Bul ýnıversıtet pen Nursultan Nazarbaev ortalyǵy qol qoıǵan yntymaqtastyq týraly memorandýmnyń arqasynda múmkin bolmaq. Qujatqa Nazarbaev Ýnıversıtetiniń prezıdenti Shıgeo Katsý men Nursultan Nazarbaevtyń konfessııaaralyq jáne órkenıetaralyq dıalogty damytý ortalyǵynyń basqarma tóraǵasy Altaı Ábıbýllaev qol qoıdy.
Jańa áriptestik uıymdarǵa Qazaqstannyń eriktiler qozǵalysyn qoldaýǵa, sondaı-aq stýdentterdi aýdarma jáne uıymdastyrý daǵdylaryna úıretýge múmkindik beredi. Bul ásirese álemdik jáne dástúrli dinder kóshbasshylarynyń sezderi turaqty ótetin elorda jastary úshin ózekti.
Sonymen qatar, Nazarbaev Ýnıversıteti men Nursultan Nazarbaev ortalyǵy konfessııaaralyq dıalog salasyndaǵy yntymaqtastyqty keńeıtedi. Nátıjesinde birlesken is-sharalar ótkizý, dinı kóshbasshylardyń qatysýymen qonaq dáristeri men saraptamalyq kezdesýler uıymdastyrý, dinderdiń, mádenıetter men órkenıetterdiń ózara is-qımyly máselelerin talqylaý úshin dıalogtyq platformalar men pikirtalas alańdaryn ashý josparlanýda.
Memorandým taraptarǵa ózara tıimdi áriptestikti kúsheıtýge, konfessııaaralyq jáne etnosaralyq kelisim, toleranttylyq, úılesim men beıbitshiliktiń qazaqstandyq biregeı modelin ilgeriletý boıynsha jobalardy aqparattyq qoldaýdy qamtamasyz etýge múmkindik beredi.
