«Sybaılas jemqorlyq úshin sottalǵandardy jazany óteý úshin birden qaýipsizdigi tómen qylmystyq atqarý júıesi mekemesine jiberý múmkindigi alynyp tastaldy. Sybaılas jemqorlar úshin mundaı artyqshylyq ( jalpy qylmystar úshin sottalǵandarǵa qaýipsizdigi tómen mekemelerge aýysý úshin jabyq úlgidegi túzeý mekemelerinde keminde eki jyl ótkizý qajet bolatyn) belgili bir syn týdyrǵan edi. Sondyqtan Prezıdent sybaılas jemqorlar úshin jazany óteý sharttaryn ózgertý týraly sheshim qabyldady», dedi Oljas Bektenov OKQ-da ótken baspasóz máslıhatynda.
Onyń aıtýynsha, endi paraqorlyqtyń aýyr quramy úshin sottalǵandar (aıtarlyqtaı jáne iri mólsherde para alý jáne berý, quqyq qorǵaý organy qyzmetkeriniń nemese sýdıanyń para alýy, paraqorlyqqa birneshe ret deldal bolý) jazasyn óteý úshin qaýipsizdigi ortasha mekemelerge, al asa iri mólsherde para alǵan nemese bergen adamdar maksımaldy qaýipsizdiktegi mekemelerge jiberiletin bolady.
«Osylaısha, mundaı sanattaǵy adamdar úshin jazany jeńil óteýge quqyqtyq tosqaýyl qoıyldy. Qaýipsizdigi tómen mekemelerge aýysý úshin endi olar zalaldy óteýmen qatar, taǵaıyndalǵan jazanyń bir bóligin túzeý mekemelerinde úlgili minez-qulyqpen óteýi tıis. Bunyń qylmystyq jazalaý maqsattaryna tolyq sáıkes keletinine, súringenderdi túzetý jolynda óziniń oń tárbıelik áserin beretinine tolyqtaı senemiz», dedi ol.
