Karantın sharalary saldarynan bıznesi turalap qalǵan kásipkerlerge salyqtyń 2 túri birden 3%-ǵa deıin 2 jylǵa tómendetildi. Endi korporatıvter úshin 10-20% jáne jeke tabys salyǵy boıynsha 10% ornyna – kompanııalar men jeke kásipkerler 3% ǵana balama bólshek salyǵyn tóleýi kerek bolady. Sonymen qatar, pandemııa saldarynan shyǵynǵa ushyraǵan kompanııalar qosymsha qun salyǵynan jáne áleýmettik salyqtan bosatylady. Bul ózgerister aqsha aınalymynyń kólemine qaramastan barlyq kásipkerlerge ortaq bolady.
"Pandemııa kezinde erekshe zardap shekken sektorlarǵa qoldaý kórsetý úshin shaǵyn jáne orta bızneske 2 jylǵa qosylǵan qun salyǵynan jáne áleýmettik salyqtan bosatý usynylyp otyr. Sonymen qatar korporatıvtik jáne tabys salyǵyn esepteýdiń tártibi zań jobasynda senatorlarmen usylynyp otyr. Memleket basshysynyń tapsyrmasymen tabystyń 3 paıyzy kóleminde bólshek salyq rejımi engiziledi. Mundaı qadam pandemııadan zardap shekken kásipkerler úshin salyq júktemesin azaıtýǵa jáne olardyń jumysyna qoldaý kórsetýge baǵytalyp otyr", dedi Senat spıkeri Máýlen Áshimbaev Salyq kodeksine engiziletin ózgerister jaıly pikir bildire otyryp.
Senat depýtattary birneshe márte shaǵyn jáne orta bızneske qoldaýdy arnaıy salyq rejımderin qurý túrinde de, salyqtyq ákimshilendirýdi jeńildetý turǵysynan da uıymdastyrý qajettiligi týraly talqylady. Shaǵyn jáne orta bızneske qoldaý kórsetý maqsatynda Salyq kodeksine ózge de túzetýler engizildi. Depýtattar shekteýlerdiń saldarynan tabysynan aırylǵan kásipkerlerdiń qaıta qalypqa kelýi úshin birneshe aı qajet bolady degen pikirge súıenip otyr.
Sondyqtan Senat depýtattary salyq júktemesin azaıtyp qana qoımaı, bızneske memleket tarapynan basqa da qoldaý kórsetýdi qajet dep sanaıdy. Al eń kóp shyǵynǵa ushyraǵan ekonomıkalyq sektorlardyń tizimin Úkimet aıqyndaıtyn boldy.
