"Internet alaıaqtyqtyqqa qatysty qylmysty ashý ońaı emes. Qylmysker álemniń kez kelgen núktesinde otyryp, ınternet alaıaqtyq jasaı alady. Qylmysty ashýdyń qıyndyǵy da osynda. Qazirgi ýaqytta mundaı qylmys túrin ashý 35%-dan joǵary. Bıyl 9 aı ishinde 1300 turǵyn polısııa departamentine ınternet-alaıaqtyqtyń qurbany bolǵany týraly aryz túsirdi", deıdi Krımınaldyq polısııa basqarmasynyń bólim bastyǵy Talǵat Bólegenov. Onyń aıtýynsha, koronavırýs indeti bastalǵan naýryz aıynan beri ınternettegi alaıaqtyq faktileri kóbeıgen.
"Internet alaıaqtyq byltyrǵy jylmen salystyrǵanda 15% artyp otyr. Elordalyq turǵyndardyń kóbi ınternet arqyly saýda jasaıdy, bul qylmys túriniń artýy osyǵan baılanysty bolýy múmkin", deıdi ol.
Internet-alaıaqtyǵyna qatysty ár faktide aqsha sheteldik bankterdiń sáıkestendirilmegen elektrondyq ámııandaryna nemese karta shotyna ketedi.
"Biz ekinshi deńgeıli bankterdiń bárimen jumys isteımiz. Olar bizge bank týraly aqparat alýǵa kómektesedi, sodan keıin ınternet-resýrstardyń ákimshiligimen tyǵyz baılanystamyz", deıdi Talǵat Bólegenov.
Kıber qylmyspen kúres bóliminiń aǵa jedel ýákili Saıat Dúısenbaev shetelde otyryp ınternet alaıaqtyqpen aınalysqan 12-ge jýyq jaǵdaı anyqtalǵanyn aıtty.
"Qazirgi ýaqytta áleýmettik jelilerde otyratyn ınternet-alaıaqtar óte kóp. Shetelde otyryp ınternet-alaıaqtyqpen aınalysqan 12-ge jýyq alaıaqty anyqtady. Atap aıtar bolsaq, olar Ýkraına memleketinde anyqtaldy. Qazirgi ýaqytta biz bul isti QR Bas prokýratýrasyna joldadyq. Odan keıin alaıaqtyń kim ekenin, qaı jerde júrgenin anyqtaý úshin halyqaralyq jeke tapsyrmany Ýkraına memleketine joldaımyz. Halyqaralyq jeke tapsyrmalarǵa súıene otyryp qylmystyq istiń tergeý amaldary júrgizilýde", deıdi ol.
