Jańa oqý jylynan bastalǵan joba barysynda spıkerler – Zııatkerlik mektep muǵalimderi bir aı boıy óz áriptesterine onlaın-platformalar, paıdaly veb-saıttar, laıfhaktar men utymdy sheshimderdi tanystyryp, olardy sabaqta tıimdi qoldaný joldaryn kórsetti. Microsoft Teams alańynda "MIRO, PADLET, LINOIT vırtýaldy taqtalarymen qyzyqty onlaın sabaq", "Oqytýda EDMODO platformasyn qoldaný múmkindikteri, "SOCRATIVE qosymshasy kómegimen baǵalaý jáne keri baılanys ádisteri" "MOZAIC EDUCATION arqyly 3D prezentasııa daıyndaý" jáne taǵy da basqa taqyryptyq ataýmen vebınarlar serııasy uıymdastyryldy. "Nazarbaev Zııatkerlik mektepteri" derbes bilim berý uıymynyń Pedagogıkalyq sheberlik Ortalyǵy trenerleri joba boıy spıkerlerge keri baılanys berip, pikirlerin aıtyp otyrdy.
"Búginde bilim salasyndaǵy ózgerister óte jedel ózgeredi. Vırtýaldy synyp, mobıldi oqytý, EdTech, elektrondy baǵalaý, jasandy ıntellektti qoldanatyn ıntellektýaldy oqytý júıeleri – bul termınderdiń barlyǵy jańa zaman muǵalimine tańsyq emes. Sıfrly quraldar pedagogter úshin oqý prosesin tıimdi uıymdastyrý jáne oqýshylardyń boıynda HHI ǵasyr daǵdylaryn damytýdyń zamanaýı ádisine aınalyp otyr", deıdi mektep dırektory orynbasary Gúlnár Dosqazıeva.
Joba aıasynda Oral qalasyndaǵy fızıka-matematıka baǵytyndaǵy Nazarbaev Zııatkerlik mektebiniń qazaq tili men ádebıeti páninen ekspert muǵalim Jansáýle Maqsutova mını-oqýlyq qurastyrýǵa negizdelgen Bookcreator.com servısin usyndy. Atalǵan servıs arqyly onlaın formatta ózindik jumystardy ne úı tapsyrmasyn oryndatý oqýshylardyń pánge qyzyǵýshylyǵyn arttyrady. Oqýshylar shaǵyn jobalyq jumysty, ózindik zertteý jumystary nátıjesinde jınaqtalǵan aqparattardy kitapsha etip jasaýdy úırenedi. Qosymsha kómegimen qurastyrylǵan shaǵyn kitapqa tek mátin túrindegi aqparat qana emes, aýdıojazbalar, beınematerıaldar, daıyn prezentasııalardy engizýge bolady. Tipti nusqaýlyqty óz daýysyńyzben jazýǵa múmkindik bar. Qalasańyz, beıneńizdi túsirip te sala alasyz. Oqýshy servıste sýret te sala alady, bul óz kezeginde oqýshylardy shyǵarmashylyqqa baýlıdy.
"Ádistemelik laıfhak: Sıfrly gaıd" jobasyn iske asyrý nátıjeleri boıynsha Oral qalasyndaǵy fızıka-matematıka baǵytyndaǵy Nazarbaev Zııatkerlik mektebi oblys muǵalimderine arnalǵan sıfrly forým uıymdastyrýdy josparlap otyr.
Batys Qazaqstan oblysy
