «A.Toqmaǵambetov» JShS-men jumys isteýden bas tartatyndaryn da jetkizipti. Aýyldaǵylar basqa úlken seriktestikterdiń eldiń áleýmettik máselesin sheshýge úles qosyp kele jatqanyn aıtyp, «A.Toqmaǵambetov» seriktestiginiń 16 jyldan beri mundaı iske ynta tanytpaı otyrǵanyna narazylyqtaryn bildirgen.
Aýdan basshysynyń aıtýynsha, bul másele egin jınaý naýqany tolyqtaı aıaqtalǵannan keıin jalpy jınalysta talqylanady.
Qyzylorda oblysy
