Keshe Q.Toqaev Ujymdyq qaýipsizdik sharty uıymy Parlamenttik Assambleıasynyń (UQShU PA) otyrysyna qatysty.
Sol kúni UQShU Parlamenttik Assambleıasynyń toǵyzynshy otyrysy boldy. Sharanyń kún tártibine uıymdastyrý, zań jobalary jáne erejeler ázirleý sıpatyndaǵy máseleler kirdi. Atap aıtqanda, daǵdarysty jaǵdaılarda áreket jasaý; mamandar daıarlaý jáne bilimin jetildirý; tehnologııalyq terrorızmge qarsy is-qımyldy qamtamasyz etý; esirtki, psıhotroptyq zattar jáne prekýrsorlardyń aınalymyn baqylaý; sybaılas jemqorlyqqa qarsy is-qımyldy normatıvtik-quqyqtyq turǵyda qamtamasyz etý baǵytynda UQShU-ǵa múshe memleketterdiń zańnamasyn úılestirý boıynsha qujattar qabyldandy.
Otyrysta «Zańdy tulǵalardyń jáne (nemese) onyń aktıvterin zańsyz ıelený jáne basqarýǵa qarsy is-qımyl týraly» úlgi retindegi zań jobasy qaraldy. Sondaı-aq, UQShU-ǵa múshe memleketterdiń ulttyq zańnamalaryn eńbek mıgranttaryn zeınetaqymen qamtamasyz etý jáne adam saýdasynyń túrli áreketterine qatysty bóligine jetildirý jónindegi usynymdar da qabyldandy.
Q.Toqaevtyń Reseıdiń Federaldyq Jınalysy Federasııa Keńesiniń Tóraǵasy Valentına Matvıenkomen kezdesýinde Qazaqstan men Reseıdiń parlamentaralyq yntymaqtastyǵynyń mańyzdy máseleleri talqylandy. Q.Toqaev áriptesin Qazaqstan Parlamenti qabyldaǵan, elimizdiń jetistikteri týraly aýqymdy qujat mazmundalǵan Qazaqstan Respýblıkasy Táýelsizdiginiń 25 jyldyǵy Deklarasııasymen tanystyrdy. Tóraǵa atap ótkendeı, Parlament depýtattary Elordada «Táýelsiz Qazaqstan» monýmentin ornatý, elimizdiń Konstıtýsııasynda Tuńǵysh Prezıdent – Elbasy Nursultan Nazarbaevtyń jańa memleket qurýdaǵy qomaqty úlesin atap ótý, Elorda jáne elimizdegi basqa da mańyzdy nysandarda Memleket basshysynyń esimin kórsetý týraly usynys aıtty.
Q.Toqaev V.Matvıenkonyń bıylǵy mamyrda Qazaqstanǵa sapary jemisti bolǵanyn jáne onyń Senatta sóz sóılegenin atap ótti. Qazaqstan Senatynyń Tóraǵasy, sondaı-aq Astanada ótken «Dinder terrorızmge qarsy» halyqaralyq konferensııaǵa qatysqany úshin reseılik parlamentshilerge alǵys aıtty. Júzdesý barysynda 2016 jylǵy 4 qazanda eki memleket basshylarynyń qatysýymen Astanada ótken Qazaqstan men Reseıdiń XIII aımaqaralyq yntymaqtastyq forýmynda qabyldanǵan sheshimderdi iske asyrýǵa da erekshe nazar aýdaryldy.
Sankt-Peterbýrgte Q.Toqaev Pákistan Islam Respýblıkasy Ulttyq Assambleıasynyń Tóraǵasy Sardar Aııaz Sadıkpen kezdesti. Tóraǵalar Qazaqstan men Pákistannyń parlamentaralyq dıalogyn údetý týraly ýaǵdalasty. Júzdesý barysynda eki jaqtyń halyqaralyq terrorızmge qarsy is-qımyly jónindegi tıimdi qurylymdardy qalyptastyrýdyń keleshegi týraly pikir almasty.
Depýtattar Álı Bektaev pen Mıhaıl Bortnık UQShU Parlamenttik Assambleıasynyń áleýmettik-ekonomıkalyq jáne quqyqtyq, sondaı-aq saıası máseleler jáne halyqaralyq yntymaqtastyq jónindegi turaqty komıssııalarynyń otyrystaryna qatysty. Senatorlar Sergeı Plotnıkov, Serik Bekturǵanov, Serik Jaqsybekov, Jeńis Nurǵalıev jáne Vladımır Redkokashın TMD Parlamentaralyq Assambleıasynyń memleket qurylysy men jergilikti ózin-ózi basqarý tájirıbesin zerdeleý jónindegi, agrarlyq saıasat, tabıǵı resýrstar jáne ekologııa jónindegi, ǵylym jáne bilim berý jónindegi Turaqty komıssııalarynyń otyrysyna qatysty.
Keshe keshkisin qazaqtyń kórnekti qoǵam jáne memleket qaıratkeri, Reseı ımperııasy Tuńǵysh Memlekettik Dýmasynyń depýtaty Álıhan Bókeıhanovtyń bıýstin TMD Parlamentaralyq Assambleıasyna tartý etý saltanaty boldy.
Bıýst Reseıdiń alǵashqy Dýmasynyń otyrysy ótken Tavrııa saraıyndaǵy TMD Parlamentaralyq Assambleıasynyń shtab-páterine qoıyldy. Skýlptýrany jasaǵan О́mirzaq Shańov.
Saltanatty asha kelip, Senat Tóraǵasy Qasym-Jomart Toqaev «Qazaqstan Táýelsizdiginiń 25 jyldyǵy men HH ǵasyrdyń basyndaǵy kórnekti qazaq zııalysynyń týǵanyna 150 jyl tolǵany atalyp ótetin jyly bıýstiniń Sankt-Peterbýrgtegi Tavrııa saraıyna ornatylýy erekshe maǵynasy bar shara ekenin atap ótti. Tóraǵa osy mereıtoıǵa baılanysty estelik sharalar IýNESKO aıasynda ótip otyrǵanyn eske saldy.
«Álıhan Bókeıhanovtyń qyzmeti bıik adamgershiliktiń, ulttyq jáne azamattyq paryzyna kirshiksiz adaldyq pen shynaıy berilýdiń úlgisi bolyp tabylady», – dep atap ótti Senat Tóraǵasy.
Saltanat barysynda Qazaqstan Parlamenti Májilisiniń Tóraǵasy Nurlan Nyǵmatýlın, TMD PAA Keńesiniń Tóraǵasy, Reseı Federasııa Keńesiniń Tóraıymy Valentına Matvıenko, Reseı Memlekettik Dýmasynyń Tóraǵasy Vıacheslav Volodın, Ázerbaıjan Mıllı Medjlısiniń Tóraǵasy Oktaı Asadov sóz sóıledi.
Saltanatty sharany aıaqtaı kelip Q.Toqaev, Á.Bókeıhanovtyń bıýsti Reseı, Qazaqstan jáne Dostastyq elderiniń arasyndaǵy tarıhı baılanystar ýaqyty men dostyq qarym-qatynastardyń belgisine aınalatynyna nyq senim bildirdi.
Sondaı-aq, keshe TMD PAA Keńesiniń otyrysy ótti.
