Saltanatty is-shara 1 jeltoqsan - QR Tuńǵysh Prezıdenti kúni jáne 16 jeltoqsan - Qazaqstan Respýblıkasynyń Táýelsizdik kúni aralyǵynda uıymdastyryldy.
Mereıtoılyq jıynǵa Ońtústik Afrıka Respýblıkasynyń saıasat jáne qoǵam qaıratkerleri qatysty. Al dıplomatııalyq korpýs jáne sheteldik memleketter atynan Azııa tobynyń dýaeıni, Fılıppın Elshisi Jozef Anjeles, Ázirbaıjan, Bangladesh, Belarýs, Indonezııa, Irak, Iran, Kýveıt, Mavrıkıı, Pákistan, Reseı jáne Túrkııanyń elshileri, Birikken Ulttar Uıymy Esirtki jáne qylmys basqarmasy Afrıka Ońtústik óńirindegi ókili Juldyz Aqysheva; Qazaqstan Respýblıkasynyń Mozambıktegi Qurmetti konsýly Dıno Foı; sondaı-aq Iýnýs Emre atyndaǵy Túrik tili jáne mádenıeti ınstıtýtynyń OAR-daǵy ókildiginiń basshylyǵy qatysty.
Ashylý saltanaty barysynda Qazaqstan Respýblıkasynyń Elshisi Qanat Týmysh pen Ońtústik Afrıka Respýblıkasynyń Halyqaralyq qatynastar jáne yntymaqtastyq mınıstriniń birinshi orynbasary Elvın Botes sóz sóıledi.
Qazaqstandyq dıplomat is-sharaǵa qatysýshylardy Qazaqstan men Ońtústik Afrıka arasyndaǵy ekijaqty qatynastardyń negizgi baǵyt jáne tustarymen, óz eliniń syrtqy jáne ishki saıasatynyń jetistikterimen tanystyryp, Qazaqstan basshylyǵynyń mańyzdy bastamalaryn tilge tıek etti. Ol sondaı-aq, Qazaqstan Respýblıkasynyń Prezıdenti Qasym-Jomart Toqaevtyń 2020 jylǵy 1 qyrkúıektegi Qazaqstan halqyna Joldaýyna qatysty pikirin bildirdi.
OAR Syrtqy saıası vedomstvosy basshysynyń orynbasary E.Botes óziniń sóılegen sózinde: «Mádenı dıplomatııa Qazaqstan men Ońtústik Afrıkanyń ekijaqty qarym-qatynastardyń damýynda mańyzdy tetikteriniń biri bolyp keledi. Bul turǵydan alǵanda, búgingi is-shara ýaqyt, urpaqtar men qurlyqaralyq sabaqtastyqty qamtamasyz etýmen birge, jas býynǵa lıderlik qasıetterdi tanyta otyryp, olarǵa qoldaýyn kórsetýde» dep atap ótti.
Sondaı-aq Svane qalasynda Qazaqstannyń Ońtústik Afrıka Respýblıkasyndaǵy Elshiligi tórt tilde – arab, aǵylshyn, qazaq jáne orys tilderinde shyǵarǵan Ál-Farabıdiń «Minsiz memleketke umtylý qajettiligi týraly ǵaqlııa» atty kitabynyń tusaýkeserin ótkizdi. Bul traktat ǵulama ǵalymnyń metafızıka, saıasattaný, áleýmettaný jáne teologııa qıylysyndaǵy negizgi jumystarynyń biri.
Bul basylym Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń qazaqstandyq qoǵamdyq sanany jańǵyrtý qajettiligi týraly bastamasy aıasynda jaryq kórgenin de aıta ketken jón. Kitap jańa redaksııada shyǵarylǵan, ol qaıta óńdelip, qazirgi zamanǵa qaraı sáıkestendirilip, beıimdelipti.
Kitap OAR-dyń Ulttyq kitaphanasyna, jetekshi ýnıversıtetterine, mektep, lıseı men kolledjderine syıǵa tartyldy.
Is-sharanyń sońynda, Qazaqstan Elshisi ońtústik afrıkalyq «ITV» telekanalyna suhbat berip, ótkizilgen sharanyń basty ıdeıalary týraly baıandap, QR men OAR arasyndaǵy ekijaqty yntymaqtastyǵynyń, sonyń qatarynda mádenı-gýmanıtarlyq saladaǵy qarym-qatynastary týraly habarlady.
