Aýyl sharýashylyǵy mınıstrligi baspasóz qyzmetiniń málimetinshe, Túrkııa Túrkistan oblysynda veterınarııa preparaty men vaksına shyǵaratyn zaýyt salý týraly qujatqa qol qoıyldy. Aýyl sharýashylyq mınıstri Saparhan Omarov Túrkııaǵa jumys sapary aıasynda Adyıaman qalasyndaǵy "Vetal Animal Health Products LTD" kompanııasynyń óndiris nysandaryn aralady. Saparhan Omarov zaýytta veterınarııalyq vaksına, sarysýjáne basqa da bıopreparat óndirý barysymen tanysty.
"Sapardyń qorytyndysy boıynsha Qazaqstannyń Túrkııa Respýblıkasyndaǵy elshisi Abzal Saparbekuly jáne Adyıaman provınsııasynyń gýbernatory Mahmut Chýhadardyń qatysýymen qazaqstandyq "Vetal Kazakhstan" JShS jáne "Vetal Animal Health Products LTD" kompanııasy arasynda Túrkistan oblysynda 2021 jyly óndiris qurý týraly ınvestısııalyq jobany iske asyrý boıynsha memorandýmǵa qol qoıyldy", delingen habarlamada.
"Vetal Animal Health Products LTD" kompanııasy 1991 jyly qurylǵan. Ulybrıtanııanyń Pilbright, World Reference Institute jáne Panvac Reference Institute sııaqty zerthanalary sertıfıkattaǵan 45 túrli vaksına shyǵarady. Atalmysh kompanııa veterınarııalyq vaksına, sarysý jáne túrli bıopreparat óndiretin jalpy aýdany 28 myń sharshy metr zamanaýı zaýytqa ıe.
Kompanııa ónimderi Túrkııa, Iran, BAÁ, Irak, Pákistan, Ázerbaıjan, Ýkraına, Grýzııa, Fransııa jáne t.b. elderinde qoldanylady
