«Qazaqstannyń ekologııalyq uıymdarynyń qaýymdastyǵy» tóraǵasynyń orynbasary Eldos Abaqanovtyń aıtýynsha, klımattaǵy ózgeristiń zııany bolady. Onyń aldyn alý úshin birqatar sharýalardy tyndyrý kerek.
– Birinshiden, bizdiń elde jańa Ekologııalyq kodeks ázirlenip jatyr. О́z basym klımattyń ózgerý saldaryn beıimdeý jáne jumsartý jónindegi sharalardy eskerý kerek dep esepteımin. Sonymen qatar oǵan tómen kómirtekti jobalardy da qosý qajet. Bul degenimiz – qoǵamdyq kólikti gazdandyrý jáne elektromobılderge arnalǵan ınfraqurylymdy damytý, sý únemdeý tehnologııalary men kún kollektorlaryn paıdalaný. Osy baǵytta jumys isteıtin ortalyqtardy damytý qajet. Sondaı-aq osy tehnologııalardyń tehnıkalyq quramyn qarastyrý kerek. Kómirtek salyqtary jeke másele bolyp tabylady. О́ıtkeni bolashaqta bizdiń eksportqa baǵdarlanǵan bıznesimiz salyq salý problemasyna tap bolýy múmkin, – dedi ol.
Osy oraıda «Jasyl ekonomıka» tujyrymdamasyn qaıta qaraý kerek pe?» degen zańdy saýal týyndaıdy.
– О́kinishke qaraı, «jasyl ekonomıkany damytý» aıasynda biz óńirler turǵysynan saralanǵan tásildi kórip otyrǵan joqpyz. «Jasyl ekonomıkaǵa» kóshý, energııa únemdeý, organıkalyq sektor boıynsha ındıkatorlarǵa qol jetkizý úshin óńirlerdi qamtý kerek. Ázirshe óńirlik erekshelikter eskerilmeı otyr. Ekonomıkalyq tetikterge baılanysty naqty ındıkatorlar qajet, – dedi E.Abaqanov.
Qaýymdastyq tóraǵasy orynbasarynyń aıtýynsha, qazir halyqaralyq uıymdar qandaı da bir qanatqaqty jobalardy iske asyrýda úkimettik emes sektorǵa túrli granttar bólýde.
– Máselen, biz jel energetıkalyq qondyrǵylarynyń ónimderin júzege asyrý aıasynda osyndaı jobalardyń birine qatysamyz. О́ńirlerdi aralap, jobalardy júzege asyrýǵa múmkindik baryn baıqadyq. Naqty sandar men tásilderdi usynatyndardy anyqtaý qajet. Qoǵamnyń róli osydan kórinis tabady, – dedi ol.
