"Keshe Facebook áleýmettik jelisinde Prezıdenttiń Bozjyra qoryǵy aýmaǵynda salynatyn qonaqúıdiń qurylysyn qaıta qaraýdy tapsyrǵany jaıynda jazyp edik. Atalǵan jazba aqparat quraldary men áleýmettik jelilerde qyzý talqylanyp, túrli suraqtar qoıylyp jatyr. Sondyqtan osy máselege taǵy bir márte oralyp, qosymsha túsinikteme bergendi jón dep taptyq. Mańǵystaý oblysynda týrızmdi damytý – Úkimetke júktelgen mańyzdy mindetterdiń biri.
Búginde bul baǵytta jumystar bastalyp ketti. Bes juldyzdy qonaqúı salynyp, jaıly meımanhanalardyń tutas jelisin qurý josparlanyp otyr. Mundaı júıeli jumystar aımaqtyń týrıstik tartymdylyǵyn arttyratyny sózsiz. Jaqynda Bozjyra tabıǵı qoryǵynyń janynan qonaqúı salý jobasy usynyldy.
О́kinishke qaraı, qazirgi kezde qoryqtyń aınalasyndaǵy týrızm tabıǵatty qorǵaý sharalaryn saqtamaı, beıbereket damyp jatyr. Bul osy erekshe tabıǵat qoryǵyna orasan zııanyn tıgizýde. Prezıdent ekologııalyq týrızmdi órkenıetti jolmen damytýdy qoldaıdy. Ol úshin qajetti ınfraqurylym, eń aldymen, jaıly qonaqúıler qajet. Sondyqtan Memleket basshysy Úkimetke qonaqúı salý jobasyn qaıta qaraýdy tapsyrdy. Biraq, bul joba osymen toqtaıdy degendi bildirmeıdi", dep jazdy Prezıdenttiń baspasóz hatshysy.
Berik Ýálıdiń aıtýynsha, qoǵamdyq keńesterdiń, ekolog sarapshylardyń jáne memlekettik vedomstvolardyń oı-pikirleri eskerile otyryp, qonaqúı salýǵa arnalǵan basqa yńǵaıly jer tańdalady.
