Solardyń biri – úshinshi top múgedegi Uldaı Temirbekova. Burynǵy balabaqsha tárbıeshisi kóziniń kórýi nasharlaǵan soń jumysyn aýystyrýǵa sheshim qabyldap, "Atameken" kásipkerlik palatasynyń Hromtaý aýdandyq fılıalynda oqyp, sertıfıkat alǵan. Sodan jeke kásipker retinde tirkelgen soń 2018 jyldyń jeltoqsan aıynda "Eńbek" baǵdarlamasy boıynsha "Damý" qorynan 6 mıllıon teńge nesıe alyp, kondıter sehyn ashýǵa kirisedi.
"Hromtaý qalasyndaǵy kóp qabatty úıdiń birinshi qabatynan ıesiz qalǵan shaǵyn oryndy ázer taýyp, 4 mıllıon teńgege satyp aldym. Biraq qujaty durys bolmaǵandyqtan, ony retteýge, kútimsiz ǵımarat ishin jóndeýge kóp ýaqytym ketti. Jaqyndarym da kómektesti. Sóıtip, osy oryndy retke keltirgen soń tátti taǵamdar pisiretin pesh jabdyqtaryn aldyrdym. Birte-birte tapsyrystar qabyldap, jumysymdy keńeıttim. Qazir úsh adamdy jumyspen qamtyp otyrmyn", deıdi Uldaı Temirbekova.
Sol sııaqty tórt balanyń anasy Rysjan Kúletenova "Bıznes-bastaý" baǵdarlamasy boıynsha kásipkerlik negizderine oqyp, 550 myń teńge qaıtarymsyz grantqa qol jetkizgen. Jas ana osy qarjyǵa birden shashtaraz quraldaryn satyp alyp, jumysqa kirisedi. Ol hromtaýlyq kóp balaly analarmen birlese otyryp, oryndy jalǵa alyp, sán salonyn ashady. Bir jyldyń ishinde sheberligin shyńdaǵan Rysjan qazir tájirıbeli shashtarazshy. Onyń aıtýynsha, jumyssyz kelinshekterdiń eń basty máselesi –ishtegi úreı men táýekelge bara almaýshylyq. Adam óz boıyndaǵy qorqynyshyn jeńip, alǵa umtylǵanda ǵana maqsatyna jetedi deıdi ol.
Qylmystyq jazasyn ótep kelgen hromtaýlyq jas jigit Aleksandr Ivashenko jaramsyz temir-tersekterdi qaıta jóndep, túrli turmystyq buıymdar jasap shyǵarýdy qolǵa alǵan. Ol bul kásipti túrmedegi kásiptik baǵdar berý kýrstarynda oqyp úırengen. Qazir ol jurttyń jaramsyz bolyp qalǵan temir-tersekterin jınap, qaqpa, qorshaý jasaıdy. Tapsyrys kóbeıgen soń hromtaýlyq bir turǵyndy jumysqa alǵan. Biraq sonda da úlgere almaı jatyr. Aleksandr bolashaqta aǵashtan túrli turmystyq buıymdar jasaýdy qolǵa almaqshy.
Sondaı-aq aýdanda tigin sehtary kóbeıip keledi. Máselen, Qudyqsaı aýyldyq okrýgine qarasty "Nur" sharýa qojalyǵy sıgeı tuqymdy qoılar ósirip, onyń júnderin óńdep, kórpe tigip satýǵa shyǵaryp otyr.
Hromtaý aýdandyq jumyspen qamtý bóliminiń basshysy Ulan Janalınniń aıtýynsha, 2020 jyly "Eńbek" baǵdarlamasy boıynsha az qamtylǵan, kóp balaly 90 hromtaýlyq turǵyn qaıtarymsyz grantqa qol jetkizse, 71 adam "Eńbek" baǵdarlamasymen jyldyq mólsherlemesi 6 paıyzdyq nesıe alǵan. Qaıtarymsyz grant alǵan aýyldyq okrýg turǵyndary osy qarjyny jol boıynda naýbaıhanalar ashýǵa, qus ósirýge, qoı-eshki satyp alýǵa jumsaǵan. "Qujattardy tezirek rásimdeýge jumyspen qamtý bóliminiń qyzmetkerleri aralassa, sharýa tez sheshiledi. Biz kóbine kásipkerlikpen aınalysqysy keletin kóp balaly ananyń anyqtamalardy elektrondyq júıede alýyna kómektesemiz. Bul jerde eń bastysy –kásip bastaǵysy kelgen jumyssyz azamattyń moınynda nesıe qaryzdary bolmaýy kerek. Sóıtip, bir aıdyń ishinde jeńildetilgen nesıe nemese qaıtarymsyz grant alýyna tezirek yqpal etemiz", deıdi Ulan Janalın.
Aqtóbe oblysy
