Aımaqtar • 11 Qarasha, 2020

Terektidegi 10 aýylǵa gaz jetedi

56 ret kórsetildi

Batys Qazaqstan oblysyndaǵy Terekti aýdanynyń Dolın, Tóńkeris jáne Qonyssaı aýyldaryna kógildir otyn jetti. Jyl sońyna deıin taǵy 7 aýyl tabıǵı gaz qubyryna jalǵanbaq, dep habarlaıdy Egemen.kz.

Bıylǵy jyldyń basynda oblys ákimimen eseptik kezdesýde Dolın aýylynyń turǵyndary Ǵalı Esqalıevke eldimekenge kógildir otyn jelisin jetkizý jónindegi ótinishin aıtqan bolatyn. Shynynda da oblys ortalyǵymen irgeles ornalasqan, Qarashyǵanaqqa da jaqyn turǵan Terekti aýdanyndaǵy 48 eldimekenniń 15-inde búginge deıin gaz tartylmaǵan edi. Bıyl sol olqylyq joıylady.

"Bıyl Terekti aýdanynyń 10 eldimekenge kógildir otyn keledi. Buǵan deıin aýdan halqynyń tabıǵı gazben qamtylýy 89 paıyz bolsa, endi ol kórsetkish 96 paıyzdan asady. Bul óte qýanyshty jańalyq. Gazdyń kelýimen kóptegen turmystyq qıyndyq sheshiledi. Bul memleketimizdiń negizgi saıasaty, halyq turmysynyń sapasyn arttyrý úshin júıeli jumys júrgizip jatyrmyz. Barshańyzdy osy qýanyshpen quttyqtaımyn", dedi óńir basshysy Ǵalı Esqalıev Dolın aýylyndaǵy saltanatty sharada.

14

Shynynda da qańtar aıynda oblys basshysyna aýyl turǵyndarynyń ótinishin jetkizgen Aleksandra Mazýr bul tilektiń tez arada júzege asaryna senbegenin aıtady.

"Talaı jyldan beri gazdyń kelýin kúttik. Aǵash tapshy, kómir qymbat. Oblys ákimi jyl sońyna deıin gaz keledi dep ýáde berse de qashan qolymyz jetkenshe taǵat tappadyq. Mine, búgin ýáde oryndaldy, nátıjesin kórip otyrmyz", deıdi Dolın aýylynyń turǵyny Aleksandra Mazýr. Aýyl aqsaqaly Qambar Baıgelov te mashaqaty kóp kómir men aǵash otyn daıyndaýdan qutylǵanyna razy.

25

Aıta keteıik, Dolın, Tóńkeris jáne Qonyssaı aýyldaryn gazdandyrý jobasynyń quny 337,237 mln teńgege baǵalanǵan bolatyn. Jobany merdiger "Batysgazstroı" mekemesi 298,9 mln teńgege atqaryp shyqty. 2020 jyldyń mamyr aıynda bastalǵan jumys barysynda uzyndyǵy 55,3 km gaz qubyry tartylyp, aýyldaǵy 10 áleýmettik nysan kógildir otynmen jylytylatyn boldy. 150 turǵyn úı de gazǵa jalǵanady. Qazirdiń ózinde munda 78 turǵyn úı tabıǵı gazdy kirgizip alǵan.

Bir táýiri, atalǵan eldimekenderdi gazdandyrý jumysy biraz adamǵa qosymsha tabys ta boldy. Máselen, osy úsh aýylǵa gaz qubyryn tartý kezinde "Jumyspen qamtý jol kartasy" baǵdarlamasy aıasynda 101 adam ýaqytsha jumysqa tartylǵan eken. Munyń ishinde 40 adam jergilikti jumyspen qamtý ortalyǵy arqyly qamtylǵan. Olar orta eseppen aıyna 85 myń teńge jalaqy alǵan eken. Buǵan qosa joǵarydaǵy aýyldardy gazdandyrý nátıjesinde jańadan turaqty 40 jumys orny ashylǵan.

25

Dolın aýyly – arheologııalyq qazba jumystary nátıjesinde tabylǵan áıgili Taqsaı hanshaıymynyń otany. Qazaqstannyń Jalpyulttyq qasıetti nysandary tizimine kirgen saq kóseminiń altynmen aptalǵan qabir-obasy 2012 jyly tabylǵan bolatyn. Oral-Aqsaı kúre jolynyń boıynda ornalasqan, tabıǵaty kórkem eldimekenniń bolashaǵy zor. Aýyldaǵy orta mektep ǵımaraty da bıyl kúrdeli jóndeýden ótip, túgel jańartylǵan.

"Orta mektebimizdiń ǵımaratyna memlekettik baǵdarlama sheńberinde jańartý jumysy júrgizildi. Ǵımarattyń esik-terezesi, edeni túgel jańartyldy. Jóndeý kezinde bizdiń birinshi synyptan basqa oqýshylar qashyqtan oqyǵan edi. Endi ekinshi toqsannan bastap oqýshylar jańartylǵan ǵımaratta shtattyq rejımde oqı bastaıdy. Bolashaqta irgeles aýyldyń balalaryn da qabyldaýǵa múmkindik bar. Ol úshin ınternat ashý kerek", deıdi mektep dırektory Mıras Ábýǵalıev.

P.S. Qazirgi tańda Batys Qazaqstan oblysy halqynyń 96,1%-y tabıǵı gazben qamtylǵan. Bıyl memleket qazynasynan 910 mln teńge qarastyrylyp, Terekti aýdanynyń – 10, Aqjaıyq aýdanynyń – 11 eldimekenine gaz tartý josparlanǵan bolatyn. Bul mindet júzege asqanda oblys turǵyndarynyń 96,7%-y kógildir otynnyń ıgiligin kóretin bolady.

 

Batys Qazaqstan

Sońǵy jańalyqtar

Amanatqa adaldyq

Ádebıet • Keshe

Jantórın jańalyǵy

Kıno • Keshe

Azattyq úshin arpalysqan

Tarıh • Keshe

Dıllıan Ýaıt qaharyna mindi

Kásipqoı boks • Keshe

Uqsas jańalyqtar