Aımaqtar • 20 Qarasha, 2020

Balaǵa qamqorlyq – basty nazarda

42 ret kórsetildi

Balalardyń quqyǵyn qorǵaý, olarǵa qamqor bolý jáne qoǵamda balalar ıgiligi úshin qaıyrymdylyq sharalaryn ótkizý – ýaqyttyń ózekti máselesi. Osy oraıda «О́zin-ózi taný: bala úshin mıssııa» atty halyqaralyq forým ótip, kún tártibindegi keleli máselelerdi talqyǵa saldy. Oı-pikirlerimen bólisti.

ZOOM platformasy arqyly ótken konferensııa aýqymy óte keń boldy. Bilim jáne ǵylym mınıstrligi, «Bóbek» ulttyq ǵylymı-praktıkalyq, bilim berý jáne saýyqtyrý ortalyǵy mamandarynan bastap mektepke deıingi jáne orta bilim berý mekemeleriniń qyzmetkerleri, ǵalymdar jáne sheteldik seriktester tikeleı baılanysqa shyqty.

Konferensııa basynda «Bóbek» qorynyń negizin qalaýshy Sara Nazarbaevanyń quttyqtaý haty men vıdeodárisi qatysýshylar nazaryna usynyldy.

«Bul jolǵy forým taqyryby óte tereń. Biz ártúrli elde ómir súrip, ártúrli tilde sóıleımiz, túrli dindi ustanamyz, biraq bárimizde balalardyń jaqsy ómir súrip, baqyt pen qýanyshqa qol jetkizgenin qalaımyz. Eger biz ózimiz rýhanı-adamgershilik baǵytynda tereń ári ortaq túsinistikte bola alsaq, ózimiz balalarǵa úlgi bola alsaq, onda olardyń armany mindetti túrde oryndalady. Sonda bizdiń urpaqtarymyz tatýlyq pen úılesimdilik saltanat qurǵan ǵajaıyp álemde ómir súretin bolady» delingen Sara Nazarbaevanyń quttyqtaý hatynda.

«Bóbek» UǴBBSO bas dırektory Elena Sákenovanyń aıtýynsha, eresekter óziniń eshqashan balanyń qamqorshysy hám jol kórsetýshisi ekenin umytpaýy tıis. Balaǵa degen mahabbat pen meıirim únemi jańǵyryp turýy kerek deıdi.

– Konferensııanyń dál búgin ótkizilýi de beker emes. О́ıtkeni dál osy, 20 qarasha kúni BUU Bas Assambleıasynyń bala quqyǵy jónindegi deklarasııasy qabyldanǵan edi. Bul kún barsha álemdegi balalardyń baqytty ómir keshýin qamtamasyz etýge baǵyttalǵan yntymaqtastyq pen birliktiń kúni sekildi. Bizdiń árqaısymyz osy ıdeıamen ómir súrip kelemiz. Bul ıgilikti jolǵa bizdi Sara Alpysqyzy Nazarbaeva baǵyttady. Qazir «Bóbek» qory balalarǵa bilim men tárbıe berý jolynda zamanaýı ınnovasııalyq tásilderdi aınalymǵa engizip, kópke úlgi bolyp otyr. Bul rette balaǵa tálim beretin pedagogtardyń úlesi orasan. Ustaz óz oqýshysynyń boıynda rýhanı qundylyqtardy sińirý, azamattyq ustanymdy qalyptastyrý, adamgershilik senimderdi oıatý jolynda aıanbaı eńbek etedi. Forým qatysýshylarymen aramyzdy mıllıondaǵan shaqyrym bólip jatqanyna qaramastan bizdiń túsinigimiz ben dostyǵymyz árkez bıik deńgeıde qala beredi. Tájirıbe almasý prosesi eshqashan toqtamaıdy, – deıdi Elena Sákenova.

Odan soń qonaqtar sóz sóılep, balany zamanaýı úrdisterge beıimdeý, olardy zııandy, qajetsiz dúnıelerden qorǵaý jáne olardyń quqyqtaryn qamtamasyz etý máselesine basa kóńil bóldi. Eýropalyq jalpy adamdyq qundylyqtar ınstıtýtynyń (ESSE) dırektory Marıanna Meıer, «Ata-analar qamqorlyǵy» halyqaralyq qozǵalysynyń tóraıymy Klara Mansýrova, Lomonosov atyndaǵy MMÝ psıhologııa fakýltetiniń dekany Rıza Halılov, Daǵystan memlekettik pedagogıkalyq ýnıversıtetiniń túzetý pedagogıka jáne arnaıy psıhologııa kafedrasynyń meńgerýshisi Djafar Mallaevtar jáne taǵy da basqa qatysýshylar óz pikirlerin ortaǵa saldy.

Forým barysynda qatysýshylarǵa Sara Nazarbaevanyń alǵys hattary tabys etiletini aıtyldy.

 

Abaı Aımaǵambet,

"Egemen Qazaqstan" 

ALMATY

Sońǵy jańalyqtar

Vıkıngterdiń izimen

Tarıh • Keshe

Uqsas jańalyqtar