BUU (IýNISEF) Balalar Qorynyń Qazaqstandaǵy О́kiliniń orynbasary Veronıka Vashenko: «1994 jyly Qazaqstan balalarǵa meıirimdi qoǵam qurýdyń quralyna aınalǵan Bala quqyqtary týraly konvensııany qabyldady. Dál sol kezde IýNISEF Qazaqstanda óz keńsesin ashqan edi. Konvensııa ratıfıkasııalanǵan sátten bastap Qazaqstan eldegi balalardyń jaǵdaıyn jaqsartý barysynda edáýir ilgerileý tanytyp, óńirlik jáne halyqaralyq deńgeıde bala quqyqtaryn qorǵaý boıynsha kóshbasshylarynyń birine aınaldy», dedi.
IýNISEF ókiliniń aıtýynsha, Memleket basshysy Qasym-Jomart Toqaev balalardyń quqyqtaryn qorǵaý máselesine erekshe kóńil bólip otyr. Prezıdenttiń 2020 jylǵy 1 qyrkúıekte jarııalanǵan Qazaqstan halqyna Joldaýynda balalardyń quqyqtaryn qorǵaý jónindegi sharalardy kúsheıtýge basa nazar aýdarǵany – sonyń aıǵaǵy. Bul rette Bilim jáne ǵylym mınıstrliginiń de úılestirýshi jáne beıindi vedomstvo retinde balalardyń quqyqtaryn qorǵaý boıynsha keshendi sharalardy belsendi túrde júrgizip otyrǵany sóz boldy.
Mınıstrliktiń málimetinshe, 2020 jyldyń qańtar aıynan bastap barlyq óńirde «Balalar quqyqtary jónindegi jergilikti ýákil» qyzmeti engizildi. Bul ınstıtýt óz tıimdiligin dáleldedi. Sondaı-aq kámeletke tolmaǵandardyń quqyqtaryn qorǵaý máseleleri boıynsha ortalyqtyń aımaqtarymen ózara árekettestigin kúsheıtken.
Al atalǵan mınıstrlik janyndaǵy Balalardyń quqyqtaryn qorǵaý komıteti 11 aıdyń ishinde BALA QORǴAÝ telegramm-chaty arqyly kelip túsken 2 myńnan asa ótinishti qarastyrdy. Telegram messendjerinde BALA QORǴAÝ telegramm-chaty kámeletke tolmaǵandarǵa qatysty balalardyń quqyǵyn buzý, zorlyq-zombylyq nemese qatygez qarym-qatynas faktilerin jedel anyqtaý maqsatynda 2019 jyldan bastap jumys isteıdi.
Osy jaıtqa qatysty Bilim jáne ǵylym vıse-mınıstri Bıbigúl Asylova: «Árbir jaǵdaı barlyq mán-jaı anyqtalyp, másele tolyq sheshilgenge deıin bizdiń baqylaýymyzda bolady. Endi qazaqstandyqtar qajet bolyp turǵan kómek týraly shuǵyl habarlap, balalardyń quqyqtaryn qamtamasyz etý máseleleri boıynsha mamandardyń keńesin alý múmkindigine ıe», dep atap ótti.
Osylaısha, mınıstrliktiń mamandary, bilim berý salasyndaǵy sapany qamtamasyz etý jónindegi óńirlik departamentter basshylary, oblystyq bilim basqarmalary, qalalyq jáne aýdandyq bilim bólimderi basshylary, psıhologter men áleýmettik pedagogter birlese otyryp, ómirlik qıyn jaǵdaıǵa tap bolǵan balalar men olardyń otbasylarynyń ótinishterin táýlik boıy qabyldaıdy.
Atalǵan chatqa qosylý úshin Telegram qosymshasynyń ishinde bala_qorgau sózin terý nemese https://t.me/bala_qorgau siltemesi boıynsha ótý qajet.
