L.Barankýlovanyń aıtýynsha, Qordyń aldaǵy bes jylǵa arnalǵan damý josparynyń negizgi mindetteri qarjylyq turaqtylyqty qamtamasyz etý, korporatıvtik ortalyq pen Qordyń portfeldik kompanııalary ótimdiliginiń jetkilikti deńgeıin qoldaý.
L.Boranqulova Qordyń 2021 jyly ınvestısııalyq holdıngke belsendi túrde qaıta quryla bastaıtynyn atap ótti. Jańa qorjynnyń ósýin qamtamasyz etý úshin Qor bolashaq urpaq qoryn qalyptastyrý jónindegi jumysty jalǵastyrady, sondaı-aq birlesken ınvestısııalaý qaǵıdattary boıynsha tikeleı ınvestısııalardy bastaıdy.
Onyń aıtýynsha, bul qor portfelindegi kommersııalyq aktıvterdi qalyptastyrýǵa múmkindik beredi. Osylaısha, qor 2024 jylǵa qaraı ınvestısııalyq portfelin belsendi basqarýǵa tolyq kóshe otyryp, portfeldi ońtaılandyrýdy jáne qaıta qurylymdaýdy jalǵastyrýǵa baǵyttalady.
Sondaı-aq L.Boranqulova 2021 jyldan bastap Qor belsendi túrde ınvestısııalaı bastaıtynyn atap ótti. Qazirgi ýaqytta Qor 12 basym salany anyqtady, olardyń ishinde aqparattyq tehnologııalar, ınfraqurylymdyq qurylys, jasyl energetıka, hımııa ónerkásibi, densaýlyq saqtaý, mashına jasaý, logıstıka, aýyl sharýashylyǵy, taý-ken ónerkásibi, ǵylymı ázirlemeler jáne t.b. Bul tizim tolyq emes jáne álemdik jáne aımaqtyq tendensııalar men naryqtyń ózgerýine baılanysty jyl saıyn jańartylyp otyrady.
L.Boranqulovanyń aıtýynsha, álemdik daǵdarys Qor tobynyń qarjylyq kórsetkishterine áser etti. Alaıda «Samuryq-Qazyna» 2020 jyldy bastapqy josparlardan áldeqaıda joǵary naqty kórsetkishtermen aıaqtaýǵa nıetti.
«Qalyptasqan syrtqy faktorlarǵa qaramastan, 2021 jyly kompanııalar tobynyń negizgi strategııalyq kórsetkishteri aǵymdaǵy jyldyń baǵasymen salystyrǵanda jaqsarýda. Qordyń taza aktıvteriniń quny 2021 jyly 653 mlrd teńgege ósip, 14 trln teńgeni quraıdy. Sońǵy 6 jylda ortasha jyldyq ósý qarqyny 8,2% - ǵa, sońǵy 10 jylda - 9,1%-ǵa teń. Kútiletin ósim 8% deńgeıinde bekitilgen strategııanyń maqsattarynan asyp túsedi», dedi L.Boranqulova.
Sondaı-aq 2025 jylǵa qaraı Qordyń taza aktıvteriniń quny 6,9 trln teńgege artyp, 21 trln teńgeni quraıdy dep kútilýde, al 2021 jyly Qordyń taza kirisi 523 mıllıard teńgege jetedi, bul osy jyldyń baǵasynan 22% joǵary. Aldaǵy 4 jylda 6,2 trln teńgeniń jalpy kirisine qol jetkiziledi dep kútilýde. Kapıtal tıimdiliginiń kórsetkishi 4,7% deńgeıinde josparlanyp otyr, 2025 jylǵa qaraı 9,1% deńgeıine deıin jaqsarady.
Osylaısha, Dırektorlar Keńesi bekitken damý jospary Qordyń 2028 jylǵa deıingi damý Strategııasyna tolyq sáıkes keledi jáne ony iske asyrýdy qoldaıdy. Budan basqa Qor toby 2021 jyly osy jyldyń basynda bastalǵan shyǵystar men kúrdeli salymdar deńgeıin baqylaý jónindegi júıeli jumysty jalǵastyrady.
Esterińizge sala keteıik, 13 qarashada Qor basshysy Ahmetjan Esimov Tuńǵysh Prezıdent - Elbasy tóraǵalyq etken Qor Basqarmasyna Qordy ınvestısııalyq holdıngke aınaldyrý tujyrymdamasyn usyndy. Tujyrymdama aıasynda Qor 2028 jylǵa deıingi jańartylǵan Damý strategııasynda negizgi maqsattardy aıqyndady. Olardyń eń bastysy - «Samuryq-Qazyna» qorynyń orta merzimdi keleshekte jetekshi egemendi ál-aýqat qorlaryna uqsas ınvestholdıng retinde jumys isteýdiń jańa formatyna kóshýi.
