"16 qarashadaǵy epıdemıologııalyq jaǵdaıdy baǵalaý matrısasyna sáıkes respýblıka sary aımaqta tur", dedi A. Soı. Shyǵys Qazaqstan jáne Soltústik Qazaqstan oblysy ınfeksııa taralý qaýpi joǵary qyzyl aımaqta tur.
Ortasha qaýipti sary aımaqta - Pavlodar, Aqmola, Qostanaı oblystary, Nur-Sultan jáne Almaty qalalary. Qalǵan óńir salystyrmaly túrde ınfeksııanyń taralý qaýpi tómen jasyl aımaqta.
Mınıstrdiń aıtýynsha, KVI-ge shaldyqqandar sany artqan jaǵdaıda, halyqqa sapaly jáne ýaqtyly kómek kórsetý úshin medısınalyq uıymdar 71 myń tósek-oryn daıyndap otyr. Qazir ınfeksııalyq tósek-orynnyń 21% jáne reanımasııanyń 17%-da pasıent bar.
Azamattarǵa úıde medısınalyq kómek kórsetý úshin kóshpeli mobıldi brıgadalar daıyndaldy. Mobıldi brıgadalar bıyl shildeden beri 280 myńnan astam qyzmet kórsetken.
"Shilde aıymen salystyrǵanda qazir jedel medısınalyq kómek shaqyrýshylar sany 43,8%, al KVI boıynsha - 79% tómendedi", dedi A. Soı.
Onyń aıtýynsha, KVI-men aýyratyn naýqastarǵa konsýltasııalyq kómek kórsetý úshin óńirlik jáne respýblıkalyq saraptamalyq toptar quryldy, óńirlik Call-ortalyqtardyń jáne 1406 biryńǵaı baılanys ortalyǵynyń jumysy kúsheıtildi.
