– Táýelsizdik arqasynda Shymkent qalasynyń damýy jańa deńgeıge kóterildi. Elimiz egemendik alǵan jyly Shymkentte halyq sany 400 myń adam bolsa, búgingi kúni 1 mıllıon adamnan asty. Qala aýmaǵy keńeıip, 13 myń gektardan 116,3 myń gektarǵa deıin ulǵaıdy.
Murat Dúısenbekuly óz sózinde qala bıýdjeti 1994 jylǵy 1,0 mlrd. teńge bolsa, búgingi kúnde 455 mlrd. teńgeden asqanyn jetkizdi. Qala ekonomıkasyna 2,6 trln-nan astam ınvestısııa baǵyttalǵan. 1991 jyldan beri 6,1 mln sharshy metr jańa turǵyn úı paıdalanýǵa berilgeninen derek keltirdi.
“Qol jetkizgen tabystarymyzdyń barlyǵy – Táýelsizdiktiń, osy jolda jan aıamaı ter tókken azamattarymyzdyń eren eńbeginiń nátıjesi. Qashanda táý eter Táýelsizdigimiz tuǵyrly, eldigimiz ǵumyrly bolsyn, dedi shahar basshysy.
Saltanatty jıynda “Asar” móltek aýdanynynan 1200 oryndyq jalpy orta mektep, “Nursát” móltek aýdanynan bir aýysymda 700 adamdy qabyldaıtyn «Atameken» medısınalyq ortalyǵyn jáne tústi metall men armatýra shyǵaratyn óndiris orny onlaın formatta ashyldy.
Sonymen birge, saltanatty sharada QR Prezıdentiniń Jarlyǵymen, memlekettik jáne qoǵamdyq qyzmette sińirgen eńbegi, eldiń áleýmettik-ekonomıkalyq jáne mádenı damýyna, halyqtar arasyndaǵy dostyq pen yntymaqtastyqty nyǵaıtýǵa qosqan eleýli úlesi úshin Shymkent qalasynyń 46 azamaty Memlekettik nagradamen marapattaldy.
