«Ashyq qoǵamǵa – ashyq arhıvter» (Prezıdent Arhıviniń Batys Qazaqstan oblysyndaǵy kúnderi)

Qazaqstan Respýblıkasy Pre­zıdentiniń Arhıvi óńirlik arhıv­termen seriktestik qarym-qa­tynas ornatý máselesine únemi ji­ti kó­ńil bólip keledi. 2017 jyldan bas­tap jergilikti jerlerdegi arhıv mekemelerimen birlesken ǵylymı-zertteýlerdi júrgizý, ta­­rıhı-qujattyq kórmelerdi da­­ıyndaý, dóńgelek ústelderdi uıym­­dastyrý, tájirıbe almasý jáne taǵy basqa jobalardy júzege asy­rýdy qamtıtyn «Qazaqstan Res­pýblıkasy Prezıdenti Arhı­viniń óńirlerdegi kúnderi» sharalar kesheni ótkizilýde. Mundaı sharalardyń uıymdastyrylýy Qazaqstan Respýblıkasy Ulttyq arhıv qorynyń qujattaryn áı­gilep, nasıhattaýǵa jáne arhıv­shilerdiń kásibı máselelerdi bir­­­lese otyryp sheshýine de ba­ǵyt­talǵan. О́tken jyldarda Qa­zaqstan Respýblıkasy Prezıdenti Arhıviniń kúnderi Nur-Sultan qalasynda, Jambyl, Túrkistan, Atyraý, Pavlodar oblystarynda ótkizilgen.

Batys Qazaqstan oblysyndaǵy Qazaqstan Respýblıkasy Pre­zı­denti Arhıviniń kúnderi Ekin­shi dúnıejúzilik soǵystaǵy Jeńis­tiń 75 jyldyǵy aıasynda uıym­dastyryldy. Sharany ashý barysynda Pre­zıdent Arhıviniń dırekto­ry Já­mıla Ábdiqadyrova otandyq arhıv salasynyń aldynda turǵan ózekti mindetterge jáne onyń da­mý keleshegine toqtaldy. «Qa­zir­gi ýaqytta arhıv salasy kadr­lyq áleýetti saqtap qalý jáne kú­sheıtý boıynsha tıisti sharalardy qabyldaýdy qajet etedi. Elimizdegi arhıv salasynda bilikti mamandar jetispeı otyrǵanyn da jaqsy bilemiz. Buǵan qosa qazir arhıv salasynda jańa baǵyttar qa­lyptasýda, zamanaýı tehnologııa­lardy qoldaný qolǵa alynyp, jumys ádisteri jetildirilýde. Bul óz kezeginde kásibı daıyndyq pen biliktilikti arttyrýdyń jańa joǵary deńgeıde júzege asyrylýyn qajet etedi», dep atap ótti.

Jámıla Ábdiqadyrova óz só­­zinde sonymen qatar bıyl Jeńis­tiń 75 jyldyǵyna oraı ar­hıv qyzmetkerleri tarapynan daı­yn­dalyp, baspadan shyqqan «Ras­sekrechennaıa voına: «Osobye pap­kı» SK KP (b) Kazahstana. 1941-1945 gg.» qujattyq jınaǵy tý­raly da aıtyp ótti. Sharaǵa ar­­naıy daıyndalǵan tarıhı-qu­jat­tyq kórmede de joǵaryda atal­­­ǵan Qazaqstan Kommýnıstik par­­­tııasy Ortalyq komıtetiniń «erek­­­she papkalarynyń» qu­jat­ta­ry kópshilik nazaryna usy­nyldy.

Sharanyń ashylýynda Ba­tys Qazaqstan oblysynyń Aqpa­rat­tandyrý, memlekettik qyzmet k­ór­setý jáne arhıvter basqar­ma­sy basshysynyń orynbasary Abat Ashyq jáne Batys Qazaq­stan ­oblysy memlekettik arhıviniń dırektory Aıjan Savgabaeva da sóz sóıledi. Ǵalym-zertteýshiler Baqtyly Boranbaeva men Aıbo­lat Qurymbaev atalǵan taqyryp aıasynda óz baıandamalaryn usyndy.

Sharanyń baǵdarlamasyna sáı­­kes Qazaqstan Prezıdenti Ar­hıviniń bas sarapshysy Aqjan Isaeva qatysýshylarǵa «Uly Otan soǵysynyń tarıhy boıynsha asa qundy qujattar: Qazaqstan Respýblıkasy Prezıdentiniń Ar­hıvi men Batys Qazaqstan oblysy memlekettik arhıviniń toptamasynan» taqyrybyndaǵy tarıhı-qujattyq kórmeni tanystyrdy.

Baǵdarlamada sonymen qa­tar «Memlekettik arhıvter ju­mysynyń negizgi baǵyttary: nor­­matıvtik-ádistemelik baza jáne tájirıbe» atty arhıv isi bo­­ıynsha semınar josparlanǵan edi. Atalǵan semınar barysyn­da Prezıdent Arhıviniń qyz­met­kerleri Jánibek Zeınelov, Gaý­har Bekisheva men Aqjan Isaeva batysqazaqstandyq árip­tes­ter­men arhıv isiniń ózekti má­se­le­leri, vedomstvolyq ar­hıv­termen jumys, arhıv qujat­taryn esepke alý, saqtaý jáne olardy paıdalaný boıynsha tá­jirıbelerimen bólisti. Semınar sońynda barlyq qatysýshylarǵa sertıfıkattar tabystaldy.

Muhammed Jylgeldınov,

Prezıdent Arhıviniń qujattardy ǵylymı jarııalaý basqarmasynyń basshysy