Bul týraly Shymkent qalasynyń ákimi Murat Áıtenov Prezıdent janyndaǵy OKQ alańynda ótken baspasóz brıfıngte baıandady.
– Qazirgi tańda 5,3 mlrd teńgege 10 joba iske qosyldy. Nátıjesinde, 30,7 mlrd teńgeniń aýylsharýashylyq ónimi óndirilip, ótken jyldyń tıisti kezeńimen salystyrǵanda 2 paıyzǵa artty. Salaǵa baǵyttalǵan ınvestısııa kólemi 7 mlrd teńgeni qurap, ótken jylmen salystyrǵanda 1,8 esege artyp otyr, – dedi M.Áıtenov.
Spıker Memleket basshysy óz Joldaýynda elimizde qoıma jáne kólik ınfraqurylymyn damytýdy tapsyrǵanyn jáne osy baǵytta Shymkent qalasynda 92 gektar jerge saýda-logıstıkalyq aımaǵy qurylǵanyn aıtyp ótti. Munda qazir eki kompanııa qyzmet kórsetýde. Odan bólek, 3 logıstıkalyq jobanyń qurylysy júrgizilip otyr.
