Qazaqstan • 20 Qarasha, 2020

Qorǵanys mınıstrliginiń Alqa otyrysynda jyl qorytyndysy shyǵaryldy

24 ret kórsetildi

El Prezıdenti – Qarýly Kúshterdiń Joǵarǵy Bas Qolbasshysy Qasym-Jomart Kemeluly Toqaevtyń qatysýymen Qorǵanys mınıstrliginde 19-shy qarashada ótken alqa otyrysynda 2020 jyldaǵy armııa qyzmetiniń máseleleri talqylandy.

Qorǵanys mınıstri general-leıtenant Nurlan Ermekbaev óz baıandamasynda Qarýly Kúshterdiń barlyq baǵytta damyp kele jatqanyn atap ótti.

Bárinen buryn, memlekettiń qarjy múmkindikterin eskere otyryp, armııa qurylymyna jáne jaýyngerlik daıarlyǵyna qazirgi zamanǵy qarýly qaqtyǵystar barysynda barynsha qajetti jáne qoldanyp júrgen komponentter engiziledi.

 Alǵash ret biryńǵaı keshendi strategııalyq tapsyrmalar formatynda oqý-jattyǵýlar men jattyqtyrýlar ótkizý engizildi. Áskerlerdi oqytý oryn alýy yqtımal tótenshe jaǵdaılar, túrli táýekelder kesheni men ahýaldyń kúrdelenýi aıasynda ótedi.

Áskerlerde soqqy berýdi barlaý jáne atys nusqasyn barlaýdy qoldaný pysyqtalýda. Osy maqsatta, atap aıtsaq, ushqyshsyz ushý qurylǵylarynyń, artıllerııa toptarynyń, maıdan jáne armııa avıasııalarynyń, zamanaýı radıolokasııalyq barlaý jáne basqarý quraldarynyń qajetti kúshteri men quraldarynyń ózara is-áreketi qalpyna keltirildi.

Bastapqy nazarda, Arnaıy operasııalar kúshterin damytý tur. Qazirgi kezde olardy basqarýdyń úılestirý úlgisi bar. Aldaǵy jyly operasııalyq modýlge ótý josparlanýda, onda olardyń quramynda anaǵurlym mańyzdy mindetterdi oryndaý úshin arnaıy bólimder men salalyq daıarlaý ortalyqtary qurylady.

Osylaısha, Arnaıy operasııalar kúshterin damytý kezeń-kezeńmen jáne josparly túrde iske asyrylady, sondaı-aq jyl saıyn olardy tekserý júrgiziledi.

Qazirgi kezdegi qaqtyǵystardy zerdeleý jaqynnan urys júrgizý kezindegi jeke sapany jetildirý qajettigin kórsetti. Osy maqsatta birinshi ret jaýyngerlik daıarlyq baǵdarlamasyna armııanyń taktıkalyq atysy engizildi.

Áskerı qyzmetshiler túrli ahýaldarda, ár túrli qarýdan ýaqytty shekteý jaǵdaıynda atýdy úırenýdi bastady.

Osymen bir ýaqyt aralyǵynda armııanyń qoıan-qoltyq kúresinen sabaqtar keńinen qamtyldy. Bul qyzmetke qyzyǵýshylyqty jáne ózine degen senimdilikti arttyrady.

Áskerlerge jańa qarý-jaraqtar kelip túsýde. Bıylǵy jyly áskerı tehnıkanyń 370-ten astam birligi satyp alynyp, 200-den astamy kúrdeli jóndeýden ótkizilip, jańartyldy. Qazirgi zamanǵy áýe shabýylyna qarsy qorǵanys jáne ushqyshsyz ushý qurylǵylary erekshe nazarǵa alyndy.

Qazaqstannyń Qarýly Kúshterine bıyl alǵash ret «Býk» zymyrandy-raketalyq kesheni kelip tústi. Budan ózge, elimizdiń áýe keńistigin baqylaýdy shaǵyn bıiktiktegi nysandardy aıqyndaıtyn «Rosa» radıolokasııalyq stansııalary men otandyq ónim «Nur» RLQ iske asyrady.  Áskerlerge sonymen qatar Sý-30SM ushaqtary, Mı-35 tikushaqtary, barlaý ushqyshsyz ushý qurylǵylary kelip tústi. Qozǵalystaǵy nysandardy barlaıtyn jáne batareıalyq kúresti baqylaıtyn «Platforma» radıolokasııalyq stansııasy qarý-jaraq quramyn tolyqtyrdy.

«Sandyq Armııa» qurýda jeke avtomattandyrylǵan qyzmetke kóshý, aqparattyq júıelerdi, telekommýnıkasııalyq jelilerdi jáne málimetterdi pysyqtaý ortalyqtaryn odan ári damytý ózekti bolyp otyr.

Qorǵanys mınıstrliginiń JOO-lary granttyq jáne baǵdarlamalyq-maqsattyq qarjylandyrý aıasynda, onyń ishinde robottehnıkalary men radıoelektrondyq kúres aýqymyndaǵy ǵylymı zertteýlerdi oryndaıdy.

Sybaılas jemqorlyqpen kúres jóninde júıeli sharalar qabyldanýda. Áskerı polısııa bas basqarmasynyń qurylymynda sybaılas jemqorlyqqa qarsy is-qımyl jónindegi basqarma qalpyna keltirildi. Atalǵan basqarma buzýshylyqtardyń alǵysharttaryn taldaýmen jáne olardy joıý boıynsha usynystar ázirleýmen aınalysady.

Júıeli sharalar sybaılas jemqorlyqpen quqyqbuzýshylyqtyń sanyn ǵana emes, ol úshin sottalǵandyń da azaıýyna múmkindik berdi. Bıýdjet qarajatyn qymqyrýǵa jol berilmedi, al sybaılas jemqorlyqpen quqyqbuzýshylyqtardyń basym kópshiligi  turmystyq tulǵa aralyq sıpatqa ıe.

 Tárbıe jumystaryn uıymdastyrýǵa da dástúrli ádistermen qatar, jańa nysandar jáne ádister engizilýde.

Áskerlerde tynys-tirshiliktiń barlyq aspektilerin qamtıtyn 50-ge jýyq oqý modýli ázirlenip, qazirgi kezde  qoldanysqa engizildi. Atalǵan modýlderdiń basty máni men maqsaty – oı-óristi keńeıtý, oılaý qabiletin damytý, ıntellektýaldyq deńgeıdi arttyrý men patrıottyq tárbıe berý. 

Áskerı qyzmetshiler jigerlendirýdiń jańa formaty – «Ásker tarlany» úzdik áskerı maman baıqaýy engizildi. Jyl saıyn tankıst, artıllerıst, baılanysshy, barlaýshy jáne b. óz mamanynyń úzdikteri anyqtalyp, marapattalady.

Áskerı-patrıottyq tárbıe jetildirilýde. El Prezıdentiniń tapsyrmasyna sáıkes 2019 jyldyń qarashasynda barlyq óńirde tórt júzge jýyq «Smart sarbaz» úıirmesi ashyldy, onda 6 myńnan astam tárbıelenýshi jańalyqtardy meńgerip, ózderiniń tehnıkalyq ıdeıalaryn iske asyrady. Bıyl onlaın rejımde «Aıbyn» altynshy áskerı-patrıottyq jastar jıyny ótýde.

Qorǵanys mınıstrligi oryn alǵan ekonomıkalyq jaǵdaıdy eskere otyryp alternatıvti qarjylandyrý kózderin izdeıdi, memlekettik-jeke seriktestik mehanızmin jasaýda, Qarýly Kúshterdiń qurylymyn ońtaılandyrý esebinen únemdeýge qol jetkizýde. Qorǵanys mınıstrliginiń bastamasy boıynsha erekshe tártipti qoldaný arqyly Memlekettik tapsyrysty júzege asyrý erejesine tolyqtyrýlar engizildi. Bul bıýdjet qarajatynan 9 mlrd-tan astam teńgeni únemdeýge múmkindik berip, únemdelgen qarajat basym baǵyttarǵa jiberildi.

Prezıdenttiń Ákimshilik reforma jáne júrgizilgen fýnksıonaldyq taldaý týraly Jarlyǵynyń arqasynda birinshi ret áskerlerge toqsandyq syılyqaqy berý praktıkasy qoldanyldy. Sonymen qatar, syılyqaqynyń kólemi ár áskerı qyzmetshiniń atqarǵan qyzmetiniń nátıjesine qatysty saralanady.

Ishki qorlar esebinen, atap aıtqanda – áskerı júrgizýshiler jáne úlken júk kólikteriniń júrgizýshileri, atys qarýlary men oq-dáriler saqtaý jáne qoıma bastyqtary anaǵurlym tapshy mamandardyń, ıaǵnı 4 myń áskerı qyzmetshiniń tarıftik razrıady ulǵaıtyldy.

Qoımalarda saqtalǵan paıdalanylmaıtyn áskerı múlikten joıý baǵyty qolǵa alyndy. Paıdalanylmaıtyn áskerı múliktiń tizbesi anyqtaldy. Ol ýákiletti organ – Indýstrııa jáne ınfraqurylymdyq damý mınıstrliginiń qurylymdaryna beriledi. Sonymen qatar, bólinetin bıýdjet qarajaty sheńberinde oq-dáriler qorlaryn jańartý jáne jınaqtaý boıynsha jumystar júrgizilýde.

Koronavırýstyq pandemııanyń oryn alýy yqtımal ekinshi tolqynyna Qarýly Kúshterdi daıyndaýǵa erekshe nazar aýdarylýda. Bul rette armııanyń tótenshe jaǵdaı rejımin qamtamasyz etý jónindegi is-sharalarǵa qatysý tájirıbesi eskeriledi.

Bas áskerı-medısınalyq basqarma Qarýly Kúshter qurylymynda jeke, derbes organ retinde shyǵaryldy. Áskerı medısınalyq mekemelerdiń shtatyna ınfeksıonıst-dárigerler, epıdemıologtar, vırýsologtar qosymsha laýazymdar engizilgen.

Nur-Sultan men Almatyda bıýdjet qarajatynsyz eki PTR-zerthana iske qosyldy. IFT-dıagnostıkanyń eki utqyr zerthanasyn jetkizý josparlanýda. Osynyń barlyǵy vırýs juqtyrǵandardy esepke alý dáldigin arttyrýǵa jáne sapaly vaksınasııalaý úshin qajet antıdenelerdiń bolýyna test júrgizýge múmkindik beredi. Buryn mundaı múmkindikter bolmaǵan.

Radıasııalyq, hımııalyq jáne bıologııalyq qorǵanys áskerleri departamenti quryldy. Ol RHB qorǵanys áskerlerin damytý baǵdarlamasyn ázirlep, júzege asyrýdy, arnaıy bólimshelerdi daıyndaýdy jáne materıaldyq-tehnıkalyq qamtamasyz etýdi oryndaıdy.

Aǵymdaǵy jyly Prezıdenttiń Jarlyǵyna sáıkes tótenshe jaǵdaı rejımin qamtamasyz etý úshin alǵash ret áskerı mindettilermen arnaıy áskerı jıyndar ótkizildi. Olar tek qana jumyldyrý rezervin jattyqtyrýǵa, ákimdikterdiń jergilikti áskerı basqarý organdarymen naqty ózara is-qımylyn uıymdastyrýǵa ǵana emes, sondaı-aq jastardyń patrıottyq deńgeıin jáne áskerı boryshyn oryndaýǵa daıyndyǵyn baǵalaýǵa múmkindik berdi.

Memleket basshysynyń 16 qarashada vedomstvoaralyq komıssııada bergen tapsyrmalaryn oryndaý úshin Qarýly Kúshterdi jedel óristetýge daıyndyq boıynsha is-sharalar júrgizildi. Tarazda dalalyq gospıtal, Aqtóbede medısınalyq keshen, áskerı lazaretterde eki mobıldi bólimshe jáne 23 dárigerlik-meıirgerlik brıgada quryldy. Bul bólimsheler halyqqa kómek kórsetý úshin eldiń kez kelgen óńirine jedel barýǵa daıyn.

Jalpy, alqa otyrysynda Qarýly Kúshter pandemııaǵa baılanysty shekteýlerge qaramastan, 2020 jyldyń negizgi sharalaryn oryndady, jáne de eldiń egemendigi men aýmaqtyq tutastyǵyn qorǵaý úshin qajetti jaýyngerlik daıyndyq deńgeıin saqtap otyrǵany atap ótildi.

Áskerı qyzmetshilerdiń atynan el Prezıdentine tank brıgadasynyń komandıri Tabyldy Isálıev pen arnaıy maqsattaǵy vzvod serjanty Azat Shaıhy sóz sóıledi.

Podpolkovnık Tabyldy Isálıev áskerı qyzmetshiler áleýmettik-turmystyq jaǵdaılarynyń aıtarlyqtaı jaqsarǵanyn atap ótti: «Búgingi kúni áskerı qalashyqta jańa turǵyn úıler, saýda ortalyqtary boı kóterip, balalarǵa arnalǵan úıirmeler men ortalyqtary bar sport kesheni, garnızonda ofıserler úıi jumys isteýde. Aǵymdaǵy jyly jaýyngerlik daıarlyqta qol jetkizgen jetistikteri úshin biz kóp jyldar ishinde alǵash ret toqsandyq syılyq aldyq, pandemııamen kúres jónindegi is-sharalarǵa qatysýshylar qosymsha kótermelendi».

Budan basqa, ofıser keıde áskerı qyzmetten habary joq blogerler armııa týraly teris pikir bildirip jatatynan atap ótti. «Ol shyndyqqa janaspaıdy dep aıta alamyn. Áskerı mamandyq – bul tek qana kúndelikti jaýyngerlik oqý men saptyq daıyndyq emes, ol kúrdeli mamandyqtardy tez arada meńgerý. Bul táýekelmen, qarý-jaraqpen baılanysty qyzmet», - dedi podpolkovnık Tabyldy Isálıev.

Serjant Azat Shaıhy Joǵary Bas qolbasshymen «Altyn jebe» arnaıy operasııalar kúshterin tekserý barysyndaǵy bólimshesiniń jetistikterimen bólisti: «Barlaýshylardy basshylyq joǵary baǵalady. Joǵary moraldyq-psıhologııalyq jaı-kúıi, temirdeı myqty áskerı tártip pen ujymnyń úılesimdiligi oqý-jaýyngerlik tapsyrmany tolyq kólemde júzege asyrýǵa múmkindik berdi dep sanaımyn».

 
Sońǵy jańalyqtar

Vıkıngterdiń izimen

Tarıh • Keshe

Uqsas jańalyqtar