Jańaózen qalasynda, Beıneý, Qaraqııa, Túpqaraǵan aýdandarynda, Shetpe, Boranqul, Jetibaı aýyldarynda, sondaı-aq oblystyq juqpaly balalar aýrýhanasynda ottekti gazdandyrý jumystary atqaryldy. Mańǵystaýda salynyp jatqan modýldi stasıonar men oblystyq aýrýhana ǵımaratynda da atalǵan joba júzege asyrylady.
Jýyrda Qaraqııa aýdanynyń Quryq aýylynda ottekti gazdandyrý stansasy boı kótergen bolatyn. Qaraqııa aýdandyq ortalyq aýrýhana dırektory Gúlshara Begnııazovanyń aıtýynsha, merdiger mekeme aýrýhana janynan boı kótergen ottekti gazdandyrý stansasynyń qurylysyn on kúnde aıaqtady. Munda 5 bólimshe bar jáne ár tósek-orynǵa ottegi jetkizý qamtamasyz etildi. Onyń ishinde terapııa bólimshesine – 14, hırýrgııa bólimshesine – 8, balalarǵa arnalǵan bólimshege – 8, áıelderdi bosandyrý bólimshesine – 8, juqpaly aýrýlar bólimshesine 12 dana ottegi jetkizý nysandary jasaldy. Sonymen qatar Jetibaı aýyldyq aýrýhanasynyń janynan da osyndaı ottekti-gazdandyrý stansasynyń qurylysy bastaldy. Oblystyq densaýlyq saqtaý basqarmasynan bólingen qarajat esebinen salynǵan bul stansa indetke shaldyqqan, tynys alýy qıyndaǵan naýqastardy emdeýde alatyn orny erekshe bolmaq, – deıdi G.Begnııazova.
Árbir tynys alýy qıyndaǵan naýqasty tósek-orynnyń janynan qabyrǵaǵa ornatylǵan apparatqa tikeleı qosý arqyly onyń ómirine arasha bolýǵa múmkindik bar. Ottekti gazdandyrý baǵytyndaǵy jumystar qıyn jaǵdaıda aýadan taryqpaýǵa múmkindik beredi dep oılaımyz.
Mańǵystaý oblysy
