Bilim jáne ǵylym mınıstrliginiń apparat otyrysynda Ashat Aımaǵambetov keıingi kezderi ártúrli aqyly marapattardyń keń tarap ketkenine alańdaıtynyn jetkizdi. Aıtýynsha, olardyń dızaıny da, aty da resmı bekitilgen marapattarǵa ábden jaqyndatylǵan.
«Keıbiri túsinbeı, basqalary ádeıi «Ult ustazy», Ybyraı Altynsarın atyndaǵy, basqa da ártúrli tósbelgilerdi aqsha tólep, alyp jatyr. Bul máseleni birneshe ret talqylaǵan edik. Biraq áli de bul úrdis azaımaı tur» dedi Ashat Aımaǵambetov.
Otyrysta sóz alǵan Bilim jáne ǵylym vıse-mınıstri Sholpan Qarınova bilim salasynda bekitilgen vedomstvolyq resmı nagradalardy atap ótti. Olar: Ybyraı Altynsarın tósbelgisi, «Qazaqstan Respýblıkasynyń bilim berý isiniń qurmetti qyzmetkeri» tósbelgisi, «Ǵylymdy damytýǵa sińirgen eńbegi úshin» tósbelgisi, «Eńbek ardageri» tósbelgisi, «Qurmet» gramotasy, Alǵys.
«Budan basqa bilim salasynda bektiligen eshqandaı nagrada joq. Sondyqtan basqa paıdalanyp júrgen, satyp alyp júrgen nagradalary durys emes ári pedagogıkalyq ádepke sáıkes kelmeıdi», dedi Sholpan Qarınova.
Budan keıin qaıta sóz alǵan Ashat Aımaǵambetov bul úrdisti toqtatý kerektigin eskertti.
«Osy másele boıynsha túsindirý jumysyn júrgizý qajet. Satyp alatyn marapat – marapat emes. Bir árıne, keıbir jaǵdaıda ártúrli qoǵamdyq marapattar bolatynyn túsinemiz. Biraq olar aqyly bolmaýy kerek. Eger qoǵamdyq marapat aqyly bolsa, onyń esh qasıeti, qundylyǵy joq. Keıbir áriptesterimiz túsinbeı, osyndaı áreketterge baryp jatqandar bar. О́ıtkeni, bul máseleni kótermesek bolmaıdy. Mektepterde ártúrli aqyly konkýrstar men olımpıadalar bolmaýy kerek. Ol túsinikti shyǵar. Biz tegin konkýrstardyń sanyn kóbeıtemiz»,dedi Ashat Aımaǵambetov.
