Beınebaqylaý kamerasynyń kómegimen 81 qylmystyń beti ashyldy. Beınebaqylaýshylar azamattardan kelip túsken habarlamalardy qabyldaý jáne óńdeý barysynda barlyq kúdikti áreketterdi, adamdardyń minez-qulqyn jáne beınebaqylaý kamerasyna túsken kúmándi adamdardy jedel tekseredi.
Mysaly, 12 qazanda túngi kezekshilikke túsken beınebaqylaýshy ınspektor keshki ýaqytta belgisiz azamattyń kópqabatty úılerdiń biriniń aldynda turǵan temir oryndyqty urlap, "Gazel" avtokóligine tıep jatqandyǵyn baıqaıdy.
Inspektor dereý baılanys quraly arqyly patrýl beketterine habarlama beredi. Polısııa qyzmetkerleri kameramen sholý barysynda kúdikti kóliktiń baǵytyn anyqtap, toqtatady. Osylaısha, urlyq jasaǵan 51 jastaǵy qala turǵyny ustaldy.
Qazirgi tańda memlekettik múlikti urlaǵan qala turǵynyna qatysty Qazaqstan Respýblıkasy Qylmystyq kodeksiniń 188-babynyń 2-bóligimen (Urlyq) sotqa deıingi tergep tekserý amaldary bastalyp, oqıǵanyń mán-jaılary anyqtalyp jatyr.
Budan bólek, beınebaqylaý arqyly kúdik týdyratyn azamattar tekserilip, 4 sýyq qarý anyqtalǵan.
Jyl basynan kameralar kómegimen barlyǵy 12 myńnan astam ákimshilik quqyq buzýshylyq anyqtalyp, 10 myńnan astam jol qozǵalysy erejelerin buzý deregi anyqtaldy.
