Onlaın kezdesý Ulttyq akademııalyq kitaphananyń Feısbýktegi paraqshasynda ótip, ony bir mezette 500-den astam adam kórdi. Oqyrmandary jetpistiń jelmaıasyna mingen aqynǵa jyly lebizderin jazbasha joldasa, ádebıet álemindegi áriptes, úzeńgiles, syılas dostary men ini-qaryndastary Nesipbek Aıtuly shyǵarmashylyǵy týraly kózqarastaryn Zoom jelisi arqyly jetkizdi.
Onyń ishinde qazaq satırasynyń kórnekti ókili Kópen Ámirbek, jazýshy jyrshy, manasshy, aqyn Baıanǵalı Álimjan, aqyn, ǵalym Ońaıgúl Turjan, tarıhshy qalamger Tursynhan Zákónuly aqyn shyǵarmashylyǵy týraly keń kósilip, onlaın júzdesýdiń júgin kótergen oı-pikirlerimen bólisti.
Halqymyzda «mektep kórgen, ustaz kórgen» degen salmaqty uǵym bar. Belgili bir bıikke shyqqan, el ishinde tanylǵan adamdardyń mektebi men ustazynyń da baǵasy asqaqtaı bermek. Bul turǵyda aqyndy stýdent kezinen beri biletin Kópen Ámirbektiń áńgimesi oı salarlyq boldy. «Chehovtyń bir áńgimesinde mynadaı oı bar: shyǵarmashylyq lázzattyń dámin tatqan adamǵa basqa rahattyń qajeti joq». Men Nesipbek shyǵarmashylyq eńbektiń lázzatyn tatqan adam dep aıtar em. Muqaǵalı aqyn oǵan batany tekten tekke bergen joq. Sózine qaraı berdi. Muzafar Álimbaev, Tumanbaı Moldaǵalıev, Aqseleý Seıdimbek syndy iriler munyń ustazdary boldy. Nesipbektiń tynymsyz izdenisi, keýdesine qonǵan óleń-jyrdy baptaı bilýi ony bıikke kóterdi. Onyń óleńderine qazaqtyń tynys-tirshiligi, salt-dástúri túgel kóship alǵandaı áser beredi», dedi ol.
Baıanǵalı Álimjan bolsa aqynnyń «Úzilmeńder, úndister», «Bassúıekter» poemalary týraly jeke pikirin aıtty. Sol poemalardy jazǵan jas keziniń ózinde-aq onyń aqyndyq kemeline kelip qoıǵanyn tilge tıek etti. «Úzilmeńder, úndister» poemasynda úndisterdiń kósemi týraly aıtqan sııaqty bolǵanymen, shyn máninde Alashtyń azamattaryn, qazaqtyń taǵdyryn aıtty. Aqynnyń azamattyǵyn sol kezde kórdik. Qazaq poezııasynyń báıteregine aınalǵan aqyn dep bilemiz, dedi jyrshy.
Onlaın júzdesýde aqyn óz óleńderin oqydy. Ásirese «Kinálaı kórme» óleńindegi «Kúlimdep turyp kúnderdi qarsy alamyn, Sezbegen bolam taǵdyrdyń salqyn qabaǵyn. Arnasy tereń, aǵyny qatty ózendeı, Aǵady týlap, barady zýlap zamanym», deıtin joldar ózimizge qatty áser etti.
