Aımaqtar • 20 Qazan, 2020

Qaraǵandy oblysynda qysqy kezeńge daıyndyq bastaldy

14 ret kórsetildi

Tótenshe jaǵdaılardyń aldyn alý jáne joıý jónindegi komıssııanyń onlaın rejıminde ótken otyrysynda qysqy kezeńge daıyndyq talqylandy, dep habarlaıdy Egemen.kz ákimdiktiń baspasóz qyzmetine silteme jasap.

Qar qursaýynda jıi qalatyn jol ýchaskeleri kúsheıtilgen baqylaýǵa alynady. Jol tehnıkasyn daıyndaý erekshe nazarda. Turmystyq órtterdiń aldyn alýdy kúsheıtý qajet.

"Adamdardyń qaýipsizdigi men ómiri birinshi orynda turǵanyn bárimiz este ustaýymyz kerek. Qys mezgilindegi kez kelgen TJ saldary aýqymdy bolýy múmkin. Qorǵaý dárejesi tek TJD ǵana emes, barlyq qyzmetterdiń -  ákimdikterdiń, jol qyzmetteriniń, ónerkásiptik kásiporyndardyń jáne t.b. daıyndyǵyna tikeleı baılanysty", dep atap ótti oblys ákimi Jeńis Qasymbek.

О́ńir basshysy jylytý maýsymynyń qaýipsiz ótýine, avtojoldardy qysqy mezgilde qadaǵalaýǵa baılanysty birqatar tapsyrmalar berdi.

Qaraǵandy oblysy TJD bastyǵynyń orynbasary Murat Qatpanovtyń aıtýynsha, oblys boıynsha qardyń jaýý deńgeıine táýeldi avtojoldardyń uzyndyǵy 714 shaqyrymdy quraıtyn 525 ýchaskesi kúsheıtilgen baqylaýǵa alynady. Respýblıkalyq jáne oblystyq mańyzy bar avtojoldarda zardap shekkenderge kómek kórsetý úshin 28 jylytý pýnkti uıymdastyrylady.

Qysqy kezeńde azamattyq qorǵaý organdarynyń kúshterin jumyldyrý josparlanýda - bul 3 myńnan astam adam jáne 1 200 birlik tehnıka. Adamdardy evakýasııalaý jáne qutqarý jaǵdaılarynda jol talǵamaıtyn kólikter men vahtalyq avtomobılder bar.

Qysqy kezeńdegi problemalardyń biri turǵyn úı sektoryndaǵy órtter jáne peshpen jylytý aqaýlaryna baılanysty ýly gazben ýlaný bolyp tabylady. Oblys ákimi turǵyndarǵa órt qaýipsizdigi erejelerin keńinen túsindirýdi, birlesken reıdter men aýlalardy aralaýdy jalǵastyrýdy tapsyrdy. Áleýmettik qorǵalatyn sanattaǵy adamdarǵa ýly gaz datchıkterin ornatýmen barynsha kómektesý qajet.

Jeńis Qasymbek sondaı-aq órtke qarsy erikti quralymdardy jabdyqtaý boıynsha tapsyrma berdi. Aýdandyq ákimdikter qajetti qural-jabdyqtar satyp alýǵa qarajat bólýi tıis.

TJD málimetinshe, oblys aýmaǵynda 26 tehnıkalyq jabdyqtalǵan órt sóndirý beketteri jumys isteıdi. Oblystyq bıýdjet qarajatyna bıyl 20 birlik zamanaýı órt sóndirý avtotehnıkasy satyp alyndy. Jergilikti bıýdjetterden shalǵaı eldi mekenderge bólingen 22 mobıldi keshen satyp alý qarjylandyryldy. Úsh jyl ishinde taǵy 21 órt sóndirý beketin qurý josparlanýda.

Sońǵy jańalyqtar

Vıkıngterdiń izimen

Tarıh • Keshe

Uqsas jańalyqtar