«Memlekettik qyzmet – birqatar shekteýlerdi qabyldaýdy kózdeıtin qyzmettiń erekshe túri. Osy túzetýlerdi ázirleý kezinde el men halyqtyń múddesi úshin qyzmet etý ıdeologııasy basshylyqqa alyndy. Endi memlekettik qyzmetshilerdi qyzmetke taǵaıyndaý kezinde sheteldegi shottaryn jabý úshin alty aılyq merzim beriledi. Jumys istep júrgen memlekettik qyzmetshilerge qatysty sóz qozǵasaq, olarǵa zań qoldanysqa engizilgen kúnnen bastap Qazaqstan Respýblıkasynan tys aýmaqta ornalasqan sheteldik banktik shottardy jabýǵa alty aı beriledi», dedi Oljas Bektenov OKQ-da ótken baspasóz máslıhatynda.
Onyń aıtýynsha, bul rette memlekettik qyzmetshilerdiń sheteldik bankterde shottarynyń bolýyna quqyǵy bar jaǵdaılar aıqyndalǵan.
«Olardyń qatarynda: shetelde jumys isteý, oqý, taǵylymdamadan ótý, issapar nemese emdelýden ótý, kámeletke tolmaǵan balanyń zańdy ókili retinde shetelde bolý jaǵdaılary bar. Eger memlekettik qyzmetshi sheteldik banktegi shotty japqysy kelmese, memlekettik qyzmetten ketýge nıet bildirse, onda ol óz erkimen jumystan shyǵý týraly ótinish bere alady», dedi ol.
