Búgin Shymkent qalasynyń ákimi Murat Áıtenov dástúrge sáıkes, «Instagram» jelisinde tikeleı efırde turǵyndarmen júzdesti. Elimizdegi epıdemıologııalyq ahýal boıynsha Shymkent qalasy jasyl aımaq qataryna jatady. Murat Dúısenbekuly efır barysynda qaladaǵy epıdemıologııalyq ahýal jáne jeńildetilgen sharalar jóninde habardar etti.
Qala ákiminiń aıtýynsha, azyq-túlik jáne azyq-túlik emes bazarlar, saýda-oıyn-saýyq ortalyqtarynyń jumysy, kınoteatrlar jáne qoǵamdyq kólikterdiń jumys ýaqyty uzardy. Atap aıtqanda, azyq-túlik jáne azyq-túlik emes bazarlar demalys jáne mereke kúnderi saǵat 9:00-den 17:00-ke deıin jumys isteýge ruqsat berildi. Saýda-oıyn-saýyq ortalyqtary jumys kúnderi 9:00-den 23:00-ge deıin, demalys jáne mereke kúnderi 9:00-den 17:00-ge deıin jumys isteıdi.
Al kınoteatrlardyń jumys ýaqytyn (Bul rette kelýshilerdiń sany 50 paıyzdan aspaýy tıis, betperdelik rejım, áleýmettik qashyqtyq saqtalady) jumys kúnderi, demalys jáne mereke kúnderi de 9:00-den 23:00-ge deıin uzartýǵa sheshim qabyldandy.Sondaı-aq, qoǵamdyq kólikter jumys kúnderi, demalys jáne mereke kúnderi de saǵat 07:00-23:00 aralyqta júretin bolady.
Bul rette betperdelik rejım qadaǵalanady. Alaıda qalada merekelik, estelik, ujymdyq korporatıv, banketter, toı, qudalyq, otbasylyq is-sharalardy ótkizýge tyıym salynady. – Jalpy qalada kásipkerlik nysandardyń demalys jáne mereke kúnderdegi jumys ýaqytyn uzarttyq.
Biz barynsha jeńildetip jatyrmyz. Osy oraıda kásipkerlerdi azamattyq tártipti oryndaýǵa shaqyramyn. Barshańyzdy alda kele jatqan Táýelsizdik kúnimen quttyqtaımyn. 29 jylda elimiz úlken jetistikterge jetip otyr, – dedi qala ákimi. Sondaı-aq, M.Áıtenov qoǵamdyq kólikterdegi tólem júıesi, bilim salasyndaǵy ózgerister boıynsha turǵyndar tarapynan qoıylǵan suraqtarǵa jaýap berdi. Jalpy shaharda ustazdardy jumysqa qabyldaý boıynsha jańa joba engizilgen.
Aldaǵy bes jyldyqta 85 mektep salý josparlanýda. Taǵy bir mańyzdy jańalyq, qala ákimi 2021 jyldan bastap buqaralyq sportty damytý maqsatynda «Shymkent lıgasy» bastalatynyn aıtty. Búginde jobanyń erejesi daıyndalýda.
