Zań jobasy Parlament depýtattarynyń bastamashylyǵymen ázirlendi.
"Jańartylatyn energetıkany damytý úshin qolaıly jaǵdaılar jasaý kózdelgen. Bul maqsatta usynylyp otyrǵan sharalardyń qatarynda Jańartylatyn energııa kózderiniń elektr energııasyn satyp alýǵa arnalǵan kelisimsharttyń qoldanylý merzimin 15 jyldan 20 jylǵa deıin ulǵaıtý usynylady. Ol ınvestorǵa aýksıondyq saýda-sattyqta neǵurlym tómen tarıfterdi usynýǵa jaǵdaı jasaıdy. Bul óz kezeginde tutynýshylardyń shyǵyndaryn tómendetýge múmkindik beredi", dedi qujat boıynsha baıandama jasaǵan Parlament Májilisiniń depýtaty Shavhat О́temisov.
Sonymen qatar, zań jobasynda jańartylatyn energııa kózderi jobalary aldyndaǵy tólemder boıynsha óz mindettesin oryndamaǵan jaǵdaıda, Úkimet tarapynan qarjy-esep aıyrysý ortalyǵyna kómek kórsetý týraly norma engizilgen. Onyń aıtýynsha, kelesi tujyrymdamalyq usynys qarjy-esep aıyrysý ortalyǵy arqyly tasqyndyq elektr energııasyn ortalyqtandyrylǵan satyp alý-satýdy endirýge arnalǵan.
"Qoldanystaǵy "Elektr energetıkasy týraly" Zańǵa sáıkes, gıdroelektrstansalar tabıǵatty qorǵaý úshin sý jiberý kezeńinde óndiriletin elektr qýatyn ortalyqtandyrylǵan saýda-sattyqta satýǵa mindetti. Bul rette, tasqyndyq elektr energııasy baǵasyn memleket rettemeıtin treıderler satyp alady. Júıelik operatordyń derekteri boıynsha kóktemgi sý tasqyny kezindegi sý tasqyny elektr energııasynyń jyl saıynǵy kólemi orta eseppen 300 mln kVt/s quraıdy. Ortalyqtandyrylǵan saýda-sattyqta treıderler 1 kVt/saǵ úshin 2-3 teńge sheginde tasqyn elektr energııasyn satyp alady jáne eki-úsh ese qymbat satady", dedi Sh.О́temisov.
Osyǵan baılanysty, gıdroelektrstansalardyń tasqyndyq elektr energııasyn "KEGOK" kompanııasyna qaraıtyn qarjy-esep ortalyǵyna satý mindetin zańnamalyq túrde bekitý usynyldy. Ol óz kezeginde osy qymbat emes tasqyndyq elektr energııasyn eldiń barlyq tutynýshylary arasynda bóledi.
"Zań jobasy manevrlik qýattar kólemin jáne jańartylatyn energııa kózderiniń úlesin ulǵaıtý úshin qolaıly jaǵdaı jasaýǵa múmkindik beredi degen oıdamyz", dedi Májilis depýtaty.
Budan buryn habarlanǵandaı, Senattyń jalpy otyrysynda atalǵan qujattyń negizgi tujyrymdamalyq jańalyqtary túsindirildi. Eske sala keteıik, jaqynda QR Energetıka mınıstri Nurlan Noǵaev jańartylatyn energııa kózderin damytý jospary týraly aıtty.
