Maǵzum Myrzaǵalıev óziniń Twitter paraqshasynda: "Memleket basshysynyń Bozjyra shatqalynda qonaqúı salý jobasyn qaıta qaraý týraly tapsyrmasyna sáıkes, Aqtaý qalasynda ǵalymdarmen, bıologtarmen, sheteldik sarapshylarmen, jergilikti ekolbelsendilermen jáne qoǵam qaıratkerlerimen kezdesý ótkizdik. Barlyǵy týrıstik nysan turǵyzý óńir úshin asa mańyzdy degen ortaq oı aıtty", dep jazdy.
Ekologııa mınıstri týrızmdi damytý men Bozjyra sııaqty ýnıkaldy tabıǵı nysannyń ekojúıesin saqtaýdyń arasynda tepe-teńdik bolý kerektigin basa aıtty.
"Jobanyń áleýetin baǵalap, keńesterin berý úshin tájirıbeli sarapshylar men ǵalymdardy Bozjyraǵa alyp bardyq", dedi mınıstr.
Onyń aıtýynsha, jergilikti qoǵam belsendileri ǵalymdarmen birge qonaq úı salý óńirdiń týrızmin damytyp, jańa jumys oryndaryn ashý úshin kerek degen oıdy alǵa tartqan.
"Sondyqtan turǵyndar men ǵalymdardyń, qoǵam ókilderiniń usynysymen qonaqúı orny Jabaıushqan qaýmalynyń syrtyna aýystyrylady. Investor kompanııa ókilderi óz tarapynan jobany júzege asyratyn oryndy qaýmaldan tys jerden tańdaýǵa daıyn ekenderin jetkizdi", dep habarlady Maǵzum Myrzaǵalıev.
