Baqylaýda tur

Qala jáne aýdan ákimdikteriniń bergen málimetine sáıkes, osy kúni óńirde 10 myń tonna ónim qory bar. Osy jyldyń qańtar-qyrkúıek aılarynda oblys boıynsha 94,4 mlrd teńgeniń ónimi óndirilip, ótken jylmen salystyrǵanda ósim edáýir artty. Jalpy somasy 35,4 mlrd teńgege jetken tamaq ónimderin óńdeý salasynda da kórsetkish ótken jyldyń osy kezeńimen salystyrǵanda biraz ilgerilegen.

Aımaq turǵyndaryn azyq-túlikpen jetkilikti qamtamasyz etý maqsatynda oblys boıynsha áleýmettik mańyzy bar ónimder qoryna monıtorıng jasalyp otyrady.

Jasalǵan monıtorıng málime­tinshe, óńirde osy kúni 1303,3 tonna birinshi sortty un, 385,3 tonna kúrish, 114,7 tonna makaron men 692,1 tonna kartop, 499 tonna pııaz, 200 tonna sábiz, 12,5 tonna ósimdik maıy bar. Sıyr jáne taýyq eti, qaraqumyq jar­masy, qant, sút, jumyrtqadan da tap­shylyq baıqalmaıdy.

Bul ónimder oblys ortalyǵynda ornalasqan 29 áleýmettik dúken, 2 áleýmettik market pen «Optomarket Qyzylorda», «Al-Asad», «Ajar», «Mıras», «Anvar» saýda úılerindegi áleýmettik sóreler arqyly satylýda. Onda kartop pen sábiz – 100, nan – 55, qyryqqabat – 60, pııaz – 70, birinshi sortty un – 127, sıyr eti – 1600, taýyq eti – 790, al jumyrtqa – 24 teńgeden satylýy tıis. Basqa ónimderdiń de ba­ǵasy belgilengen.

Bir-eki áleýmettik dúkendi aralap shyqtyq. Belgilengen baǵadan asyryp satqandardy kezdestirmedik, bazar narqynan tómen bolǵasyn munda alýshy da kóp eken. Oblystyq bıýdjetten taǵy osyndaı 5 áleýmettik dúkenniń qurylysyna qarajat bóli­nipti. Oblystyq turaqtandyrý qor­yn toltyrýǵa jyl basynan beri jer­gilikti bıýdjetten 834,9 mln teńge bó­linip, oǵan 4,1 myń tonna ónim satyp alynǵan.

Sonymen qatar 19 túrli áleýmettik mańyzy bar azyq-túlik taýarlary baǵasyn turaqtandyrý maqsatynda bekitilgen kestege 26 qyrkúıekten bas­tap apta saıyn oblys ortalyǵynda aýyl sharýashylyǵy ónimderiniń jár­meńkesi ótkizilýde. Aıǵa jýyq ýaqyt ishinde osy jármeńkelerde jalpy quny 399,1 mln teńge bolatyn 2465 tonna ónim saýdalandy.

Budan bólek Qala kúni merekesi aıasynda oblys ortalyǵyndaǵy áleý­mettik jaǵynan az qamtylǵan 700 otbasyna qajetti azyq-túlik jetkizildi.

QYZYLORDA