Bolashaq polısııa qyzmetkerlerin daıyndaıtyn oqý ornynan taǵy shý shyqty. Belgisiz bireýler jelige vıdeo jarııalaǵan. Onda pogondaǵy kýrsanttardyń tóbelesip jatqanyn kórýge bolady. Al birneshe saǵattan soń ınternette akademııa qyzmetkerleriniń vıdeoúndeýi jarııalanǵan. Olar akademııa kúmándi memlekettik satyp alýlardy júrgizip otyrǵanyna shaǵymdanǵan.
Osyǵan baılanysty elordadan Qaraǵandydaǵy IIM akademııasyna arnaıy komıssııa jiberilipti. Ishki ister mınıstrligi jelidegi birneshe vıdeony tekserýge kirisken.
Aldymen belgisiz bireýler jappaı tóbelestiń vıdeosyn jarııalap, onda bolashaq polısııa qyzmetkerleriniń beınelengenin aıtqan. Iаǵnı akademııa kýrsanttary bardaǵy kúzetshilermen sózge kelip, saldarynan birneshe adam pyshaq jaraqatyn alǵan. Alaıda Qaraǵandydaǵy IIM akademııasy bul derekti joqqa shyǵaryp otyr.
"Jaralanǵan kýrsanttar joq. Barlyǵy aman. Olar bilim alyp jatyr. Eshkim kómek surap kelgen joq, eshkimdi emdegen de joqpyz. Jarǵymen belgilengen tártip boıynsha kýrsanttar jeke ispen aınalasa alady. Alaıda qazirgi tańda eki kýrsant sheshekpen aýrýyna baılanysty 15 qazanǵa deıin karantın engizildi", - deıdi Beısenov atyndaǵy Qaraǵandy akademııasy basshysynyń orynbasary Iýrıı Kolesnıkov.
Al bardyń ıesi kýrsanttardyń tóbeleskenin aıtyp otyr. Biraq bul oqıǵa eki apta buryn bolypty.
"Sol kúni adam kóp boldy. Biraq biz olardyń kim ekenin jáne qaıda oqıtynyn suraǵan joqpyz. Biz basqalar sııaqty túngi 12-ge deıin jumys isteımiz. Al tóbeles tańǵy 4:30-da boldy. Men kýrsanttardyń kúzetshilermen tóbeleskenin estidim. Biraq meniń mekememde kúzet qyzmeti joq. Munda men bárin ózim qadaǵalaımyn", - deıdi bardyń ıesi Erkebulan Súleımenov.
Sonymen qatar, jelide taǵy bir vıdeo jarııalanǵan. Onda akademııa qyzmetkerleri rektordyń psıhologııalyq qysym jasaıtynyna shaǵymdanǵan. Saldarynan oqý ornynan tájirıbeli kadrlar ketip jatyr. Sondaı-aq, qurylys materıaldaryn satyp alý boıynsha tender olarǵa kúmándi bolyp kórinedi eken. Osyǵan baılanysty akademııaǵa Nur-Sultannan arnaıy komıssııa kelgen. Tekserýdiń nátıjesine qatysty aqparat joq.
Aıta keteıik, 2019 jyldyń basynda Qaraǵandaǵyda IIM akademııasynan shý shyqqan edi. Onda oqý ornynyń oqytýshysy áriptesterin Jańa jylmen quttyqtaı otyryp, bárin "Bratva" dep ataǵan. Sonymen qatar, ol kınodaǵy qylmys áleminiń serkelerin esine alǵan bolatyn.
