Finprom.kz dereginshe, altyn valıýta qorynyń ósimi altyn portfeliniń ósimimen baılanysty. Byltyrmen salystyrǵanda 26,9 paıyzǵa ósim bar. Bul aqshaǵa shaqqanda – 23,2 mlrd dollar. Jalpy, 2015 jyldan beri el rezervindegi altyn úlesi udaıy ósip kele jatyr. Bıyl qazan aıynda ol 69,1 paıyzǵa artqan.
"Altyn úlesiniń edáýir ulǵaıýy QR UB-nyń baǵaly metaldy belsendi satyp alýymen jáne portfeldi ártaraptandyrýmen baılanysty. Koronavırýs pandemııasy týǵyzǵan daǵdarys, sondaı-aq energetıkalyq naryqtaǵy belgisizdik jaǵdaıynda altynǵa ınvestısııa burynǵydan da mańyzdy bola tústi. Bul aktıv únemi joǵary ótimdi kúıinde qalady, nesıelik táýekelge ushyramaıdy jáne asa tapshy metall bolǵandyqtan ýaqyt boıynsha qunyn saqtap qalady. Altyn tórt negizgi ádispen portfeldi kúsheıte túsedi:
· Uzaq merzimdi paıdaǵa kenelýge;
· Dıversıfıkator retinde áreket etý jáne naryqtyq stress kezinde shyǵyndy azaıtý;
· Nesıe táýekelinsiz ótimdilikti qamtamasyz etý;
· Portfeldiń jalpy tıimdiligin jaqsartý" dep jazady Finprom.
Altynnyń eshqashan qunyn joǵaltpaıtyn qundy metall ekenine jyl sanap kóz jetkizip kelemiz. 2001-2019 jyldar aralyǵynda altynǵa degen álemdik ınvestısııalyq suranys 14 paıyzǵa ósse, osy jyldar aralyǵynda altyn baǵasy tórt márte qymbattaǵan. Jalpy, altyn álemniń damyǵan elderinde rezervtiń negizgi bóligin quraıdy. Máselen, AQSh rezervindegi altyn úlesi 79,4 paıyz (8,1 myń tonna) bolsa, Germanııada – 76,6 paıyz (3,4 myń tonna), Italııada – 71,1 paıyz (2,5 myń tonna), Fransııada – 66,7 paıyz (2,4 myń tonna). Bul elder altyn qory boıynsha kóshbasshy memleketter bolyp sanalady.
Al Qazaqstan álemdegi altyn qory boıynsha 13-orynda. Salmaqpen eseptegende elimizde 383,3 tonna altyn qory bar. Sońǵy bes jylda Ulttyq Bank 215,2 tonna altyn satyp alǵan. Sondaı-aq bıyl úshinshi toqsanda Qazaqstan altyn satyp alý boıynsha TOP-5 elder qataryna kirdi. Portfeldi altynnyń paıdasyna ártaraptandyrý elde altyn valıýta qoryn saqtap jáne uzaq merzimdi paıda alyp kelýge múmkindik bergen.
