Reseı Federasııasynda shoshqanyń afrıkalyq obasynyń tirkelýine baılanysty QR AShM Veterınarııalyq baqylaý jáne qadaǵalaý komıteti 2015 jylǵy 29 qyrkúıekten, 2017 jylǵy 20 qarashadan, 2018 jylǵy 22 maýsymnan jáne 2019 jylǵy 27 aqpannan bastap Qazaqstan arqyly tiri shoshqalardy, qaban uryǵyn (sháýetin), shoshqa eti men jabaıy qaban etin, olardyń genetıkalyq materıalyn, shoshqa sharýashylyǵy ónimderin (shoshqanyń afrıkalyq obasy vırýsynyń joıylýyna kepildik beretin, ónimniń qalyńdyǵynda 72°S joǵary termııalyq óńdeýden ótpegen) alyp kelýge jáne tranzıtine ýaqytsha shekteýler engizdi. Sonyń ishinde Volgograd, Kalınıngrad, Lenıngrad, Nıjnıı Novgorod, Orel, Samara, Tambov, Tıýmen jáne Chelıabi, Krasnodar, Krasnoıarsk jáne Prımorsk oblystarynan termııalyq óńdeýden ótpegen: jabaıy qabandardyń ónimderin, bylǵary jáne ishek shıkizatyn, qylshyqtardy, shoshqalarǵa arnalǵan jemdi, sondaı-aq shoshqalardy ustaý, soıý jáne kesý úshin paıdalanylatyn jabdyqtardy Qazaqstan shekarasynan ótkizýge tyıym salynǵan.
2020 jylǵy 2 jeltoqsanda Halyqaralyq epızootııalyq bıýronyń resmı notıfıkasııasynyń negizinde Veterınarııalyq baqylaý jáne qadaǵalaý komıteti RF-nyń Arhangelsk, Omby, Orynbor jáne Kýrsk oblystarynan da joǵaryda atalǵan ónimderdi alyp kelýge jáne olardyń tranzıtine ýaqytsha shekteýler engizdi.
AShM Veterınarııalyq baqylaý jáne qadaǵalaý komıteti qabyldaǵan sharalar týraly Saýda jáne ıntegrasııa mınıstrligi Tehnıkalyq retteý jáne metrologııa komıtetiniń "Qazaqstan standarttaý jáne sertıfıkattaý ınstıtýty" RMK saýdadaǵy tehnıkalyq kedergiler, sanıtarlyq jáne fıtosanıtarlyq sharalar jónindegi aqparattyq ortalyǵyn, RF "Roselhoznadzor" jáne Veterınarııalyq baqylaý jáne qadaǵalaý komıtetiniń aýmaqtyq bólimshelerin habardar etti.
Qazaqstan aýmaǵynda ınfeksııanyń taralýyna jol bermeý úshin Veterınarııalyq baqylaý jáne qadaǵalaý komıteti birqatar is-sharalar ázirlep, uıymdastyrýshylyq, veterınarııalyq-sanıtarııalyq jáne sharýashylyq jumys josparyn qoldanysqa engizdi.
Atap aıtqanda, aǵymdaǵy jyldyń 2 jeltoqsanynda shoshqanyń afrıkalyq obasynyń aldyn alý boıynsha jedel keńes ótkizildi, onda aımaqtyq ınspeksııalarǵa, vedomstvolyq baǵynysty uıymdar men jergilikti atqarýshy organdarǵa tıisti tapsyrmalar berildi.
Budan basqa, Veterınarııalyq baqylaý jáne qadaǵalaý komıteti men QR Ekologııa, geologııa jáne tabıǵı resýrstar mınıstrliginiń Orman sharýashylyǵy jáne janýarlar dúnıesi komıtetimen jabaıy faýnanyń epızootııalyq monıtorıngi, synamalardy irikteý jáne zerthanalyq zertteýler júrgizý týraly memorandým jasaldy. Kelisim negizinde "Veterınarııa boıynsha ulttyq referenttik ortalyq" ShJQ RMK qyzmetkerleri aǵymdaǵy jyldyń 3 jeltoqsanynda shoshqanyń afrıkalyq obasyna zertteý júrgizý úshin jabaıy qabandardan synamalar alý maqsatynda Soltústik Qazaqstan jáne Pavlodar oblystaryna jiberildi.
Qazaqstan Respýblıkasynyń Reseımen memlekettik shekarasynyń ótkizý pýnktterinde avtokólik quraldary men jolaýshylardyń qol júgin tekserýdi uıymdastyrý úshin AShM Veterınarııalyq baqylaý jáne qadaǵalaý komıteti IIM Ákimshilik polısııa komıtetine, IIDM Kólik komıtetine, Qarjy mınıstrliginiń Memlekettik kirister komıtetine jáne UQK Shekara qyzmetine hattar joldady.
Elimizdiń aýmaǵyndaǵy epızootııalyq jaǵdaı QR AShM Veterınarııalyq baqylaý jáne qadaǵalaý komıtetiniń qatań baqylaýynda.
