Shymkent qalasynda ótken fılmniń arnaýly kórsetilimine qala ákimi Murat Áıtenov qatysty. Ol óziniń sózinde táýelsizdik jyldary memlekettik tildiń qoldaný aıasyn keńeıtý maqsatynda qazaq tilindegi sapaly aqparattyq, aǵartýshylyq ónimderdiń kóbeıip jatqanyn tilge tıek etti.
- Elbasynyń bastamasymen qurylǵan «Bolashaq» baǵdarlamasynyń túlekteri elimizdiń zııatkerlik áleýetin kóterýdi maqsat etken túrli jobalardy iske asyrýda. «Bolashaq» korporatıvtik qorynyń «О́zińnen basta» jobasy arqyly gollıvýdtyq fılmderge qazaq tilinde kórkem dýblıaj jasalynyp, qazaq kórermenderine kıno-ındýstrııadaǵy sońǵy týyndylardy ana tilinde tamashalýǵa múmkindik berdi. Jobanyń úlken jetistigi retinde qazaq tiliniń Disney stýdııasynyń 39-shy tili jáne Sony Pictures stýdııasynyń 7-shi tili bolǵanyn aıtý qajet. Kıno salasy qazaq tilinde dybystalǵan jańa fılmdermen tolyǵyp qana qoımaı, elimizde dýblıajdaý isi de damýda. Bolashaqta ózimizdiń otandyq týyndyny álem elderi óz tilderinde dýblıajdaıtyn deńgeıge jetýimiz kerek, dedi shahar basshysy.
Fılmde basty rólderdi Aıgúl Imanbaeva, Jánel Maqajan sekildi aktrısalar dybystaǵan. Sondaı-aq, Qazaqstandyq «Nomad Stunts» halyqaralyq kaskaderler toby oınady. «Nomad Stunts» kaskaderler toby aktıor Djeıson Skott Lı keıipkeriniń tańdaýly áskerı jasaǵyn, al top jetekshisi ári trıýk qoıýshy Jaıdarbek Kúnǵojınov tańdaýly rólderdiń birin somdady. Qarasha aıynda Jaıdarbek Kúnǵojınov «Tomırıs» tarıhı dramasynda trıýkterdi qoıý jumysy úshin kaskaderlik «Oskar», Álemdik kaskaderler akademııasynyń «Taýrýs» syılyǵyn ıelengen.
Fılm «BI Group» kompanııasynyń demeýshiligimen jaryqqa shyǵyp otyr. Ony qazaq tilinde ivi onlaın-kınoteatrynda da kórýge bolady.
2011 jyldan beri «О́zińnen basta» — gollıvýd fılmderin qazaq tiline kórkem dýblıajdaý jobasy aıasynda «Bolashaq» korporatıvtik qory «Meloman» kompanııasymen birlestikte júzege asyryp keledi.
Osyǵan deıin qazaq tiline «Walt Disney Pictures» stýdııasynyń 15 fılmi, «Walt Disney Pictures» jáne «Pixar» stýdııalary birlesip shyǵarǵan 6 anımasııalyq fılm, «Sony Pictures» stýdııasynyń 6 fılmi, Lucasfilm Ltd. stýdııasynyń 2 fılmi, Marvel Studios Inc. stýdııasynyń 4 fılmi jáne Bazelevs stýdııasynyń 2 fılmi dybystaǵan.
