Májilis Tóraǵasy Nurlan Nyǵmatýlın Aqmola oblysyna jumys sapary barysynda Sh. Ýálıhanov atyndaǵy Kókshetaý memlekettik ýnıversıtetiniń ustazdarymen jáne stýdentterimen kezdesti.
Májilis Tóraǵasy Nurlan Nyǵmatýlın Aqmola oblysyna jumys sapary barysynda Sh. Ýálıhanov atyndaǵy Kókshetaý memlekettik ýnıversıtetiniń ustazdarymen jáne stýdentterimen kezdesti.
Jas belsendilermen júzdesý kezinde spıker Elbasynyń «Qazaqstan-2050» Strategııasynda belgilengen maqsattar men tapsyrmalarǵa sáıkes, memleketimizde bolyp jatqan basty ózgerister, májilismenderdiń zańnamalyq jumysy, aldaǵy josparlar jaıynda áńgime órbitti. Ásirese, úsh jyldyq bıýdjetke baılanysty zańnamalyq qujattarǵa, salyq salý máselelerine, Astanada ótetin EKSPO-2017 halyqaralyq kórmesin uıymdastyrý jaǵdaılaryna basa nazar aýdaryldy.
Búgingi kúni jergilikti ózin-ózi basqarý jáne memlekettik basqarý organdary arasyndaǵy ókilettikterdiń arajigin ajyratý, memlekettik qyzmetter, Kásipkerlerdiń ulttyq palatasy, Bıýdjet jáne Salyq kodeksterine ózgerister engizýge qatysty zańdar qabyldandy, – dedi Májilis Tóraǵasy. – Sondaı-aq, Qylmystyq is júrgizý, Qylmystyq atqarý kodeksteri, Ákimshiliktik quqyq buzýshylyq týraly kodeks, kásipodaqtar, menshiktik quqyqty qorǵaýdy kúsheıtý, sot sheshimderin oryndaý júıesin jetildirý syndy mańyzdy zań jobalary palata qaraýyna engizildi.
N.Nyǵmatýlın depýtattardyń zańnamalyq bastamalaryn da nazardan tys qaldyrmady. Atap aıtsaq, Májilistiń kezekti jalpy otyrysynda tikeleı depýtattyq top ázirlegen agroónerkásiptik keshen máselelerine qatysty zań jobasy maquldandy. Sondaı-aq, densaýlyq saqtaý máseleleri boıynsha zańnamalyq túzetýlerdi, áleýmettik mańyzdy memlekettik qyzmetterdi ońtaılandyrý men avtomattandyrýdy atap aıtýǵa bolady.
Jalpy alǵanda, Májilistiń 5-shaqyrylymy jumysyn bastaǵan 2012 jyldyń qańtar aıynan beri 163 zań jobasy maquldanyp, onyń 151-ine Prezıdenttiń qoly qoıylyp, óz kúshine endi. Bul rette Elbasynyń «Qazaqstan-2050» Strategııasynda júktegen aýqymdy tapsyrmalardy júzege asyrýǵa basa nazar aýdarylǵan.
Spıkerdiń atap ótkenindeı, bizdiń jas memleketimizdiń qalyptasýy men qarqyndy damýy Qazaqstan Prezıdentiniń batyl bastamalarymen, sondaı-aq, elimizdiń prezıdenttik ınstıtýtymen tikeleı baılanysty. Májilis Tóraǵasynyń pikirinshe, jańadan oqýǵa túskenine nemese jumys isteıtinine qaramastan, memleketimizdiń árbir azamatynyń áleýeti egemen elimizdi damytý men órkendetýge baǵyttalýy kerek. Osy rette Májilis Spıkeri aldaǵy mańyzdy qadamdarda jas býyn ókilderiniń aıryqsha úles qosatynyna senim bildirdi. «Elbasymyz birneshe márte atap aıtqanyndaı, elimizdegi barlyq jańa josparlar, jańa qadamdar eń aldymen jastar úshin jasalǵan. Sondyqtan, sizder búginnen bastap, ózderińizdiń jarqyn bolashaqtaryńyzdy qurýǵa asqan jaýapkershilikpen kirisýge tıistisizder», – dedi ol.
Stýdentterdiń Májilis Tóraǵasyna qoıǵan saýaldary san alýan. Máselen, kóppartııaly parlament jumysynyń ereksheligi, údemeli ındýstrııalandyrýdan bastap, depýtat bolýdyń jolyna deıingi barlyq taqyryptar qamtyldy. Indýstrııalyq-ınnovasııalyq damý baǵdarlamasyna qatysty suraqtarǵa jaýap bere kelip, N.Nyǵmatýlın baǵdarlama bastalǵan úsh jyldyń ishinde 600 kásiporyn, 250 jańa jumys orny ashylǵanyn, ónimniń 250-den astam jańa túri ıgerilgenin atap kórsetti.
– Sizderdiń jańa ınnovasııalyq óndiris oryndaryn qurý jáne jańa kásiporyndarda jumys isteý múmkindikterińiz bar, – deı kelip, spıker stýdentter avtory sanalatyn ınnovasııalyq jobalardyń óndiriske keńinen paıdalanylǵanyn dáleldeıtin mysaldar keltirdi. Memleket tarapynan barlyq múmkindikter de, jaǵdaılar da jasalyp jatyr, endigisi tek qana ózderińizge baılanysty. Qazirgi jastardyń bilim alýyna, tilderdi meńgerýine, álemdi tanýyna múmkindik zor. Eń bastysy, jastar patrıot bolýy kerek. Al patrıotızm – eń aldymen óz eliń úshin, onyń jetistikteri úshin maqtana bilý. Bul – ózińniń kúndelikti eńbegińmen Otanyńnyń odan ári órkendeýine qol jetkizý. Osynyń barlyǵy óz kezeginde bolashaq qazaqstandyqtar patrıotızminiń negizin qalaıdy.
Al májilismenderdiń zańnamalyq jumysy jaıyna toqtalǵan kezde, N.Nyǵmatýlın zań shyǵarý jalpy otyrysta ǵana daýys berý degen sóz emes dep, oǵan jetkenshe zań jobasy boıynsha barlyq komıtetterde, depýtattyq toptarda táýelsiz sarapshylardyń qatysýymen qyrýar ister atqarylatynyn atap aıtty. Orta eseppen alǵanda, árbir zań jobasy 16 talqylaýdan ótedi. Bul zań jobalarynyń sapasyn arttyrýǵa yqpal etetini anyq. Sondaı-aq, Májilis Tóraǵasy eksport máselelerin sheshýge, Qazaqstannyń DSU-ǵa kirýdegi basymdyqtaryna qatysty suraqtarǵa jaýap berdi.
– Qazaqstannyń ishki naryǵy shekteýli, ekonomıkanyń odan ári ósýi úshin ótim naryqtaryn keńeıtý qajet. Sondyqtan da Elbasy únemi biz úshin ekonomıkalyq ıntegrasııa ýaqyt talaby ekenin qaıtalap aıtýmen keledi. Qazirgi ýaqytta Eýrazııalyq ekonomıkalyq odaq qurý jáne Dúnıejúzilik saýda uıymyna kirý máseleleri óte mańyzdy, – dedi spıker.
Osy rette Nurlan Zaırollauly, ótim rynogy úshin kúresý kerektigimen kelise otyryp, osy jolda Qazaqstannyń salmaqty strategııalyq basymdyǵy retinde elimizdiń geografııalyq jaǵdaıyn alǵa tartty. Munymen qosa, Reseıdiń shekaralas aımaqtary men jalpy, Keden odaǵy elderiniń keleshegi zor. Qytaı da Qazaqstan ónimderi úshin iri ótim naryǵynyń biri bolyp tabylady. Qazir daıyn ónimder eksportynyń 27 paıyzy bizdiń ortalyqazııalyq aımaqtaǵy kórshilerimiz – О́zbekstanǵa, Tájikstanǵa, Túrkimenstanǵa jáne Qyrǵyzstanǵa jiberiledi. Iran, Aýǵanstan, Túrkııa, Kavkaz elderin de qolaıly ótim rynogy qataryna jatqyzýǵa bolady. Qazaqstan úshin bul Eýropa elderine, basqa da álemdik naryqqa tóte jol bolǵandyqtan, tranzıttik baǵytta da asa tıimdi, dedi Spıker.
N.Nyǵmatýlın Kókshetaý memlekettik ýnıversıtetindegi kezdesýden keıin osy qaladaǵy jańadan salynǵan №1 qalalyq emhanaǵa keldi. Emhanaǵa turǵyndar aýmaqtyq ustanym boıynsha bekitilgen. Ol búkil otbasyn bir mekemede baqylaýǵa jáne medısınalyq qyzmet kórsetýge qolaıly bolyp tabylady. Spıker emhana bólimderiniń jumysymen tanysyp, medısınalyq qondyrǵylardy kórdi jáne qyzmetkerlermen áńgimelesti.
Baqbergen AMALBEK,
«Egemen Qazaqstan».
Aqmola oblysy.
