Ordabasy APB kezekshi bólimine jergilikti turǵyn aǵasynyń “Mazda-626” avtokóligimen jumystan shyǵyp, áli kúnge deıin úıge qaıtyp kelmegeni týraly aryzdanǵan. Iz-tússiz joǵalǵan adamdy izdeý sharalary barysynda joǵalǵan adamnyń avtokóligi Shymkent qalasynyń shetinen tabylǵan. Keıinnen polıseıler júrgizýshiniń órtengen máıitin Ordabasy aýdany Shubarsý aýylynyń mańynan tapty.
Aýyr qylmysty ashý maqsatynda krımınaldyq polısııa men tergeýdiń tájirıbeli qyzmetkerlerinen turatyn jedel-tergeý toby quryldy. Jedel ýákilder qylmys ornyn muqııat tekserip, óltirilgen adamnyń tanystaryn, olarmen qarym-qatynasy men ómir saltyn zertteıdi. Jaqyn mańdaǵy aýmaqtardy aralap, kýágerlermen suhbattasyp, qajetti aqparattardy jınaqtady.
Bir aptadan keıin jedel-izdestirý is-sharalarynyń nátıjesinde Túrkistan oblysynyń PD krımınaldyq polısııa qyzmetkerleri, Ordabasy APB jáne “Búrkit” arnaıy jasaǵymen birge ishindegi adamdardyń osy qylmysqa qatysy bar degen kúdikpen Jambyl oblysynan kele jatqan “VAZ” avtokóligin ustady.
Olar buryn birneshe ret sottalǵan Túrkistan oblysy men Shymkent qalasynyń turǵyndary bolyp shyqty. Tórteýi de jas jigitter. Tergeý barysynda kúdiktilerdiń ekeýi Shymkent qalasy kósheleriniń birinde jábirlenýshiniń kóligin toqtatyp, belgili bir mekenjaıǵa aparyp tastaýdy suraǵany, dittegen mekenjaıǵa kelgennen keıin qaskúnemderdiń júrgizýshige paıdakúnemdik maqsatta shabýyl jasap, tunshyqtyryp, onyń uıaly telefonyn alyp ketkeni, al máıitti dalaǵa shyǵaryp órtegeni anyqtaldy.
Qaskúnemder bul qylmysymen toqtap qalmaı, taǵy eki seriktesimen birge Ordabasy aýdanyndaǵy tas jolda “VAZ” avtokóliginiń júrgizýshisine shabýyl jasap, 45 myń teńgelik barsetkany kúshpen tartyp alǵan.
Qazirgi ýaqytta atalǵan faktiler boıynsha QR QK-niń 99-baby (Adam óltirý) jáne 191-baby (Tonaý) boıynsha sotqa deıingi tergeý amaldary júrgizilýde. Kúdiktiler qamaýǵa alyndy. Polısııa qyzmetkerleri ustalǵandardyń basqa da osyndaı qylmystarǵa qatysy bar-joǵyn anyqtap jatyr.
