Sarqan aýdandyq ákimdiginiń málimetine súıensek, zaýyt pasterlengen tabıǵı sút, shalap, qurt, sary maı, qaımaq, aıran men irimshiktiń birneshe túrin óndiredi.
Zaýyt dırektory Baýyrjan Qalımoldanovtyń aıtýynsha, memleket qoldaýynyń arqasynda 2008 jyly zaýyt qaıta iske qosylǵan. "Eń aldymen zaýytty talapqa sáıkes qaıta jańǵyrtýdan ótkizip, jańa qural-jabdyqtar satyp aldyq. Alǵashynda sút óniminiń 3 túrin shyǵarýdan bastasaq, qazir onyń sany on besten asty. Memleket qoldaýyn áli de sezinip kelemiz. Bıylǵy jyly sútke, sary maıǵa jáne qatty irimshikke 80 mln. teńge sýbsıdııa berildi. Sonyń arqasynda bıyl zaýytqa 17 mln. teńge turatyn kompressor satyp aldyq. Qajetti qondyrǵylar Reseı men Qytaıdan ákelindi. Taýarlarymyz óz aýdanymyzdan basqa oblystyń birneshe aýdandaryna jáne Almaty qalasyna tasymaldanady", dedi zaýyt dırektory Baýyrjan Qalımoldanov.
Kásiporyndy keńeıtýge qatysty aldaǵy josparymen bólisken B. Qalımoldanov zaýytty shıkizatpen qamtý úshin asyl tuqymdy sıyr ustaıtyn arnaıy keshen salynatynyn aıtty. Qazir sút jetkilikti kólemde jergilikti turǵyndardan jınalyp, tıisti óńdeýden ótkizilýde. Sol sııaqty aldaǵy ýaqytta tátti ıogýrt óndirý de josparda bar. Tutynýshylardyń ásirese, zaýyttyń sary maıy men Golland irimshigine degen suranysy joǵary.
Búginde zaýytta 67 adam jumys isteıdi. Bıylǵy jyly munda 12 jas maman turaqty jumysqa turǵan. Ortasha jalaqylary 100 myń teńge shamasynda.
Eske salsaq, Prezıdenttiń agroónerkásiptik keshendi damytý týraly tapsyrmasyna sáıkes Almaty oblysynda aýyl sharýashylyǵynda tórt negizgi strategııalyq maqsat belgilengen. Olar – et pen sút óndirisin arttyrý, aýyl sharýashylyǵy ónimderin óńdeý men ırrıgasııalyq júıelerdi qalpyna keltirý. О́ńirde iri qara mal basy 1,3 mıllıonnan, al qoı men eshki 4,2 mln. bastan asty. Sútti mal sharýashylyǵyn damytý maqsatynda 26 myń basqa arnalǵan 82 taýarly-sút fermasy qurylǵan. Oblys 2025 jylǵa deıin et óndirisin 500 myń tonnaǵa, sút óndirisin 900 myń tonnaǵa deıin jetkizip, aýyl sharýashylyǵy ónimderin óńdeý boıynsha 25 jobany júzege asyrýdy josparlap otyr.
