"Bıyl aıtarlyqtaı ózgerister kúshine endi. Biz stıpendııany taǵaıyndaý úrdisin avtomattandyrý men ashyqtyqty arttyrý úshin barlyq normatıvtik quqyqtyq qujatty pysyqtadyq. Memleket basshysy ótken jyly osyndaı mindet qoıdy. Qasym-Jomart Kemeluly bul baǵdarlamany odan ári damytýǵa jáne ony qoldaýǵa erekshe kóńil bóledi", dep atap ótti vedomstvo basshysy.
Mınıstrdiń aıtýynsha, "Bolashaq" baǵdarlamasynyń tereń transformasııasy júrgizilip, halyqaralyq stıpendııaǵa úmitkerlerdi irikteýdiń jańa erejeleri bekitildi. Kvotalyq sanattar joıylyp, bul óz kezeginde konkýrstyq irikteý barysynda barlyq úmitker úshin teń múmkindikter beredi.
Usynylatyn sheteldik jetekshi joǵary oqý oryndary tizimindegi oqý ornynan shaqyrtýdyń bolýy – stıpendııa taǵaıyndaý boıynsha konkýrsqa qatysý úshin qoıylatyn negizgi talap. Aýyldyq eldi mekenderden qatysyp jatqan úmitkerler úshin Qazaqstan Respýblıkasy aýmaǵynda 6 aıǵa deıingi merzimdi qamtıtyn tildik kýrstar saqtalady.
"Tek aýyldyq jerlerden kelgen úmitkerlerdiń sanaty úshin tildik kýrstardy saqtaý esebinen biz jyl saıyn 1,3 mlrd teńgeden astam qarajat únemdeımiz. Sondaı-aq irikteý kezeńderiniń sanyn 6-dan 3-ke deıin azaıtyp, jalpy qujattardy qabyldaý prosesin sıfrlandyrdyq. Úmitkerlerdi irikteý úrdisiniń barlyq kezeńi vıdeo quraldarynyń kómegimen tirkeledi. Biz tolyq ashyqtyqty qamtamasyz ettik jáne jańa syn-tegeýrinderge ıkemdi áreket etetin bolamyz", dedi Ashat Aımaǵambetov.
"Bolashaq" baǵdarlamasyn iske asyrý bastalǵannan beri 13 978 stıpendııa taǵaıyndalǵan, onyń ishinde 1994 jyldan 2004 jylǵa deıin – 785 stıpendııa, 2005 jyldan 2020 jylǵa deıin – 13193 stıpendııa. 13193 stıpendııanyń 3379-y bakalavrıat boıynsha, 7231 – magıstratýra, 35 – aspırantýra, 87 – klınıkalyq ordınatýra, 347 – doktorantýra, 2114 – taǵylymdama baǵdarlamasy boıynsha taǵaıyndaldy.
