Feısbýktegi paraqshasynda arnaıy jazba qaldyrǵan mınıstr Memleket basshysy Qasym-Jomart Toqaev óz Joldaýynda balalardyń qolóner men shyǵarmashylyqtyń bastapqy negizderimen tanysýy úshin «Balalar úıirmesi» qyzmetin qaıta jandandyrý týraly tapsyrma bergenin alǵa tartty.
Onyń aıtýynsha, qosymsha bilimsiz balalardyń áleýetin tolyq ashý múmkin emes.
- Sondyqtan ár balanyń sabaqtan tys úıirmeler men seksııalarǵa qatysý múmkindigi bolýy mańyzdy. Elimizde memlekettik qosymsha bilim berý mekemeleri biz qalaǵandaı kóp emes. Sondyqtan balalardy qosymsha bilimmen qamtý úshin tıisti jumysty atqarýdamyz. Osy rette jaǵymdy jańalyqpen bólispekpin.
Jaqyn arada balalardyń memlekettik tapsyrys arqyly jekemenshik uıymdarda da qosymsha bilim alýyna jaǵdaı jasalady, dedi Aımaǵambetov.
Mınstr mundaı norma «Bilim týraly» QR Zańyna ózgerister men tolyqtyrýlar engizý týraly» zań jobasynda qamtylǵanyn jáne ol Parlament Májilisiniń eki oqylymynan ótkenin de tilge tıek etti.
Qosymsha bilim berý júıesine oqýshylar saraılary, túrli úıirmeler, seksııalar, kórkemóner jáne mýzyka mektepteri, jas tehnıkter stansııalary jáne t.b. enedi.
Bul baǵyt arqyly bala qosymsha bilim alyp, túrli daǵdylaryn damytatynyn aıtqan mınıstr, bul taqyrypty tarqatyp túsindirip berdi.
Onyń aıtýynsha, memleket tarapynan aqsha bólip, oqýshylar saraıyn, óner mektepterin salý, úıirmeler ashý – bir bólek.
- Degenmen memlekettik tapsyrys arqyly jekemenshik ortalyqtarda balanyń qosymsha bilim alýyna jaǵdaı jasaý mańyzdy. Bul – memlekettik-jekeshelik áriptestik qaǵıdaty. Buǵan deıin osyndaı júıe arqyly qysqa merzim ishinde memleket tarapynan úlken salymdarsyz balabaqshalardaǵy oryn jetispeýshilik problemasy aıtarlyqtaı sheshilgen bolatyn. Ony jeke balabaqshalardyń damý tájirıbesinen baıqaýǵa bolady. Iаǵnı, kásipkerler óz esebinen mektepke deıingi bilim berý mekemesin tolyǵymen salady nemese ǵımaratty jabdyqtaıdy, al memleket árbir balaǵa memlekettik tapsyrysty ornalastyrý arqyly aqsha tóleıdi, dep túsindirdi mınıstr.
- Nátıjesinde memleket qurylysqa jáne materıaldyq-tehnıkalyq bazaǵa jumsalatyn aqshany únemdeıdi. Máselen, sońǵy 10 jylda jeke ınvestısııalardyń esebinen balabaqshalardyń sany 10 ese ósti.
Sondaı-aq, Ashat Aımaǵambetov mınıstrlik qosymsha bilim berý júıesinde de osyndaı tetikti qoldanatynyn atap ótti. Onyń málimdeýinshe, memlekettik-jekeshelik áriptestik arqasynda qysqa merzim ishinde balalardy úıirmelermen jáne seksııalarmen qamtý deńgeıin aıtarlyqtaı shyǵynsyz arttyrýǵa bolady.
- Jumys istep turǵan qosymsha bilim beretin memlekettik uıymdar da óz qyzmetin jalǵastyryp, damıtyn bolady. О́tken jyly mektepten tys uıymdardy jappaı ońtaılandyrý toqtatylǵanyn atap ótkim keledi, bul da balalardyń qosymsha bilim alýǵa teń qol jetkizýin qamtamasyz etýge oń áser etedi.
Sonymen qatar, sońǵy eki jylda Taldyqorǵan jáne Petropavl qalalarynda oqýshylar saraılary ashyldy. Bıyl Atyraý jáne Túrkistan qalalarynda oqýshylar saraılary salyndy, Túrkistan oblysynda balalar mýzyka mektebi, О́skemen qalasynda «SMART» kreatıvti bilim berý ortalyǵy ashyldy. Qazir Kókshetaý jáne Qaraǵandy qalalarynda eki oqýshylar saraıynyń qurylysy júrip jatyr. Almaty qalasyndaǵy oqýshylar saraıynda qaıta jóndeý jumystary júrgizilmek jáne Jambyl oblysynda oqýshylar saraıynyń qurylysy josparlanǵan.
Pedagog mártebesi týraly zańǵa sáıkes qosymsha bilim berý qyzmetkerleriniń de eńbekaqysy jyl saıyn ósetin bolady, sanattar úshin qosymsha aqylary ulǵaıtylady.Sondyqtan qosymsha bilim berýdi damytýdyń jańa kezeńi bastaldy dep senimmen aıta alamyn, dep jazbasyn aıaqtady ol.
