Zań jobasy el ekonomıkasynyń sapaly jáne turaqty damýyn zańnamalyq turǵydan qamtamasyz etý maqsatynda ázirlendi. Atalǵan zań jobasymen Qazaqstan Respýblıkasynyń 85 zańnamalyq aktisine ózgerister men tolyqtyrýlar engiziledi.
Qujatta salymshylardyń turǵyn úı jaǵdaılaryn jaqsartý jáne emdelýge aqy tóleý úshin biryńǵaı zeınetaqy jınaqtaý qoryndaǵy mindetti zeınetaqy jarnalary jáne mindetti kásiptik zeınetaqy jarnalary esebinen birjolǵy zeınetaqy tólemderine quqyǵy kózdeledi.
Senattyń Ekonomıkalyq saıasat, ınnovasııalyq damý jáne kásipkerlik komıtetiniń qorytyndysyna qaraǵanda, zań jobasynda beırezıdent-bank fılıalyn ashýǵa ruqsat berýdi, lısenzııalaý, depozıtterge kepildik berý jáne saqtandyrý tólemderi, sondaı-aq qyzmetin toqtatý máselelerin qosa alǵanda, Qazaqstan Respýblıkasyndaǵy beırezıdent-bankterdiń fılıaldaryn, beırezıdent saqtandyrýuıymdarynyń fılıaldaryn qurý jáne olardyń qyzmetin júzege asyrý tártibi reglamentteledi.
Zań jobasynda jer zańnamasyna erekshe qorǵalatyn tabıǵı aýmaqtardyń jerin bosalqy jerge aýystyrý tártibine qatysty ózgerister engiziledi, mundaı aýystyrý úshin erekshe jaǵdaılardyń tizbesi keńeıtiledi. Budan basqa, avtomobıl kóligi salasyndaǵy tasymaldaý qyzmetine baılanysty qujattardy tirkeýdi, esepke alýdy, óńdeýdi jáne saqtaýdy qamtamasyz etýge baǵyttalǵan tasymaldaý salasyndaǵy biryńǵaı aqparattyq júıeni engizý, sondaı-aq zııatkerlik kólik júıesin qurý jáne onyń jumys isteý tártibi kózdeledi. Qujat aıasynda memleketke tıesili baǵaly qaǵazdardy shet memleketterdiń qor bırjalarynda ótkizý múmkindigi beriledi.
Zań jobasynda «elektrondyq úkimet» veb-portaly arqyly elektrondyq nysanda memlekettik qyzmetter kórsetý jáne «elektrondyq úkimet» shlıýzinde ornalasqan servıstermen ıntegrasııalanǵan aqparattandyrý obektileriniń qyzmeti reglamentteledi. Zań jobasymen jumys barysynda QR Parlamenti Senaty komıtetteriniń birqatar ózgerister men tolyqtyrýlar engizý qajettigi týyndady. Senator Edil Mamytbekov qujatty qaraý kezindegi talqylaý barysynda naqtylaýshy sıpattaǵy ózgerister men tolyqtyrýlar engizý qajettigi bolǵanyn atap ótti. Osy oraıda ishki qarama-qaıshylyqty boldyrmaý jáne zań jobasynyń normalaryn qoldanysqa engizý eskerilgen. О́z kezeginde Senat Tóraǵasy Máýlen Áshimbaev atalǵan zaǵ jobasyna qatysty pikir bildirdi.
«Memleket basshysynyń tapsyrmasymen azamattardyń óz zeınetaqy jınaǵynyń bir bóligin baspana alýǵa jáne emdelýge jumsaýy úshin qoldaný quqyǵy belgilenedi. Sondaı-aq, kásipkerlerge ózi birlesip jumys isteıtin taraptyń jaǵdaıyn anyqtaýǵa jáne is-áreketiniń táýekelin azaıtýǵa múmkindik beretin bıznes-seriktesterdiń tizilimin daıyndaý qarastyrylǵan», dedi M. Áshimbaev.
Senat Tóraǵasy «Biryńǵaı tereze» qaǵıdasy boıynsha «Bızneske arnalǵan Úkimet» qyzmetin iske qosý kózdelip otyrǵanyn atap ótti. Zań jobasy mıkroqarjy uıymdary men basshylarǵa qoıylatyn talaptardy arttyrýdy da kózdeıdi. Bul qaryz alýshylardyń múddelerin qorǵaýǵa jáne qarjy naryǵynda turaqtylyqty qamtamasyz etýge múmkindik beredi. Senatorlar zań jobasyn pysyqtap, Májiliske qaıtardy.
