"JFB" baǵdarlamasyna joǵary býynnyń 50 memlekettik qyzmetshisi: vıse-mınıstrler, oblys, qala jáne aýdan ákimderiniń orynbasarlary, QR Prezıdenti Ákimshiliginiń bólim basshylary, sondaı-aq Prezıdenttik jastar kadr rezerviniń rezervısteri qatysty.
Jabylý rásimine Qazaqstan Respýblıkasy Prezıdentiniń janyndaǵy Memlekettik basqarý Akademııasynyń rektory Erlan Ábil, Nazarbaev Ýnıversıtetiniń Joǵary memlekettik saıasat mektebiniń dekany Veng Tat Hýeı, Kásibı damý ınstıtýtynyń dırektory Margarıta Qadyrova, sondaı-aq professor, Nazarbaev Ýnıversıtetiniń Joǵary memlekettik saıasat mektebiniń akademııalyq máseleler jónindegi dekanynyń orynbasary Kolın Noks qatysty.
"Barlyǵy 10 modýl, 240 oqytý sabaǵy boldy. Jattyqtyrýshylar bilim traektorııasyn, oqytý baǵyttaryn, kýrs ádistemelerin ázirleý úshin birqatar sessııalar ótkizdi. Oqytýdyń negizgi maqsaty tyńdaýshylardyń boıynda jańa formasııadaǵy basshylarǵa qajetti daǵdylardy damytý edi. Oqýdan ótken árbir tyńdaýshy qajetti bilimdi ıgerip, óz áleýeti men quzirettilikterin odan ári damyta aldy dep senemin", dedi Memlekettik basqarý Akademııasynyń rektory Erlan Ábil.
"Biz tıimdi memlekettik basqarýdyń mańyzy zor ekendigine kámil senemiz jáne qazaqstandyqtardyń ómirin jaqsartý boıynsha mıssııamyzdy júzege asyrýda ilgeri júrýimiz úshin Akademııamen ornatylǵan áriptestik aıasynda berilgen múmkindikke rızamyz. Qatysýshylar ssenarlyq josparlaýdaǵy jáne perspektıvalyq oılaýdaǵy jańa tendensııalarmen, memlekettik saıasatqa qatysty sheshimder qabyldaýda minez-qulyqtyq ınsaıttardy paıdalanýmen jáne baǵdarlamalardy qurýda ınnovasııalardy engizýdiń túrli ádisterimen, memlekettik qyzmetterdi usynýmen jáne sizderdiń Qazaqstan halqyna qyzmet etýlerińizdiń tıimdiligin arttyrýǵa múmkindik beretin basqarýmen tanysty dep úmittenemiz", dedi Nazarbaev Ýnıversıtetiniń Joǵary memlekettik saıasat mektebiniń dekany Veng Tat Hýeı.
10 aptalyq kýrs barysynda tyńdaýshylar negizgi qyzmetterinen qol úzbeı, "Jahandyq kózqaras", "Tıimdi kommýnıkasııalar" jáne "Transformasııalyq kóshbasshylyq" syndy quzirettilikterdiń úsh negizgi baǵyty boıynsha áleýetterin arttyryp, bilim kókjıekterin keńeıtti. Onlaın platformalardyń keń múmkindikteri sabaqtardy strategııalyq sessııalardan, ınteraktıvti pikirtalastardan, trenıngterden bastap keıs-stadı jáne shaǵyn toptardaǵy jumystarǵa deıingi túrli formattarda ótkizýge yqpal etti.
Onlaın oqytý barysynda memlekettik qyzmetshiler basqarý tehnologııalary, saıasatty ázirleý óneri men ǵylymy, ssenarlyq josparlaý, dızaın-oılaý, emosıonaldyq ıntellekt jáne kóshbasshylyq, koýchıng jáne mentorlyq kómek, daǵdarystyq kommýnıkasııa boıynsha kýrstardan ótti.
Sabaqtardy jetekshi otandyq bıznes-jattyqtyrýshylar jáne Memlekettik basqarý Akademııasynyń koýchtary ótkizdi, olardyń arasynda QR Prezıdentiniń janyndaǵy Memlekettik basqarý Akademııasynyń rektory Erlan Ábil, CREATA konsaltıngtik kompanııasynyń dırektory Davıd Týganov, ICU Qazaqstandaǵy, Orta Azııadaǵy jáne BAÁ-degi ókildigi ortalyǵynyń basshysy, master-koých Ǵalııa Baǵdat, «Nıka» sheshendik óner ortalyǵynyń jetekshisi Merýert Júnisbek, jýrnalıst, tele- jáne radıo júrgizýshisi Mahabbat Esen, sheshendik óner jáne kommýnıkasııalar jónindegi jattyqtyrýshy Janna Ibraeva boldy. Nazarbaev Ýnıversıtetiniń Joǵary memlekettik saıasat mektebi atynan NÝ JMSM vıse-dekandary Kolın Noks pen Rıkardo Pelıso, NÝ JMSM assıstent professory Iftıkhar Lodhı, sondaı-aq Sıngapýr men Gonkongtan shaqyrylǵan professorlar: Lı Kýan Iý atyndaǵy Sıngapýr ulttyq ýnıversıtetiniń Memlekettik saıasat mektebinen kelgen Basskaran Naır jáne Edrıan Kýa, Gonkong ǵylym jáne tehnologııalar ýnıversıtetinen kelgen Donald Loý trenerler retinde qatysty.
Kýrs treneri Janna Ibraevanyń aıtýynsha, joǵary bilimdi, ómirlik jáne basqarýshylyq tájirıbesi bar memlekettik qyzmetshilerge arnalǵan jańa oqý baǵdarlamasyn ázirleý úlken eńbekti qajet etti. Ásirese, syrtqy orta qarqyndy ózgeristerge ushyrap jatqanda bul ońaı bolmady. Memleketke toptyń múshesine aınala alatyn, standartty emes jaǵdaılarda tez sheshim qabyldaı biletin, taptaýryndar sheńberinen shyǵa alatyn basshylar qajet.
"Synı oılaý, kreatıvtilik, shyǵarmashylyq qabiletter jáne qoıylǵan mindetterdi oryndaýdaǵy standartty emes, kreatıvti tásildeme bul – memlekettik reformalardy tabysty júzege asyrýdyń bir sharty", dep atap ótti trener.
Nazarbaev Ýnıversıtetiniń Joǵary memlekettik saıasat mektebiniń Akademııalyq máseleler jónindegi vıse-dekany Kolın Noks eki jarym aıǵa sozylǵan onlaın kýrs barysynda akademıkter men praktıkter arasynda akademııalyq qyzmet salasynda jańa ıdeıalardy júzege asyrýǵa jáne memlekettik sektorda halyqaralyq reformalar men ınnovasııalardy jalǵastyrýǵa yqpal etetin úshjaqty pikirtalas týyndaǵanyn atap ótti.
Úı tapsyrmalaryn oryndaý barysynda toptar bir-birin, kýrs trenerlerin de tańqaldyryp, shabyttandyrýǵa tyrysty. Onlaın oqytý barysynda tyńdaýshylar kreatıvtilik tanytyp, tavtogramma túrinde óleń jazýdan bastap, sabaq týraly óz oılaryn rep mánerinde jetkizýge deıin erekshelene aldy, onlaın is-shara sońynda bulardyń barlyǵy kýrs qonaqtary men trenerlerine kórsetildi.
Pavlodar oblysy ákiminiń orynbasary Sáken Shaıahmetov: "Barlyq uıymdastyrýshylarǵa jáne jattyqtyrýshylarǵa zor alǵysymdy bildiremin! Bul bizdiń kókjıegimizdi keńeıtýge, jańa quraldarǵa ıe bolýymyzǵa múmkindik bergen keremet joba boldy. Eń bastysy bul – bizdi laıyqty adamdar men óz Otanyn shynaıy súıetin jandar qorshap júrgendiginiń kezekti bir dáleli! Barlyǵyna sáttilik pen tabys tileımin! Bizdiń jetistikterimiz – bul bizdiń elimizdiń jetistikterine qosylǵan úles!", dep óz emosııalarymen jáne oqýdan alǵan áserimen bólisti.
Sondaı-aq, Prezıdenttik jastar kadr rezerviniń rezervısti, "QAZEXPOCONGRESS" Ulttyq kompanııasy AQ Uıymdastyrýshylyq-kadr jumysy departamentiniń dırektory Marken Ahmetov te oqýdan alǵan áserimen bólisti: "Qyzyqty ótken 10 apta barysynda biz jetekshi otandyq jáne sheteldik mamandarmen birge biregeı kýrstan óttik, bul kýrs bizdiń óz-ózimizge úńilýimizge, durys paıdalana alǵan jaǵdaıda memlekettik basqarý júıesin qaıta iske qosýǵa negiz bola alatyn sapaly ınsaıttar alýymyzǵa múmkindik berdi. Usynylǵan taqyryptardyń árqaısysy tereń zerdeleýdi qajet etetin irgeli pándi tanytatyndyqtan, egjeı-tegjeıli qarastyrýdy talap etedi. Qazirdiń ózinde biz ıgergen quraldarymyzdy ózimizdiń kúndelikti qyzmetimizde qoldanýdamyz".
Saıası qyzmetshilerge arnalǵan "Jańa formasııadaǵy basshy" oqý baǵdarlamasynyń onlaın jabylýynyń sońynda Akademııa rektory Erlan Ábil tyńdaýshylardyń keıingi eńbek qyzmetterine tabys tilep, olardyń biliktilikti arttyrý kýrstarynan ótkendikterin rastaıtyn elektrondyq sertıfıkattaryn tabys etti.
"Jańa formasııadaǵy basshy" baǵdarlamasyn alǵash ret Tuńǵysh Prezıdent Nursultan Nazarbaev óziniń 2018 jylǵy 5 qazandaǵy "Qazaqstandyqtardyń ál-aýqatynyń ósýi: tabys pen turmys sapasyn arttyrý" atty Joldaýynda jarııalaǵan edi. Elbasy NÝ JMSM-ne Memlekettik basqarý Akademııasymen birlese otyryp, saıası basqarýshylar men memlekettik qyzmetshiler úshin trenıngter ótkizýge tapsyrma berdi.
